ΥΠΟΘΕΣΙΣἈγγελία Εὐρυκλείας Πηνελόπῃ περὶ τοῦ Ὀδυσσέως καὶ τῆς τῶν μνηστήρων ἀναιρέσεως, ἀναγνωρισμός τε αὐτῆς πρὸς Ὀδυσσέα. ΑΛΛΩΣἈναγνωρισμὸς Ὀδυσσέως πρὸς τὴν γυναῖκα καὶ τῶν τῆς πλάνης διηγημάτων ἀνακεφαλαίωσις· καὶ Ὀδυσσέως καὶ Τηλεμάχου μετὰ τῶν οἰκείων ἔξοδος.
καγχαλόωσα ἤτοι γήθουσα, παρὰ τὸ καγχαλᾶσθαι, ἀφʼ οὗ καὶ ὁ οἶνος χάλιξ ὁ χαλῶν καὶ ἀνιεὶς ἡμᾶς ἀπὸ τῶν φροντίδων· καὶ τὸ παρὰ τὴν συνουσίαν ὑφʼ ἡδονῆς παθαίνεσθαι καὶ ὑποστένειν χαλιβάζειν ἔλεγον.
ἐρρώσαντο ἐρρωμένως ἐβάδιζον. ὑπερικταίνοντο Ἀρίσταρχος, ἀνεπάλλοντο καὶ ἐκινοῦντο προθυμουμένης αὐτῆς βαδίζειν ταχέως, μὴ δυναμένης δὲ, ἀλλὰ κατὰ βραχὺ διὰ τὸ γῆρας. οἱ δὲ, ὑπερεξετείνοντο. ἄμεινον δῆθεν ἐκινοῦντο, παρὰ τὸ ἴκταρ, ὅ ἐστιν ἐγγύς. καὶ γὰρ προείρηκε, γούνατα δʼ ἐρρώσαντο. ταχέων οὖν ὑπερικνοῦντο, ὃ ἔστι, παρεγίνοντο. ἐρρωμένως ἐβάδιζον· ὑπερικταίνοντο δὲ, ὑπερικνοῦντο καὶ ὑπερεπήδων, ὑπὲρ τὸ δέον ἐβάδιζον. οἱ δὲ, ἄγαν ἱκνοῦντο.
ἀντὶ τοῦ καὶ εἰς οἶκον ἱκάνει.
μάργην μεμηνυῖαν, ἔκφρονα.
χαλιφρονέοντα κεχαλασμένας καὶ παρειμένας ἔχοντα τὰς φρένας. κεχαλασμένας ἔχοντα τὰς φρένας, ἠλίθιον, ματαιόφρονα.
φρένας αἰσίμη ἦσθα ἀντὶ τοῦ καθήκοντα φρονοῦσα, παρὰ τὸ αἶσα.
λωβεύεις ἀπάταις λωβητὴν ποιεῖς· καὶ μήποτε κυρίως ἐστὶ λωβᾶν τὸ ἀποδύσαντα τὸ λῶπος πληγὰς ἐντείνειν. χλευάζεις, εἰς λώβην καὶ ὕβριν ἄγεις.
παρὲξ ἐρέουσα παρὰ τὸ δέον λέγουσα.
σὲ δὲ τοῦτό γε γῆρας ὀνήσει τὸ μὴ μεθʼ ὕβρεως ἀποπεμφθῆναι. ἢ οἷον, εἰ καὶ τὰ ἄλλα σοι βαρύ ἐστι, τοῦτό γε ὀνήσει.
ὁ ξεῖνος στικτέον μετὰ τοῦτο. ἠθικῶς δὲ ὁ ξένος ἐστὶν ὁ Ὀδυσσεύς. μετὰ τοῦ ἤθους ὁ λόγος.
ὑπερηνορεόντων ὑπερηφανευόντων.
οὐκ ἴδον οὔτε ποίῳ τρόπῳ ἀπώλοντο εἶδον, οὔτε παρʼ ἄλλου ἤκουσα.
