--- title: Shield of Heracles title_greek: Ἀσπὶς Ἡρακλέους author: Hesiod eul_wid: aau-ab eul_aid: aau canonical: "https://eulogikon.org/works/hesiod-shield-aau-ab" lang: grc period: Archaic dialect: Homeric domain: "Poetry, Mythology" genre: Epic content_hash: "sha256:8fce51352867483b9a9fcca55aa1afe465e51bba026d2c491ba5192758f1203a" content_modified_at: "2026-09-24" license: "https://creativecommons.org/publicdomain/mark/1.0/" --- # Shield of Heracles *Ἀσπὶς Ἡρακλέους* **Author:** Hesiod **eul_wid:** `aau-ab` · [HTML page](https://eulogikon.org/works/hesiod-shield-aau-ab) ## Text ### 1 ... Ἢ οἵη προλιποῦσα δόμους καὶ πατρίδα γαῖαν ### 2 ἤλυθεν ἐς Θήβας μετ’ ἀρήιον Ἀμφιτρύωνα ### 3 Ἀλκμήνη, θυγάτηρ λαοσσόου Ἠλεκτρύωνος· ### 4 ἥ ῥα γυναικῶν φῦλον ἐκαίνυτο θηλυτεράων ### 5 εἴδεΐ τε μεγέθει τε· νόον γε μὲν οὔ τις ἔριζε ### 6 τάων ἃς θνηταὶ θνητοῖς τέκον εὐνηθεῖσαι. ### 7 τῆς καὶ ἀπὸ κρῆθεν βλεφάρων τ’ ἄπο κυανεάων ### 8 τοῖον ἄηθ’ οἷόν τε πολυχρύσου Ἀφροδίτης. ### 9 ἣ δὲ καὶ ὣς κατὰ θυμὸν ἑὸν τίεσκεν ἀκοίτην, ### 10 ὡς οὔ πώ τις ἔτισε γυναικῶν θηλυτεράων· ### 11 ἦ μέν οἱ πατέρ’ ἐσθλὸν ἀπέκτανε ἶφι δαμάσσας, ### 12 χωσάμενος περὶ βουσί· λιπὼν δ’ ὅ γε πατρίδα γαῖαν ### 13 ἐς Θήβας ἱκέτευσε φερεσσακέας Καδμείους. ### 14 ἔνθ’ ὅ γε δώματ’ ἔναιε σὺν αἰδοίῃ παρακοίτι ### 15 νόσφιν ἄτερ φιλότητος ἐφιμέρου, οὐδέ οἱ ἦεν ### 16 πρὶν λεχέων ἐπιβῆναι ἐυσφύρου Ἠλεκτρυώνης ### 17 πρίν γε φόνον τείσαιτο κασιγνήτων μεγαθύμων ### 18 ἧς ἀλόχου, μαλερῷ δὲ καταφλέξαι πυρὶ κώμας ### 19 ἀνδρῶν ἡρώων Ταφίων ἰδὲ Τηλεβοάων. ### 20 τὼς γάρ οἱ διέκειτο, θεοὶ δ’ ἐπὶ μάρτυροι ἦσαν· ### 21 τῶν ὅ γ’ ὀπίζετο μῆνιν, ἐπείγετο δ’ ὅττι τάχιστα ### 22 ἐκτελέσαι μέγα ἔργον, ὅ οἱ Διόθεν θέμις ἦεν. ### 23 τῷ δ’ ἅμα ἱέμενοι πολέμοιό τε φυλόπιδός τε ### 24 Βοιωτοὶ πλήξιπποι, ὑπὲρ σακέων πνείοντες, ### 25 Λοκροί τ’ ἀγχέμαχοι καὶ Φωκῆες μεγάθυμοι ### 26 ἕσποντ’· ἦρχε δὲ τοῖσιν ἐὺς πάις Ἀλκαίοιο ### 27 κυδιόων λαοῖσι. πατὴρ δ’ ἀνδρῶν τε θεῶν τε ### 28 ἄλλην μῆτιν ὕφαινε μετὰ φρεσίν, ὥς ῥα θεοῖσιν ### 29 ἀνδράσι τ’ ἀλφηστῇσιν ἀρῆς ἀλκτῆρα φυτεύσαι. ### 30 ὦρτο δ’ ἀπ’ Οὐλύμποιο δόλον φρεσὶ βυσσοδομεύων, ### 31 ἱμείρων φιλότητος ἐυζώνοιο γυναικός, ### 32 ἐννύχιος· τάχα δ’ ἷξε Τυφαόνιον· τόθεν αὖτις ### 33 Φίκιον ἀκρότατον προσεβήσατο μητίετα Ζεύς. ### 34 ἔνθα καθεζόμενος φρεσὶ μήδετο θέσκελα ἔργα· ### 35 αὐτῇ μὲν γὰρ νυκτὶ τανισφύρου Ἠλεκτρυώνης ### 36 εὐνῇ καὶ φιλότητι μίγη, τέλεσεν δ’ ἄρ’ ἐέλδωρ· ### 37 αὐτῇ δ’ Ἀμφιτρύων λαοσσόος, ἀγλαὸς ἥρως, ### 38 ἐκτελέσας μέγα ἔργον ἀφίκετο ὅνδε δόμονδε, ### 39 οὐδ’ ὅ γε πρὶν δμῶας καὶ ποιμένας ἀγροιώτας ### 40 ὦρτ’ ἰέναι, πρίν γ’ ἧς ἀλόχου