--- title: Epigrams title_greek: Ἐπιγράμματα author: Plato of Athens eul_wid: ffk-au eul_aid: ffk canonical: "https://eulogikon.org/works/plato-epigrams-ffk-au" period: Classical dialect: Attic Philosophical domain: Philosophy format: Verse license: "https://creativecommons.org/publicdomain/mark/1.0/" --- # Epigrams *Ἐπιγράμματα* **Author:** Plato of Athens **eul_wid:** `ffk-au` · [HTML page](https://eulogikon.org/works/plato-epigrams-ffk-au) ## Text ### book 78.1.1 Τὴν ψυχὴν Ἀγάθωνα φιλῶν ἐπὶ χείλεσιν ἔσχον· ### book 78.1.2 ἦλθε γὰρ ἡ τλήμων ὡς διαβησομένη. ### book 79.1.1 Τῷ μήλῳ βάλλω σε· σὺ δ’ εἰ μὲν ἑκοῦσα φιλεῖς με, ### book 79.1.2 δεξαμένη τῆς σῆς παρθενίης μετάδος. ### book 79.1.3 εἰ δ’ ἄρ’, ὃ μὴ γίγνοιτο, νοεῖς, τοῦτ’ αὐτὸ λαβοῦσα ### book 79 σκέψαι τὴν ὥρην ὡς ὀλιγοχρόνιος. ### book 80.1.1 Μῆλον ἐγώ· βάλλει με φιλῶν σέ τις. ἀλλ’ ἐπίνευσον, ### book 80.1.2 Ξανθίππη· κἀγὼ καὶ σὺ μαραινόμεθα. ### book 1.1.1 Ἡ σοβαρὸν γελάσασα καθ’ Ἑλλάδος, ἡ τὸν ἐραστῶν ### book 1.1.2 ἑσμὸν ἐνὶ προθύροις Λαῒς ἔχουσα νέων, ### book 1.1.3 τῇ Παφίῃ τὸ κάτοπτρον, ἐπεὶ τοίη μὲν ὁρᾶσθαι ### book 1.1.4 οὐκ ἐθέλω, οἵη δ’ ἦν πάρος, οὐ δύναμαι. ### book 43.1.1 Τὸν Νυμφῶν θεράποντα, φιλόμβριον, ὑγρὸν ἀοιδόν, ### book 43.1.2 τὸν λιβάσιν κούφαις τερπόμενον βάτραχον ### book 43.1.3 χαλκῷ μορφώσας τις ὁδοιπόρος εὖχος ἔθηκε, ### book 43.1.4 καύματος ἐχθροτάτην δίψαν ἀκεσσάμενος. ### book 43.5.1 πλαζομένῳ γὰρ ἔδειξεν ὕδωρ, εὔκαιρον ἀείσας ### book 43.5.2 κοιλάδος ἐκ δροσερῆς ἀμφιβίῳ στόματι· ### book 43.5.3 φωνὴν δ’ ἡγήτειραν ὁδοιπόρος οὐκ ἀπολείπων ### book 43 εὗρε πόσιν γλυκερῶν, ὧν ἐπόθει, λιβάδων. ### book 99.1.1 Δάκρυα μὲν Ἑκάβῃ τε καὶ Ἰλιάδεσσι γυναιξὶ ### book 99.1.2 Μοῖραι ἐπέκλωσαν δὴ τότε γεινομέναις· ### book 99.1.3 σοὶ δέ, Δίων, ῥέξαντι καλῶν ἐπινίκιον ἔργων ### book 99.1.4 δαίμονες εὐρείας ἐλπίδας ἐξέχεαν. ### book 99.5 κεῖσαι δ’ εὐρυχόρῳ ἐν πατρίδι τίμιος ἀστοῖς, ### book 99 ὦ ἐμὸν ἐκμήνας θυμὸν ἔρωτι Δίων. ### book 100.1.1 Νῦν, ὅτε μηδὲν Ἄλεξις ὅσον μόνον εἶφ’ ὅτι καλός, ### book 100.1.2 ὦπται καὶ πάντῃ πᾶσι