ἡμεῖς δὲ μυχῷ ἡμᾶς δὲ αἱ θύραι εἴσω κατεῖχον. σανὶς δὲ εἴρηται οἱονεὶ τανὶς παρὰ τὸ τετάσθαι.
ἀτυζόμεναι ἐκπληττόμεναι, ταρασσόμεναι. ἀτύω, ὁ μέλλων ἀτύσω· καὶ κατὰ παραγωγὴν, ἀτύζω, Αἰολικόν. ἔχον ἀντὶ τοῦ ἠσφαλισμέναι ἦσαν.
κραταίπεδον οὖδας λιθόστρωτον ἔδαφος, ἢ ψηφολόγητον, τὸ ἀντίτυπον, τὸ σκληρόν. οἱ δὲ ἀμφʼ αὐτὸν Ὀδυσσέα ἔχοντες τὸ κραταιὸν πέδον κείατʼ ἐπʼ ἀλλήλοισιν. κραταίπεδον τὸ ἔδαφος.
ἐϋφροσύνης ἐπιβῆτον θυμηδίας ἐπιβήσετε, εὐφρανθῆναι ποιήσετε. ἐπιβῆναι ποιήσατε. συγκοπὴ τοῦ ἐπιβήσετον.
ἀμφοτέρω γρ. ἀμφοτέρων. πέποσθε πονῶ, πεπόνημαι, πεπονήμεθα, πεπόνησθε, καὶ συγκοπῇ πέποσθε.
ἐέλδωρ ζήτημα.
ἀγασσάμενος ὑπερεκπλαγείς.
ὤλεσε τηλοῦ νόστον τίνος νόστον; τὴν διὰ νεὼς κομιδὴν, ὅ ἐστι τὰ πλοῖα ὤλεσε, καὶ μετὰ τὸ ὀλέσαι τὸν νόστον καὶ αὐτὸς ἀπώλετο.
ἐσχάρῃ ἔνθα τὸ πῦρ καίεται. ἔστι δὲ βωμὸς ἰσόπεδος οὐκ ἐκ λίθων ὑψούμενος.
μάστακα νῦν τὸ στόμα. ἐν δὲ τῇ Ἰλιάδι καὶ τὸ μάσημα «μάστακʼ ἐπεί κε λάβῃς.» ὁ δὲ Ἀλκμὰν καὶ τὰς γνάθους μάστακάς φησι, παρὰ τὸ μασᾶσθαι. τὴν δὲ τροφὴν μάστακα ἔλεγον διὰ τὸ τὰ βρέφη μαστάζειν αὐτὴν, ἀφʼ οὗ καὶ ὁ μαστὸς καὶ ἡ μάζα.
ἐμέθεν περιδώσομαι αὐτῆς περὶ ἐμαυτῆς συνθήσομαι. τὴν φαρέτραν συνδήσομαι.
χαλεπόν σε θεῶν χαλεπὸν, εἴ τις οὐ φυλάξει θεῶν βουλεύματα, τὸ φυλάξαι ἀνθρώπων.
πολύϊδριν πολυπαθῆ, πολλὰ εἰδυῖαν.
ὑπερώϊα ὑπερωΐων, ὡς τὸ «διά τʼ ἔντεα καὶ μέλαν αἷμα.»
ἐξερεείνοι ἀνακρίνειε τῷ λόγῳ.
ἐν πυρὸς αὐγῇ ἐν τῷ πεφωτισμένῳ τόπῳ καὶ πεφλογισμένῳ ἀπὸ τοῦ πυρός.
ἐνωπιδίως ἐσίδεσκεν ἐναργῶς ἄντικρυς περιεργότερον ἀφορῶσα ἐγνώριζεν. ἔνιοι, ἤϊσκεν, ἀντὶ τοῦ ὡμοίου τῇ ὄψει τοῦ Ὀδυσσέως. ἢ περιεργότερον αὐτὸν κατεσκόπει τοῖς ὀφθαλμοῖς. ὄψει οὖν, τοῖς ὄμμασιν.