ἐπιβήμεναι εὐνῆς· ### 41 τοῖος γὰρ κραδίην πόθος αἴνυτο ποιμένα λαῶν. ### 42 [ὡς δ’ ὅτ’ ἀνὴρ ἀσπαστὸν ὑπεκπροφύγῃ κακότητα ### 43 νούσου ὑπ’ ἀργαλέης ἢ καὶ κρατεροῦ ὑπὸ δεσμοῦ, ### 44 ὥς ῥα τότ’ Ἀμφιτρύων χαλεπὸν πόνον ἐκτολυπεύσας ### 45 ἀσπασίως τε φίλως τε ἑὸν δόμον εἰσαφίκανεν.] ### 46 παννύχιος δ’ ἄρ’ ἔλεκτο σὺν αἰδοίῃ παρακοίτι ### 47 τερπόμενος δώροισι πολυχρύσου Ἀφροδίτης. ### 48 ἣ δὲ θεῷ δμηθεῖσα καὶ ἀνέρι πολλὸν ἀρίστῳ ### 49 Θήβῃ ἐν ἑπταπύλῳ διδυμάονε γείνατο παῖδε, ### 50 οὐκέθ’ ὁμὰ φρονέοντε· κασιγνήτω γε μὲν ἤστην· ### 51 τὸν μὲν χειρότερον, τὸν δ’ αὖ μέγ’ ἀμείνονα φῶτα ### 52 δεινόν τε κρατερόν τε, βίην Ἡρακληείην, ### 53 τὸν μὲν ὑποδμηθεῖσα κελαινεφέι Κρονίωνι, ### 54 αὐτὰρ Ἰφικλῆα δορυσσόῳ Ἀμφιτρύωνι· ### 55 κεκριμένην γενεήν, τὸν μὲν βροτῷ ἀνδρὶ μιγεῖσα, ### 56 τὸν δὲ Διὶ Κρονίωνι, θεῶν σημάντορι πάντων. ### 57 Ὃς καὶ Κύκνον ἔπεφνεν, Ἀρητιάδην μεγάθυμον. ### 58 εὗρε γὰρ ἐν τεμένει ἑκατηβόλου Ἀπόλλωνος ### 59 αὐτὸν καὶ πατέρα ὃν Ἄρη’, ἄατον πολέμοιο, ### 60 τεύχεσι λαμπομένους σέλας ὣς πυρὸς αἰθομένοιο, ### 61 ἑσταότ’ ἐν δίφρῳ· χθόνα δ’ ἔκτυπον ὠκέες ἵπποι ### 62 νύσσοντες χηλῇσι, κόνις δέ σφ’ ἀμφιδεδήει ### 63 κοπτομένη πλεκτοῖσιν ὑφ’ ἅρμασι καὶ ποσὶν ἵππων· ### 64 ἅρματα δ’ εὐποίητα καὶ ἄντυγες ἀμφαράβιζον ### 65 ἵππων ἱεμένων. κεχάρητο δὲ Κύκνος ἀμύμων, ### 66 ἐλπόμενος Διὸς υἱὸν ἀρήιον ἡνίοχόν τε ### 67 χαλκῷ δῃώσειν καὶ ἀπὸ κλυτὰ τεύχεα δύσειν. ### 68 ἀλλά οἱ εὐχωλέων οὐκ ἔκλυε Φοῖβος Ἀπόλλων· ### 69 αὐτὸς γάρ οἱ ἐπῶρσε βίην Ἡρακληείην. ### 70 πᾶν δ’ ἄλσος καὶ βωμὸς Ἀπόλλωνος Παγασαίου ### 71 λάμπεν ὑπαὶ δεινοῖο θεοῦ τευχέων τε καὶ αὐτοῦ, ### 72 πῦρ δ’ ὣς ὀφθαλμῶν ἀπελάμπετο. τίς κεν ἐκείνου ### 73 ἔτλη θνητὸς ἐὼν κατεναντίον ὁρμηθῆναι ### 74 πλήν γ’ Ἡρακλῆος καὶ κυδαλίμου Ἰολάου; ### 75 [κείνων γὰρ μεγάλη τε βίη καὶ χεῖρες ἄαπτοι ### 76 ἐξ ὤμων ἐπέφυκον ἐπὶ στιβαροῖσι μέλεσσιν.] ### 77 ὅς ῥα τόθ’ ἡνίοχον προσέφη κρατερὸν Ἰόλαον· ### 78 [para]“Ἥρως ὦ Ἰόλαε, βροτῶν πολὺ φίλτατε πάντων, ### 79 ἦ τι μέγ’ ἀθανάτους μάκαρας, τοὶ Ὄλυμπον ἔχουσιν, ### 80 ἤλιτεν Ἀμφιτρύων, ὅτ’ ἐυστέφανον ποτὶ Θήβην ### 81 ἦλθε λιπὼν Τίρυνθον, ἐυκτίμενον πτολίεθρον, ### 82 κτείνας Ἠλεκτρύωνα βοῶν ἕνεκ’ εὐρυμετώπων· ### 83 ἵκετο δ’ ἐς Κρείοντα καὶ Ἡνιόχην τανύπεπλον, ### 84 οἵ ῥά μιν ἠσπάζοντο καὶ ἄρματα πάντα παρεῖχον, ### 85 ἣ δίκη ἔσθ’ ἱκέτῃσι, τίον δ’ ἄρα κηρόθι μᾶλλον. ### 86 ζῶε δ’ ἀγαλλόμενος σὺν ἐυσφύρῳ Ἠλεκτρυώνῃ, ### 87 ᾗ ἀλόχῳ· τάχα δ’ ἄμμες ἐπιπλομένων ἐνιαυτῶν ### 88 γεινόμεθ’ οὔτε φυὴν ἐναλίγκιοι οὔτε νόημα, ### 89 σός τε πατὴρ καὶ ἐγώ· τοῦ μὲν φρένας ἐξέλετο Ζεύς, ### 90 ὃς προλιπὼν σφέτερόν τε δόμον σφετέρους τε τοκῆας ### 91 ᾤχετο τιμήσων ἀλιτήμενον Εὐρυσθῆα, ### 92 σχέτλιος· ἦ που πολλὰ μετεστοναχίζετ’ ὀπίσσω ### 93 ἣν ἄτην ὀχέων· ἣ δ’ οὐ παλινάγρετός ἐστιν. ### 94 αὐτὰρ ἐμοὶ δαίμων χαλεποὺς ἐπετέλλετ’ ἀέθλους. ### 95 ὦ φίλος, ἀλλὰ σὺ θᾶσσον ἔχ’ ἡνία φοινικόεντα ### 96 ἵππων ὠκυπόδων· μέγα δὲ φρεσὶ θάρσος ἀέξων ### 97 ἰθὺς ἔχειν θοὸν ἅρμα καὶ ὠκυπόδων σθένος ἵππων, ### 98 μηδὲν ὑποδδείσας κτύπον Ἄρεος ἀνδροφόνοιο, ### 99 ὃς νῦν κεκληγὼς περιμαίνεται ἱερὸν ἄλσος ### 100 Φοίβου Ἀπόλλωνος, ἑκατηβελέταο ἄνακτος· ### 101 ἦ μὴν καὶ κράτερός περ ἐὼν ἄαται πολέμοιο.” ### 102 [para]Τὸν δ’ αὖτε προσέειπεν ἀμώμητος Ἰόλαος· ### 103 “ἠθεῖ’, ἦ μάλα δή τι πατὴρ ἀνδρῶν τε θεῶν τε ### 104 τιμᾷ σὴν κεφαλὴν καὶ ταύρεος Ἐννοσίγαιος, ### 105 ὃς Θήβης κρήδεμνον ἔχει ῥύεταί τε πόληα, ### 106 οἷον δὴ καὶ τόνδε βροτὸν κρατερόν τε μέγαν τε ### 107 σὰς ἐς χεῖρας ἄγουσιν, ἵνα κλέος ἐσθλὸν ἄρηαι. ### 108 ἀλλ’ ἄγε δύσεο τεύχε’ ἀρήια, ὄφρα τάχιστα ### 109 δίφρους ἐμπελάσαντες Ἄρηός θ’ ἡμέτερόν τε ### 110 μαρνώμεσθ’, ἐπεὶ οὔ τοι ἀτάρβητον Διὸς υἱὸν ### 111 οὐδ’ Ἰφικλεΐδην δειδίξεται, ἀλλά μιν οἴω ### 112 φεύξεσθαι δύο παῖδας ἀμύμονος Ἀλκεΐδαο, ### 113 οἳ δή σφι σχεδόν εἰσι, λιλαιόμενοι πολέμοιο ### 114 φυλόπιδα στήσειν, τά σφιν πολὺ φίλτερα θοίνης.” ### 115 Ὣς φάτο· μείδησεν δὲ βίη Ἡρακληείη ### 116 θυμῷ γηθήσας· μάλα γάρ νύ οἱ ἄρμενα εἶπεν· ### 117 καί μιν ἀμειβόμενος ἔπεα πτερόεντα προσηύδα· ### 118 “ἥρως ὦ Ἰόλαε, διοτρεφές, οὐκέτι τηλοῦ ### 119 ὑσμίνη τρηχεῖα· σὺ δ’ ὡς πάρος ἦσθα δαΐφρων, ### 120 ὣς καὶ νῦν μέγαν ἵππον Ἀρίονα κυανοχαίτην ### 121 πάντη ἀναστρωφᾶν καὶ ἀρηγέμεν ὥς κε δύνηαι.” ### 122 [para]Ὣς εἰπὼν κνημῖδας ὀρειχάλκοιο φαεινοῦ, ### 123 Ἡφαίστου κλυτὰ δῶρα, περὶ κνήμῃσιν ἔθηκε. ### 124 δεύτερον αὖ θώρηκα περὶ στήθεσσιν ἔδυνε ### 125 καλὸν χρύσειον πολυδαίδαλον, ὅν οἱ ἔδωκε ### 126 Παλλὰς Ἀθηναίη, κούρη Διός, ὁππότ’ ἔμελλε ### 127 τὸ πρῶτον στονόεντας ἐφορμήσεσθαι ἀέθλους. ### 128 θήκατο δ’ ἀμφ’ ὤμοισιν ἀρῆς ἀλκτῆρα σίδηρον, ### 129 δεινὸς ἀνήρ· κοίλην δὲ περὶ στήθεσσι φαρέτρην ### 130 κάββαλεν ἐξόπιθεν· πολλοὶ δ’ ἔντοσθεν ὀιστοὶ ### 131 ῥιγηλοί, θανάτοιο λαθιφθόγγοιο δοτῆρες· ### 132 πρόσθεν μὲν θάνατόν τ’ εἶχον καὶ δάκρυσι μῦρον, ### 133 μέσσοι δὲ ξεστοί, περιμήκεες, αὐτὰρ ὄπισθε ### 134 μόρφνοιο φλεγύαο καλυπτόμενοι πτερύγεσσιν. ### 135 εἵλετο δ’ ὄβριμον ἔγχος, ἀκαχμένον αἴθοπι χαλκῷ. ### 136 κρατὶ δ’ ἐπ’ ἰφθίμῳ κυνέην ἐύτυκτον ἔθηκε, ### 137 δαιδαλέην, ἀδάμαντος, ἐπὶ κροτάφοις ἀραρυῖαν, ### 138 ἥ τ’ εἴρυτο κάρη Ἡρακλῆος θείοιο. ### 139 [para]Χερσί γε μὴν σάκος εἷλε παναίολον, οὐδέ τις αὐτὸ ### 140 οὔτ’ ἔρρηξε βαλὼν οὔτ’ ἔθλασε, θαῦμα ἰδέσθαι. ### 141 πᾶν μὲν