περιβλέπεται. ### book 100.1.3 θυμέ, τί μηνύεις κυσὶν ὀστέον; εἶτ’ ἀνιήσεις ### book 100.1.4 ὕστερον. οὐχ οὕτω Φαῖδρον ἀπωλέσαμεν; ### book 256.1.1 Οἵδε ποτ’ Αἰγαίοιο βαρύβρομον οἶδμα λιπόντες ### book 256.1.2 Ἐκβατάνων πεδίῳ κείμεθ’ ἐνὶ μεσάτῳ. ### book 256.1.3 χαῖρε, κλυτή ποτε πατρὶς Ἐρέτρια· χαίρετ’, Ἀθῆναι, ### book 256.1.4 γείτονες Εὐβοίης· χαῖρε, θάλασσα φίλη. ### book 259.1.1 Εὐβοίης γένος ἐσμὲν Ἐρετρικόν, ἄγχι δὲ Σούσων ### book 259.1.2 κείμεθα· θεῦ, γαίης ὅσσον ἀφ’ ἡμετέρης. ### book 265.1.1 Ναυηγοῦ τάφος εἰμί, ὁ δ’ ἀντίον ἐστὶ γεωργοῦ· ### book 265.1.2 ὡς ἁλὶ καὶ γαίῃ ξυνὸς ὕπεστ’ Ἀίδης. ### book 268.1.1 Ναυηγόν με δέδορκας· ὃν ἡ κτείνασα θάλασσα ### book 268.1.2 γυμνῶσαι πυμάτου φάρεος ᾐδέσατο, ### book 268.1.3 ἄνθρωπος παλάμῃσιν ἀταρβήτοις μ’ ἀπέδυσε, ### book 268.1.4 τόσσον ἄγος τόσσου κέρδεος ἀράμενος. ### book 268.5.1 κεῖνο καὶ ἐνδύσαιτο καὶ εἰς Ἀίδαο φέροιτο, ### book 268.5.2 καί μιν ἴδοι Μίνως τοὐμὸν ἔχοντα ῥάκος. ### book 269.1.1 Πλωτῆρες, σῴζοισθε καὶ εἰν ἁλὶ καὶ κατὰ γαῖαν· ### book 269.1.2 ἴστε δὲ ναυηγοῦ σῆμα παρερχόμενοι. ### book 669.1.1 Ἀστέρας εἰσαθρεῖς, Ἀστὴρ ἐμός· εἴθε γενοίμην ### book 669.1.2 οὐρανός, ὡς πολλοῖς ὄμμασιν εἰς σὲ βλέπω. ### book 670.1.1 Ἀστὴρ πρὶν μὲν ἔλαμπες ἐνὶ ζωοῖσιν Ἑῷος· ### book 670.1.2 νῦν δὲ θανὼν λάμπεις Ἕσπερος ἐν φθιμένοις. ### book 3.1.1 Εἰνοδίην καρύην με παρερχομένοις ἐφύτευσαν ### book 3.1.2 παισὶ λιθοβλήτου παίγνιον εὐστοχίης· ### book 3.1.3 πάντας δ’ ἀκρεμόνας τε καὶ εὐθαλέας ὀροδάμνους ### book 3.1.4 κέκλασμαι πυκιναῖς χερμάσι βαλλομένη· ### book 3.5 δένδρεσιν εὐκάρποις οὐδὲν πλέον· ἦ γὰρ ἔγωγε ### book 3 δυσδαίμων ἐς ἐμὴν ὕβριν ἐκαρποφόρουν. ### book 44.1.1 Χρυσὸν ἀνὴρ εὑρὼν ἔλιπε βρόχον· αὐτὰρ ὁ χρυσόν, ### book 44.1.2 ὃν λίπεν, οὐχ εὑρὼν ἧψεν, ὃν εὗρε, βρόχον. ### book 51.1 Αἰὼν πάντα φέρει· δολιχὸς χρόνος οἶδεν ἀμείβειν ### book 51 οὔνομα καὶ μορφὴν καὶ φύσιν ἠδὲ τύχην. ### book 506.1.1 Ἐννέα τὰς Μούσας φασίν τινες· ὡς ὀλιγώρως· ### book 506.1.2 ἠνίδε καὶ Σαπφὼ Λεσβόθεν ἡ δεκάτη. ### book 747.1.1 Εἰκόνα πέντε βοῶν μικρὰ λίθος