ἀγνώσασκε ἠγνόει.
δύσμητερ ἐπὶ κακῷ μήτηρ λεγομένη.
ἀνείρεαι τὰ περὶ τοῦ ἔρωτος. ἀλλοτριοῦσαι τῇ διαθέσει, καὶ καθεζομένη παρʼ αὐτὸν οὐκ ἀνείρεαι οὐδὲ μεταλλᾷς.
ἱκάνεται ἀντὶ τοῦ ἱκάνει.
πειράζειν ἐμέθεν ἀπόπειράν μου λαμβάνειν.
ὀπίσσω χρονικῶς ἀντὶ τοῦ μετὰ ταῦτα, μετὰ τὸν φόνον. μετὰ τὸν τῆς ἀπωλείας χρόνον.
πηούς τοὺς πόρρωθεν συγγενεῖς.
ὅπλισθεν ἡτοιμάσθησαν.
πολυμνήστην τὴν μάλιστα μνήστην, κυρίως ἐπὶ Πηνελόπης.
τοῦ ἐκ κορείας αὐτῇ συνεζευγμένου.
εἴρυσθαι κρατῆσαι.
ἀνεστραμμένως τοῦτο εἴρηται.
τέχνην παντοίην χρυσοχοϊκὴν δηλονότι· οὐ γὰρ τέχνην παντοίην.
κῆρ ἀτέραμνον σκληρόν. μετῆκται δὲ ἀπὸ τοῦ σώματος ἐπὶ τὴν ψυχήν. οἱ δὲ περὶ Πλάτωνα κερασβόλον φασὶν ἀτεράμνοις καὶ σκληροῖς τὴν ψυχὴν, μεταφορικῶς. Θεόφραστος γάρ φησιν ὃ ἂν σπέρμα ἐν τῷ καταρρίπτεσθαι ἅψηται τῶν κεράτων τοῦ ἀροῦντος βοὸς, σκληρὸς γίνεται. ὁ δὲ νοῦς, περισσῶς οἱ θεοί σε παρὰ τὰς ἄλλας γυναῖκας σκληρὰν τὴν ψυχὴν ἐποίησαν.
οὐδʼ ἀθερίζω ἀποβάλλομαι, ἀποδιώκομαι. ἀθερίζω τὸ ἐκρίπτω καὶ ἀποβάλλω, ἀπὸ μεταφορᾶς τῶν ἀθέρων τῶν μὴ δυναμένων ἔχεσθαι διὰ σμικρότητα. οἱ γὰρ λικμῶντες ἐκρίπτουσιν αὐτούς.
ἐκθεῖσαι ἔξω ἀποθέμεναι. ἐκθέσθαι γρ. ἐκθεῖσα, ἔξω θεῖσα. πυκινὸν πυκνὸν τοῖς στρώμασι.
μέγα σῆμα τέτυκται ἐν λέχει ἀσκητῷ μέγα τέρας. ἀκίνητον δὲ λέγων εἶναι τὸ λέχος, ἔοικεν αἰνίττεσθαι ὅτι τὴν γαμικὴν κοίτην ἀδιάλυτον εἶναι δεῖ.
θάμνος δασὺ φυτὸν παρὰ τὸ θαμὸν, ὅ ἐστι πυκνόν.
ἀκμηνὸς θαλέθων ὁ ἀκμὴν ἔχων τοῦ θάλλειν, εὐτραφὴς, ἀκμάζων. ἐπὶ μὲν τούτου ὠξυτόνησεν, ἐπὶ δὲ τοῦ ἐν Ἰλιάδι δηλοῦντος τὸ νῆστις ἐβαρυτόνησεν. οἱ δὲ τὰ δύο προπαρωξυτόνησαν.