γὰρ κύκλῳ τιτάνῳ λευκῷ τ’ ἐλέφαντι ### 142 ἠλέκτρῳ θ’ ὑπολαμπὲς ἔην χρυσῷ τε φαεινῷ ### 143 [λαμπόμενον, κυάνου δὲ διὰ πτύχες ἠλήλαντο]. ### 144 ἐν μέσσῳ δ’ ἀδάμαντος ἔην Φόβος οὔ τι φατειός, ### 145 ἔμπαλιν ὄσσοισιν πυρὶ λαμπομένοισι δεδορκώς· ### 146 τοῦ καὶ ὀδόντων μὲν πλῆτο στόμα λευκαθεόντων, ### 147 δεινῶν, ἀπλήτων, ἐπὶ δὲ βλοσυροῖο μετώπου ### 148 δεινὴ Ἔρις πεπότητο κορύσσουσα κλόνον ἀνδρῶν, ### 149 σχετλίη, ἥ ῥα νόον τε καὶ ἐκ φρένας εἵλετο φωτῶν ### 150 οἵτινες ἀντιβίην πόλεμον Διὸς υἷι φέροιεν. ### 151 [τῶν καὶ ψυχαὶ μὲν χθόνα δύνους’ Ἄιδος εἴσω ### 152 αὐτῶν, ὀστέα δέ σφι περὶ ῥινοῖο σαπείσης ### 153 Σειρίου ἀζαλέοιο κελαινῇ πύθεται αἴῃ.] ### 154 [para]Ἐν δὲ Προΐωξίς τε Παλίωξίς τε τέτυκτο, ### 155 ἐν δ’ Ὅμαδός τε Φόνος τ’ Ἀνδροκτασίη τε δεδήει, ### 156 [ἐν δ’ Ἔρις, ἐν δὲ Κυδοιμὸς ἐθύνεον, ἐν δ’ ὀλοὴ Κὴρ ### 157 ἄλλον ζωὸν ἔχουσα νεούτατον, ἄλλον ἄουτον, ### 158 ἄλλον τεθνηῶτα κατὰ μόθον ἕλκε ποδοῖιν· ### 159 εἷμα δ’ ἔχ’ ἀμφ’ ὤμοισι δαφοινεὸν αἵματι φωτῶν, ### 160 δεινὸν δερκομένη καναχῇσί τε βεβρυχυῖα.] ### 161 [para]Ἐν δ’ ὀφίων κεφαλαὶ δεινῶν ἔσαν, οὔ τι φατειῶν, ### 162 δώδεκα, ταὶ φοβέεσκον ἐπὶ χθονὶ φῦλ’ ἀνθρώπων ### 163 [οἵτινες ἀντιβίην πόλεμον Διὸς υἷι φέροιεν]. ### 164 τῶν καὶ ὀδόντων μὲν καναχὴ πέλεν, εὖτε μάχοιτο ### 165 Ἀμφιτρυωνιάδης· τὰ δ’ ἐδαίετο θαυματὰ ἔργα· ### 166 στίγματα δ’ ὣς ἐπέφαντο ἰδεῖν δεινοῖσι δράκουσι· ### 167 κυάνεοι κατὰ νῶτα, μελάνθησαν δὲ γένεια. ### 168 [para]Ἐν δὲ συῶν ἀγέλαι χλούνων ἔσαν ἠδὲ λεόντων ### 169 ἐς σφέας δερκομένων, κοτεόντων θ’ ἱεμένων τε. ### 170 τῶν καὶ ὁμιληδὸν στίχες ἤισαν, οὐδέ νυ τώ γε ### 171 οὐδέτεροι τρεέτην, φρῖσσόν γε μὲν αὐχένας ἄμφω. ### 172 ἤδη γάρ σφιν ἔκειτο μέγας λῖς, ἀμφὶ δὲ κάπροι ### 173 δοιοί, ἀπουράμενοι ψυχάς· κατὰ δέ σφι κελαινὸν ### 174 αἷμ’ ἀπελείβετ’ ἔραζ’· οἳ δ’ αὐχένας ἐξεριπόντες ### 175 κείατο τεθνηῶτες ὑπὸ βλοσυροῖσι λέουσιν· ### 176 τοὶ δ’ ἔτι μᾶλλον ἐγειρέσθην κοτέοντε μάχεσθαι, ### 177 ἀμφότεροι, χλοῦναί τε σύες χαροποί τε λέοντες. ### 178 [para]Ἐν δ’ ἦν ὑσμίνη Λαπιθάων αἰχμητάων ### 179 Καινέα τ’ ἀμφὶ ἄνακτα Δρύαντά τε Πειρίθοόν τε ### 180 Ὁπλέα τ’ Ἐξάδιόν τε Φάληρόν τε Πρόλοχόν τε ### 181 Μόψον τ’ Ἀμπυκίδην, Τιταρήσιον, ὄζον Ἄρηος ### 182 Θησέα τ’ Αἰγεΐδην, ἐπιείκελον ἀθανάτοισιν· ### 183 ἀργύρεοι, χρύσεια περὶ χροῒ τεύχε’ ἔχοντες. ### 184 Κένταυροι δ’ ἑτέρωθεν ἐναντίοι ἠγερέθοντο ### 185 ἀμφὶ μέγαν Πετραῖον ἰδ’ Ἄσβολον οἰωνιστὴν ### 186 Ἄρκτον τ’ Οὔρειόν τε μελαγχαίτην τε Μίμαντα ### 187 καὶ δύο Πευκεΐδας, Περιμήδεά τε Δρύαλόν τε, ### 188 ἀργύρεοι, χρυσέας ἐλάτας ἐν χερσὶν ἔχοντες. ### 189 καί τε συναΐγδην ὡς εἰ ζωοί περ ἐόντες ### 