εἶχεν ἴασπις, ### book 747.1.2 ὡς ἤδη πάσας ἔμπνοα βοσκομένας. ### book 747.1.3 καὶ τάχα κἂν ἀπέφευγε τὰ βοίδια· νῦν δὲ κρατεῖται ### book 747.1.4 τῇ χρυσῇ μάνδρῃ τὸ βραχὺ βουκόλιον. ### book 823.1.1 Σιγάτω λάσιον Δρυάδων λέπας οἵ τ’ ἀπὸ πέτρας ### book 823.1.2 κρουνοὶ καὶ βληχὴ πουλυμιγὴς τοκάδων, ### book 823.1.3 αὐτὸς ἐπεὶ σύριγγι μελίσδεται εὐκελάδῳ Πάν, ### book 823.1.4 ὑγρὸν ἱεὶς ζευκτῶν χεῖλος ὑπὲρ καλάμων· ### book 823.5 αἱ δὲ πέριξ θαλεροῖσι χορὸν ποσὶν ἐστήσαντο ### book 823 Ὑδριάδες Νύμφαι, Νύμφαι Ἁμαδρυάδες. ### book 13.1.1 Ὑψίκομον παρὰ τάνδε καθίζεο φωνήεσσαν ### book 13.1.2 φρίσσουσαν πυκινοῖς κῶνον ὑπὸ ζεφύροις, ### book 13.1.3 καί σοι καχλάζουσιν ἐμοῖς παρὰ νάμασι σῦριγξ ### book 13.1.4 θελγομένῳ στάξει κῶμα κατὰ βλεφάρων. ### book 160.1.1 Ἡ Παφίη Κυθέρεια δι’ οἴδματος ἐς Κνίδον ἦλθε ### book 160.1.2 βουλομένη κατιδεῖν εἰκόνα τὴν ἰδίην. ### book 160.1.3 πάντῃ δ’ ἀθρήσασα περισκέπτῳ ἐνὶ χώρῳ ### book 160.1.4 φθέγξατο· „Ποῦ γυμνὴν εἶδέ με Πραξιτέλης;“ ### book 160.5.1 Πραξιτέλης οὐκ εἶδεν, ἃ μὴ θέμις, ἀλλ’ ὁ σίδηρος ### book 160.5.2 ἔξεσεν, οἷά γ’ Ἄρης ἤθελε, τὴν Παφίην. ### book 161.1.1 Οὔτε σε Πραξιτέλης τεχνάσατο οὔθ’ ὁ σίδαρος· ### book 161.1.2 ἀλλ’ οὕτως ἔστης ὥς ποτε κρινομένη. ### book 210.1.1 Ἄλσος δ’ ὡς ἱκόμεσθα βαθύσκιον, εὕρομεν ἔνδον ### book 210.1.2 πορφυρέοις μήλοισιν ἐοικότα παῖδα Κυθήρης. ### book 210.1.3 οὐ δ’ ἔχεν ἰοδόκον φαρέτρην, οὐ καμπύλα τόξα, ### book 210.1.4 ἀλλὰ τὰ μὲν δένδρεσσιν ὑπ’ εὐπετάλοισι κρέμαντο· ### book 210.5.1 αὐτὸς δ’ ἐν καλύκεσσι ῥόδων πεπεδημένος ὕπνῳ ### book 210.5.2 εὗδεν μειδιόων· ξουθαὶ δ’ ἐφύπερθε μέλισσαι, ### book 210 κηροχυτοῦσαι ’ντός, λαροῖς ἐπὶ χείλεσι βαῖνον. ### book 248.1 Τὸν Σάτυρον Διόδωρος ἐκοίμισεν, οὐκ ἐτόρευσεν· ### book 248 ἢν νύξῃς, ἐγερεῖς· ἄργυρος ὕπνον ἔχει. ## License and provenance Eulogikon publishes public-domain Greek texts in cleaned, structured, readable form and makes no copyright claim over that preparation (Public Domain Mark 1.0, https://creativecommons.org/publicdomain/mark/1.0/). Cite as `eul_wid: ffk-au`.