κορμὸν δʼ ἐκ ῥίζης προταμὼν ἀπὸ τῆς ῥίζης κορμὸν ποιήσας.
στάθμην τὴν τεκτονικὴν σπάρτον.
ἑρμῖνʼ κλίνης ποδάριον. ἕρμα γάρ ἐστι τῆς κλίνης. Ἑρμῆν ἀσκήσας, τέτρηνε δὲ π. τ. Ἑρμῆς ὁ Διὸς καὶ Μαίας τῆς Ἄτλαντος, παῖς ἔτι ὢν ἐν ἀνθρώποις τέσσαρα μέγιστα εὕρετο, γράμματα καὶ μουσικὴν καὶ παλαίστραν καὶ γεωμετρίαν. ὅθεν καὶ τοὺς Ἕλληνας τετράγωνον αὐτὸν ἀσκῆσαι, καὶ οὕτως ἐν τοῖς γυμνασίοις ἀναθεῖναι. τῷ δὲ ὀνειροπομπὸν εἶναι, καὶ τοὺς κοιμωμένους αὐτῷ εὔχεσθαι, καὶ αὐτὸν ἀναμένειν, εἵλοντο ἐν τοῖς θαλάμοις ἔχειν αὐτὸν φύλακα τοῦ ὕπνου, ἐπινοῆσαί τε καὶ ἀσκῆσαι τοὺς τῶν κλινῶν πόδας εἰς τὴν τοῦ θεοῦ πρόσοψιν, ὅπως ἀλεξήτορας ἔχοντες ἰδέας τὰ μὲν δείματα μὴ φοβοῖντο, προσδοκῷεν δὲ πλείστην ἐπαφροδισίαν διὰ τὼν ὀνειράτων. ἡ δὲ ἱστορία παρὰ Ἀπολλοδώρῳ τῷ Ἀθηναίῳ. τέτρηνα ἐτόρνωσα.
ἐκ δὲ τοῦ ἀρχόμενος τοῦ ποδός.
ἐκ δʼ ἐτάνυσσα ἱμάντα βοὸς τὸν τόνον λέγει τῆς κλίνης ἐξ ἱμάντος εἶναι βοείου φοινικοῦ τῷ χρώματι. ἶφι κταμένοιο γρ. φοίνικι φαεινῷ.
σκύζε ὀργίζου.
ἀγάσαντο ἐφθόνησαν.
οὐδέ κεν Ἀργείη Ἑλένη ἀθετοῦνται οἱ ζʹ ὡς σκάζοντες κατὰ τὸν νοῦν. σώζοιντο δʼ ἂν, εἰ στίζοιμεν ἐπὶ «τῷ εἰ ᾔδη.» καὶ τὸ ὃ ἀντὶ τοῦ διό ὡς εἶναι, οὐδʼ ἂν ἡ Ἑλένη ἐμίγη παρὰ ἀλλοδαπῷ ἀνδρὶ, εἰ μὴ ἦν ἐξηπατημένη. διὸ αὐτὴν, ἐπεὶ παρελογίσθη, οἱ Ἕλληνες ἐπανήγαγον. οἱ δέ φασι τὸν Ἀλέξανδρον Μενελάῳ εἰκασθέντα γνώμῃ Ἀφροδίτης μιγῆναι τῇ Ἑλένῃ. Ἀλέξανδρος ὁ Πριάμου παῖς ἀπὸ τῆς Ἀσίας κατάρας εἰς τὴν Λακεδαίμονα διενοεῖτο τὴν Ἑλένην ξενιζόμενος ἁρπάσαι. ἡ δὲ γενναῖον ἦθος καὶ φίλανδρον ἔχουσα ἀπηγόρευε καὶ προτιμᾶν ἔλεγε τὸν μετὰ νόμου γάμον, καὶ τὸν Μενέλαον περὶ πλείονος ἡγεῖσθαι. γενομένου δὲ τοῦ Πάριδος ἀπράκτου, φασὶ τὴν Ἀφροδίτην ἐπιτεχνῆσαι τοιοῦτόν τι, ὥστε καὶ μεταβάλλειν τοῦ Ἀλεξάνδρου τὴν ἰδέαν εἰς τὸν τοῦ Μενελάου χαρακτῆρα, καὶ οὕτω τὴν Ἑλένην παραλογίσασθαι. δόξασαν γὰρ εἶναι ταῖς ἀληθείαις τὸν Μενέλαον μὴ ὀκνῆσαι ἅμα αὐτῷ ἕπεσθαι, φθάσασαν δὲ αὐτὴν ἄχρι τῆς νεὼς, ἐμβαλλόμενος ἀνήχθη. ἡ ἱστορία παρὰ Νικίᾳ τῷ πρώτῳ.