190 ἔγχεσιν ἠδ’ ἐλάτῃς αὐτοσχεδὸν ὠριγνῶντο. ### 191 [para]Ἐν δ’ Ἄρεος βλοσυροῖο ποδώκεες ἕστασαν ἵπποι ### 192 χρύσεοι, ἐν δὲ καὶ αὐτὸς ἐναρσφόρος οὔλιος Ἄρης, ### 193 αἰχμὴν ἐν χείρεσσιν ἔχων, πρυλέεσσι κελεύων, ### 194 αἵματι φοινικόεις ὡς εἰ ζωοὺς ἐναρίζων, ### 195 δίφρου ἐπεμβεβαώς· παρὰ δὲ Δεῖμός τε Φόβος τε ### 196 ἕστασαν ἱέμενοι πόλεμον καταδύμεναι ἀνδρῶν. ### 197 [para]Ἐν δὲ Διὸς θυγάτηρ ἀγελείη Τριτογένεια, ### 198 τῇ ἰκέλη ὡς εἴ τε μάχην ἐθέλουσα κορύσσειν, ### 199 ἔγχος ἔχους’ ἐν χειρὶ χρυσέην τε τρυφάλειαν ### 200 αἰγίδα τ’ ἀμφ’ ὤμοις· ἐπὶ δ’ ᾤχετο φύλοπιν αἰνήν. ### 201 [para]Ἐν δ’ ἦν ἀθανάτων ἱερὸς χορός· ἐν δ’ ἄρα μέσσῳ ### 202 ἱμερόεν κιθάριζε Διὸς καὶ Λητοῦς υἱὸς ### 203 χρυσείῃ φόρμιγγι· [θεῶν δ’ ἕδος ἁγνὸς Ὄλυμπος· ### 204 ἐν δ’ ἀγορή, περὶ δ’ ὄλβος ἀπείριτος ἐστεφάνωτο ### 205 ἀθανάτων ἐν ἀγῶνι·] θεαὶ δ’ ἐξῆρχον ἀοιδῆς ### 206 Μοῦσαι Πιερίδες, λιγὺ μελπομένῃς ἐικυῖαι. ### 207 [para]Ἐν δὲ λιμὴν εὔορμος ἀμαιμακέτοιο θαλάσσης ### 208 κυκλοτερὴς ἐτέτυκτο πανέφθου κασσιτέροιο ### 209 κλυζομένῳ ἴκελος· [πολλοί γε μὲν ἂμ μέσον αὐτοῦ ### 210 δελφῖνες τῇ καὶ τῇ ἐθύνεον ἰχθυάοντες ### 211 νηχομένοις ἴκελοι·] δοιὼ δ’ ἀναφυσιόωντες ### 212 ἀργύρεοι δελφῖνες ἐφοίβεον ἔλλοπας ἰχθῦς. ### 213 τῶν δ’ ὕπο χάλκειοι τρέον ἰχθύες· αὐτὰρ ἐπ’ ἀκτῆς ### 214 ἧστο ἀνὴρ ἁλιεὺς δεδοκημένος, εἶχε δὲ χερσὶν ### 215 ἰχθύσιν ἀμφίβληστρον ἀπορρίψοντι ἐοικώς. ### 216 Ἐν δ’ ἦν ἠυκόμου Δανάης τέκος, ἱππότα Περσεύς, ### 217 οὔτ’ ἄρ’ ἐπιψαύων σάκεος ποσὶν οὔθ’ ἑκὰς αὐτοῦ, ### 218 θαῦμα μέγα φράσσασθ’, ἐπεὶ οὐδαμῇ ἐστήρικτο. ### 219 τὼς γάρ μιν παλάμαις τεῦξεν κλυτὸς Ἀμφιγυήεις, ### 220 χρύσεον· ἀμφὶ δὲ ποσσὶν ἔχεν πτερόεντα πέδιλα· ### 221 ὤμοισιν δέ μιν ἀμφὶ μελάνδετον ἆορ ἔκειτο ### 222 χαλκέου ἐκ τελαμῶνος· ὃ δ’ ὥς τε νόημ’ ἐποτᾶτο· ### 223 πᾶν δὲ μετάφρενον εἶχε κάρη δεινοῖο πελώρου, ### 224 Γοργοῦς· ἀμφὶ δέ μιν κίβισις θέε, θαῦμα ἰδέσθαι, ### 225 ἀργυρέη· θύσανοι δὲ κατῃωρεῦντο φαεινοὶ ### 226 χρύσειοι· δεινὴ δὲ περὶ κροτάφοισι ἄνακτος ### 227 κεῖτ’ Ἄιδος κυνέη νυκτὸς ζόφον αἰνὸν ἔχουσα. ### 228 αὐτὸς δὲ σπεύδοντι καὶ ἐρρίγοντι ἐοικὼς ### 229 Περσεὺς Δαναΐδης ἐτιταίνετο· ταὶ δὲ μετ’ αὐτὸν ### 230 Γοργόνες ἄπλητοί τε καὶ οὐ φαταὶ ἐρρώοντο ### 231 ἱέμεναι μαπέειν· ἐπὶ δὲ χλωροῦ ἀδάμαντος ### 232 βαινουσέων ἰάχεσκε σάκος μεγάλῳ ὀρυμαγδῷ ### 233 ὀξέα καὶ λιγέως· ἐπὶ δὲ ζώνῃσι δράκοντε ### 234 δοιὼ ἀπῃωρεῦντ’ ἐπικυρτώοντε κάρηνα· ### 235 λίχμαζον δ’ ἄρα τώ γε, μένει δ’ ἐχάρασσον ὀδόντας ### 236 ἄγρια δερκομένω· ἐπὶ δὲ δεινοῖσι καρήνοις ### 237 Γοργείοις ἐδονεῖτο μέγας φόβος. οἳ δ’ ὑπὲρ αὐτέων ### 238 ἄνδρες ἐμαρνάσθην πολεμήια τεύχε’ ἔχοντες, ### 239 τοὶ μὲν ὑπὲρ σφετέρης πόλιος σφετέρων τε τοκήων ### 240 λοιγὸν ἀμύνοντες, τοὶ δὲ πραθέειν μεμαῶτες. ### 241 πολλοὶ μὲν κέατο, πλέονες δ’ ἔτι δῆριν ἔχοντες ### 242 μάρνανθ’. αἱ δὲ γυναῖκες ἐυδμήτων ἐπὶ πύργων ### 243 χαλκέων ὀξὺ βόων, κατὰ δ’ ἐδρύπτοντο παρειάς, ### 244 ζωῇσιν ἴκελαι, ἔργα κλυτοῦ Ἡφαίστοιο. ### 245 ἄνδρες δ’ οἳ πρεσβῆες ἔσαν γῆράς τε μέμαρπεν ### 246 ἀθρόοι ἔκτοσθεν πυλέων ἔσαν, ἂν δὲ θεοῖσι ### 247 χεῖρας ἔχον μακάρεσσι, περὶ σφετέροισι τέκεσσι ### 248 δειδιότες· τοὶ δ’ αὖτε μάχην ἔχον. αἳ δὲ μετ’ αὐτοὺς ### 249 Κῆρες κυάνεαι, λευκοὺς ἀραβεῦσαι ὀδόντας, ### 250 δεινωποὶ βλοσυροί τε δαφοινοί τ’ ἄπλητοί τε ### 251 δῆριν ἔχον περὶ πιπτόντων· πᾶσαι δ’ ἄρ’ ἵεντο ### 252 αἷμα μέλαν πιέειν· ὃν δὲ πρῶτον μεμάποιεν ### 253 κείμενον ἢ πίπτοντα νεούτατον, ἀμφὶ μὲν αὐτῷ ### 254 βάλλ〈ον ὁμῶσ〉 ὄνυχας μεγάλους, ψυχὴ δὲ [Ἄιδόσδε] κατῇεν ### 255 Τάρταρον ἐς κρυόενθ’· αἳ δὲ φρένας εὖτ’ ἀρέσαντο ### 256 αἵματος ἀνδρομέου, τὸν μὲν ῥίπτασκον ὀπίσσω, ### 257 ἂψ δ’ ὅμαδον καὶ μῶλον ἐθύνεον αὖτις ἰοῦσαι. ### 258 [Κλωθὼ καὶ Λάχεσίς σφιν ἐφέστασαν· ἣ μὲν ὑφήσσων ### 259 Ἄτροπος οὔ τι πέλεν μεγάλη θεός, ἀλλ’ ἄρα ἥ γε ### 260 τῶν γε μὲν ἀλλάων προφερής τ’ ἦν πρεσβυτάτη τε. ### 261 πᾶσαι δ’ ἀμφ’ ἑνὶ φωτὶ μάχην δριμεῖαν ἔθεντο· ### 262 δεινὰ δ’ ἐς ἀλλήλας δράκον ὄμμασι θυμήνασαι, ### 263 ἐν δ’ ὄνυχας χεῖράς τε θρασείας ἰσώσαντο.] ### 264 πὰρ δ’ Ἀχλὺς εἱστήκει ἐπισμυγερή τε καὶ αἰνή, ### 265 χλωρὴ ἀυσταλέη λιμῷ καταπεπτηυῖα, ### 266 γουνοπαχής, μακροὶ δ’ ὄνυχες χείρεσσιν ὑπῆσαν· ### 267 τῆς ἐκ μὲν ῥινῶν μύξαι ῥέον, ἐκ δὲ παρειῶν ### 268 αἷμ’ ἀπελείβετ’ ἔραζ’· ἣ δ’ ἄπλητον σεσαρυῖα ### 269 εἱστήκει, πολλὴ δὲ κόνις κατενήνοθεν ὤμους, ### 270 δάκρυσι μυδαλέη. παρὰ δ’ εὔπυργος πόλις ἀνδρῶν, ### 271 χρύσειαι δέ μιν εἶχον ὑπερθυρίοις ἀραρυῖαι ### 272 ἑπτὰ πύλαι· τοὶ δ’ ἄνδρες ἐν ἀγλαΐαις τε χοροῖς τε ### 273 τέρψιν ἔχον· τοὶ μὲν γὰρ ἐυσσώτρου ἐπ’ ἀπήνης ### 274 ἤγοντ’ ἀνδρὶ γυναῖκα, πολὺς δ’ ὑμέναιος ὀρώρει· ### 275 τῆλε δ’ ἀπ’ αἰθομένων δαΐδων σέλας εἰλύφαζε ### 276 χερσὶν ἐνὶ δμῳῶν· ταὶ δ’ ἀγλαΐῃ τεθαλυῖαι ### 277 πρόσθ’ ἔκιον, τῇσιν δὲ χοροὶ παίζοντες ἕποντο· ### 278 τοὶ μὲν ὑπὸ λιγυρῶν συρίγγων ἵεσαν αὐδὴν ### 279 ἐξ ἁπαλῶν στομάτων, περὶ δέ σφισιν ἄγνυτο ἠχώ· ### 280 αἳ δ’ ὑπὸ φορμίγγων ἄναγον χορὸν ἱμερόεντα. ### 281 [ἔνθεν δ’ αὖθ’ ἑτέρωθε νέοι κώμαζον ὑπ’ αὐλοῦ.] ### 282 τοί γε μὲν αὖ παίζοντες ὑπ’ ὀρχηθμῷ καὶ ἀοιδῇ ### 283 [τοί γε μὲν αὖ γελόωντες ὑπ’ αὐλητῆρι ἕκαστος] ### 284 πρόσθ’ ἔκιον· πᾶσαν δὲ πόλιν θαλίαι τε χοροί τε ### 285 ἀγλαΐαι τ’ εἶχον. τοὶ δ’ αὖ προπάροιθε πόληος ### 286 νῶθ’ ἵππων ἐπιβάντες ἐθύνεον. οἱ δ’ ἀροτῆρες ### 287 