εἰ ᾔδη ἐνταῦθα στικτέον, ἔπειτα ἀφʼ ἑτέρας ἀρχῆς προενεκτέον. εἰ ᾔδη ὅτι πολλοὶ κακὰ κέρδεα βουλεύουσιν. Ἡρωδιανὸς τὸν εἰ ἀντὶ τοῦ ἐπεί φησὶν εἶναι, καὶ συνάπτει ὅλον τὸν νοῦν οὕτως· εἰ μὴ ἠπατήθη ἡ Ἑλένη ὑπὸ τῆς Ἀφροδίτης, οὐκ ἂν ἄλλῳ ἠκολούθησεν ἀνδρί. καὶ πόθεν δῆλον ὅτι διʼ ἀπάτην ἠκολούθησε καὶ οὐχ ἑκουσίως; ἐπειδὴ ᾔδη μάλιστα ὅτι οὐκ ἔχει καταφρονηθῆναι τοῖς Ἕλλησιν ἡ αὐτῆς ἁρπαγή. ὅ μιν αὖτις ἀρήϊοι ὗες Ἀχαιῶν ὁ γὰρ λόγος, οὐκ ἂν ἡ Ἑλένη παρʼ ἀλλοφύλῳ ἀνδρὶ ἐμίγη, εἰ προεώρα τὸ μέλλον. διὸ καὶ ἐπανάξειν ἔμελλον αὐτὴν οἱ Ἕλληνες, ὡς μηδὲν ἡμαρτηκυῖαν. ὅ μιν διὸ αὐτήν.
τὴν δʼ ἄτην οὐ πρόσθεν οὐ πρὸ τοῦ παθεῖν ἔγνω τὴν φρενοβλάβειαν.
ἀριφραδέα ἀντὶ τοῦ ἀριφραδέως.
κύματι πηγῷ εὐπαγεῖ καὶ στερρῷ, ἢ μέλανι, ὡς τὸ «ἀρνειῷ μιν ἔγωγε ἐΐσκω πηγεσιμάλλῳ»
δέδρομεν γρ. τέτροφεν. πέπηγεν· ὅθεν καὶ ἡ τροφὴ καὶ ὁ πεπηγὼς τυρὸς τροφαλίς.
νύκτα μὲν ἐν πέρατι δολιχὴν πρὸς τέλει αὐτὴν οὖσαν δολιχὴν ἐπέσχεν, ὑπὲρ τοῦ εἰς πλέον ἀλλήλων ἀπολαῦσαι. ἐν περάτῃ ἤδη πρὸς τῷ πέρατι καὶ τῷ τέλει οὖσαν. δολιχὴν οὐκ ἐν τῷ καθόλου, ἀλλὰ τότε ἐσομένην πρὸς ἀνάκτησιν τοῦ Ὀδυσσέως.
ῥύσατʼ ἐκώλυσεν.
ἔασιν γρ. ἄγουσιν.
οὐ γάρ πω πάντων τοῦτο θέλει εἰπεῖν· μή μου τὴν ψυχὴν ταράξῃς, οὔπω γὰρ εἰς τέλος τῶν κακῶν ἦλθον, ἀλλʼ ἔτι μέλλω πονεῖν. ἀλλὰ τραπῶμεν εἰς κοίτην.
μαντεύσατο γρ. μυθήσατο.
καί τοι θεὸς ἔμβαλε θυμῷ τὸ εἰπεῖν ὅτι ποιῆσαί σέ τι καὶ ἕτερον δεῖ.
τί γάρ τί δήποτε.
εὐῆρες ἐρετμὸν εὖ ἐρέσσειν δυνάμενον.
καὶ τότε δὴ γαίῃ γρ. καὶ τότε μʼ ἐν γαίῃ.
ἐξ ἁλὸς γρ. ἔξαλος, ἤγουν ἔξω τῆς θαλάσσης.
ἀσπάσιοι λέκτροιο ἀσπαστῶς καὶ ἐπιθυμητικῶς ὑπεμνήσθησαν τοῦ πάλαι τῆς συνουσίας νόμου. Ἀριστοφάνης δὲ καὶ Ἀρίσταρχος πέρας τῆς Ὀδυσσείας τοῦτο ποιοῦνται. ἀσπάσιοι λέκτροιο παλαιοῦ θεσμὸν ἵκοντο τοῦτο τέλος τῆς Ὀδυσσείας φησὶν Ἀρίσταρχος καὶ Ἀριστοφάνης.
καταλέξαι καθέκαστον εἰπεῖν.
οὐ καλῶς ἠθέτησεν Ἀρίσταρχος τοὺς τρεῖς καὶ τριάκοντα· ῥητορικὴν γὰρ πεποίηκεν ἀνακεφαλαίωσιν καὶ ἐπιτομὴν τῆς Ὀδυσσείας.
ἤην ἀντὶ τοῦ ἦ.
εὐρώεντα ἤτοι πλατὺν, παρὰ τὸ εὖρος· ἢ σκοτεινόν. γρ. ἠερόεντα.
ἀκήριοι ἄνδρες ἄλυξαν χωρὶς κηρὸς, χωρὶς θανάτου. καὶ ἀκήριοι, ἀσθενεῖς.
ἔβαλεν νῦν ἀντὶ τοῦ ἔκλασεν. ψολόεντι ἀπὸ τοῦ ψῶ τὸ λεπτύνω. πᾶν γὰρ τὸ κατερχόμενον ἄνωθεν οὐ τοιοῦτον κατέρχεται μέχρι καὶ τέλους. καυστικῷ. ψόλον γὰρ τὸ ἄσβολον ποιοῦν.
λυσιμελὴς ὁ τὰ μέλη τοῦ σώματος παριείς· ἢ ἀμέριμνος.
ὦ γύναι, ἤδη μὲν πολέων ἡ σύνταξις οὕτως, ὦ γύναι, ἤδη μὲν πολέων κεκορήμεθʼ ἀέθλων, νῦν δʼ ἐπεὶ ἀμφοτέρω πολυήρατον ἱκόμεθʼ εὐνὴν, σὺ μὲν ἐν τοῖς οἴκοις ἐπιμελείας ἀξίου τὰ κτήματα, ἐγὼ γὰρ αὐτὸς λαφυραγωγήσω τὰ θρέμματα ἅπερ οἱ μνηστῆρες κατέφαγον.
πεδάασκον ἐδέσμουν. ἐνεπόδιζον.
ληΐσσομαι κτήσομαι.
ἐπαύλους νῦν τοὺς σταθμούς.
εἰς ὑπερῷ ἀναβᾶσα καταλείπει τὴν γυναῖκα θαρρῶν τῷ πατρὶ αὐτῆς καὶ τοῖς ἀδελφοῖς. ἢ δῆθεν ὡς ἀγνοοῦσαν τῶν πεπραγμένων τὸ ἀληθές· ἢ ἐμπιστεύων τῇ Ἀθηνᾷ.
προτιόσσεο προσδέχου.
ἐξῆγε ἐξέβαλεν.