ἤρεικον χθόνα δῖαν, ἐπιστολάδην δὲ χιτῶνας ### 288 ἐστάλατ’. αὐτὰρ ἔην βαθὺ λήιον· οἵ γε μὲν ἤμων ### 289 αἰχμῇς ὀξείῃσι κορωνιόωντα πέτηλα ### 290 βριθόμενα σταχύων, ὡς εἰ Δημήτερος ἀκτήν· ### 291 οἳ δ’ ἄρ’ ἐν ἐλλεδανοῖσι δέον καὶ ἔπιτνον ἀλωῇ· ### 292 οἳ δ’ ἐτρύγων οἴνας, δρεπάνας ἐν χερσὶν ἔχοντες· ### 293 [οἳ δ’ αὖτ’ ἐς ταλάρους ἐφόρευν ὑπὸ τρυγητήρων ### 294 λευκοὺς καὶ μέλανας βότρυας μεγάλων ἀπὸ ὄρχων, ### 295 βριθομένων φύλλοισι καὶ ἀργυρέῃς ἑλίκεσσιν.] ### 296 οἳ δ’ αὖτ’ ἐς ταλάρους ἐφόρευν. παρὰ δέ σφισιν ὄρχος ### 297 χρύσεος ἦν, κλυτὰ ἔργα περίφρονος Ἡφαίστοιο, ### 298 [τοί γε μὲν αὖ παίζοντες ὑπ’ αὐλητῆρι ἕκαστος] ### 299 [σειόμενος φύλλοισι καὶ ἀργυρέῃσι κάμαξι,] ### 300 βριθόμενος σταφυλῇσι· μελάνθησάν γε μὲν αἵδε. ### 301 οἵ γε μὲν ἐτράπεον, τοὶ δ’ ἤρυον. οἳ δὲ μάχοντο ### 302 πύξ τε καὶ ἑλκηδόν· τοὶ δ’ ὠκύποδας λαγὸς ᾕρευν ### 303 ἄνδρες θηρευταί, καὶ καρχαρόδοντε κύνε πρό, ### 304 ἱέμενοι μαπέειν, οἳ δ’ ἱέμενοι ὑπαλύξαι. ### 305 πὰρ δ’ αὐτοῖς ἱππῆες ἔχον πόνον, ἀμφὶ δ’ ἀέθλῳ ### 306 δῆριν ἔχον καὶ μόχθον· ἐυπλεκέων δ’ ἐπὶ δίφρων ### 307 ἡνίοχοι βεβαῶτες ἐφίεσαν ὠκέας ἵππους ### 308 ῥυτὰ χαλαίνοντες, τὰ δ’ ἐπικροτέοντα πέτοντο ### 309 ἅρματα κολλήεντ’, ἐπὶ δὲ πλῆμναι μέγ’ ἀύτευν. ### 310 οἳ μὲν ἄρ’ ἀίδιον εἶχον πόνον, οὐδέ ποτέ σφιν ### 311 νίκη ἐπηνύσθη, ἀλλ’ ἄκριτον εἶχον ἄεθλον. ### 312 τοῖσι δὲ καὶ προύκειτο μέγας τρίπος ἐντὸς ἀγῶνος, ### 313 χρύσειος, κλυτὰ ἔργα περίφρονος Ἡφαίστοιο. ### 314 [para]Ἀμφὶ δ’ ἴτυν ῥέεν Ὠκεανὸς πλήθοντι ἐοικώς, ### 315 πᾶν δὲ συνεῖχε σάκος πολυδαίδαλον· οἳ δὲ κατ’ αὐτὸν ### 316 κύκνοι ἀερσιπόται μεγάλ’ ἤπυον, οἵ ῥά τε πολλοὶ ### 317 νῆχον ἐπ’ ἄκρον ὕδωρ· παρὰ δ’ ἰχθύες ἐκλονέοντο· ### 318 θαῦμα ἰδεῖν καὶ Ζηνὶ βαρυκτύπῳ, οὗ διὰ βουλὰς ### 319 Ἥφαιστος ποίησε σάκος μέγα τε στιβαρόν τε, ### 320 ἀρσάμενος παλάμῃσι. τὸ μὲν Διὸς ἄλκιμος υἱὸς ### 321 πάλλεν ἐπικρατέως· ἐπὶ δ’ ἱππείου θόρε δίφρου, ### 322 εἴκελος ἀστεροπῇ πατρὸς Διὸς αἰγιόχοιο, ### 323 κοῦφα βιβάς· τῷ δ’ ἡνίοχος κρατερὸς Ἰόλαος ### 324 δίφρου ἐπεμβεβαὼς ἰθύνετο καμπύλον ἅρμα. ### 325 Ἀγχίμολον δέ σφ’ ἦλθε θεὰ γλαυκῶπις Ἀθήνη, ### 326 καί σφεας θαρσύνους’ ἔπεα πτερόεντα προσηύδα· ### 327 “Χαίρετε, Λυγκῆος γενεὴ τηλεκλειτοῖο· ### 328 νῦν δὴ Ζεὺς κράτος ὔμμι διδοῖ μακάρεσσιν ἀνάσσων ### 329 Κύκνον τ’ ἐξεναρεῖν καὶ ἀπὸ κλυτὰ τεύχεα δῦσαι. ### 330 ἄλλο δέ τοί τι ἔπος ἐρέω, μέγα φέρτατε λαῶν· ### 331 εὖτ’ ἂν δὴ Κύκνον γλυκερῆς αἰῶνος ἀμέρσῃς, ### 332 τὸν μὲν ἔπειτ’ αὐτοῦ λιπέειν καὶ τεύχεα τοῖο, ### 333 αὐτὸς δὲ βροτολοιγὸν Ἄρη’ ἐπιόντα δοκεύσας, ### 334 ἔνθα κε γυμνωθέντα σάκευς ὕπο δαιδαλέοιο ### 335 ὀφθαλμοῖσιν ἴδῃς, ἔνθ’ οὐτάμεν ὀξέι χαλκῷ· ### 336 ἂψ δ’ ἀναχάσσασθαι, ἐπεὶ οὔ νύ τοι αἴσιμόν ἐστιν ### 337 οὔθ’ ἵππους ἑλέειν οὔτε κλυτὰ τεύχεα τοῖο.” ### 338 Ὣς εἰποῦς’ ἐς δίφρον ἐβήσατο δῖα θεάων, ### 339 νίκην ἀθανάτῃς χερσὶν καὶ κῦδος ἔχουσα, ### 340 ἐσσυμένως. τότε δή ῥα διόγνητος Ἰόλαος ### 341 σμερδαλέον ἵπποισιν ἐκέκλετο· τοὶ δ’ ὑπ’ ὀμοκλῆς ### 342 ῥίμφ’ ἔφερον θοὸν ἅρμα κονίοντες πεδίοιο· ### 343 ἐν γάρ σφιν μένος ἧκε θεὰ γλαυκῶπις Ἀθήνη ### 344 αἰγίδ’ ἀνασσείσασα· περιστενάχησε δὲ γαῖα. ### 345 τοὶ δ’ ἄμυδις προγένοντ’ ἴκελοι πυρὶ ἠὲ θυέλλῃ, ### 346 Κύκνος θ’ ἱππόδαμος καὶ Ἄρης ἀκόρητος ἀυτῆς. ### 347 τῶν δ’ ἵπποι μὲν ἔπειθ’ ὑπεναντίοι ἀλλήλοισιν ### 348 ὀξεῖα χρέμισαν, περὶ δέ σφισιν ἄγνυτο ἠχώ. ### 349 τὸν πρότερος προσέειπε βίη Ἡρακληείη· ### 350 “Κύκνε πέπον, τί νυ νῶιν ἐπίσχετον ὠκέας ἵππους, ### 351 ἀνδράσιν οἵ τε πόνου καὶ ὀιζύος ἴδριές εἰμεν; ### 352 ἀλλὰ παρὲξ ἔχε δίφρον ἐύξοον ἠδὲ κελεύθου ### 353 εἶκε παρὲξ ἰέναι · Τρηχῖνάδε τοι παρελαύνω ### 354 ἐς Κήυκα ἄνακτα· ὃ γὰρ δυνάμει τε καὶ αἰδοῖ ### 355 Τρηχῖνος προβέβηκε. σὺ δ’ εὖ μάλα οἶσθα καὶ αὐτός· ### 356 τοῦ γὰρ ὀπυίεις παῖδα Θεμιστονόην κυανῶπιν. ### 357 ὦ πέπον, οὐ μὲν γάρ τοι Ἄρης θανάτοιο τελευτὴν ### 358 ἀρκέσει, εἰ δὴ νῶι συνοισόμεθα πτολεμίζειν. ### 359 ἤδη μέν τέ ἕ φημι καὶ ἄλλοτε πειρηθῆναι ### 360 ἔγχεος ἡμετέρου, ὅθ’ ὑπὲρ Πύλου ἠμαθόεντος ### 361 ἀντίος ἔστη ἐμεῖο, μάχης ἄμοτον μενεαίνων. ### 362 τρὶς μὲν ἐμῷ ὑπὸ δουρὶ τυπεὶς ἠρείσατο γαίῃ ### 363 οὐταμένου σάκεος, τὸ δὲ τέτρατον ἤλασα μηρὸν ### 364 παντὶ μένει σπεύδων, διὰ δὲ μέγα σαρκὸς ἄραξα· ### 365 πρηνὴς δ’ ἐν κονίῃσι χαμαὶ πέσεν ἔγχεος ὁρμῇ. ### 366 ἔνθα κε δὴ λωβητὸς ἐν ἀθανάτοισιν ἐτύχθη ### 367 χερσὶν ὕφ’ ἡμετέρῃσι λιπὼν ἔναρα βροτόεντα ...” [para]Ὣς ### 368 ἔφατ’· οὐδ’ ἄρα Κύκνος ἐυμμελίης ἐμενοίνα ### 369 τῷ ἐπιπειθόμενος ἐχέμεν ἐρυσάρματας ἵππους. ### 370 δὴ τότ’ ἀπ’ εὐπλεκέων δίφρων θόρον αἶψ’ ἐπὶ γαῖαν ### 371 παῖς τε Διὸς μεγάλου καὶ Ἐνυαλίοιο ἄνακτος· ### 372 ἡνίοχοι δ’ ἔμπλην ἔλασαν καλλίτριχας ἵππους. ### 373 τῶν δ’ ὑπὸ σευομένων κανάχιζε πός’ εὐρεῖα χθών ὡς ### 374 δ’ ὅτ’ ἀφ’ ὑψηλῆς κορυφῆς ὄρεος μεγάλοιο ### 375 πέτραι ἀποθρώσκωσιν, ἐπ’ ἀλλήλαις δὲ πέσωσι, ### 376 πολλαὶ δὲ δρῦς ὑψίκομοι, πολλαὶ δέ τε πεῦκαι ### 377 αἴγειροί τε τανύρριζοι ῥήγνυνται ὑπ’ αὐτέων ### 378 ῥίμφα κυλινδομένων, ἧος πεδίονδ’ ἀφίκωνται, ### 379 ὣς οἳ ἐπ’ ἀλλήλοισι πέσον μέγα κεκλήγοντες. ### 380 πᾶσα δὲ Μυρμιδόνων τε πόλις κλειτή τ’ Ἰαωλκὸς ### 381 Ἄρνη τ’ ἠδ’ Ἑλίκη Ἄνθειά τε ποιήεσσα ### 382 φωνῇ ὑπ’ ἀμφοτέρων μεγάλ’ ἴαχον· οἳ δ’ ἀλαλητῷ ### 383 θεσπεσίῳ σύνισαν· μέγα δ’ ἔκτυπε μητίετα Ζεύς, ### 384 [κὰδ δ’ ἄρ’ ἀπ’ οὐρανόθεν ψιάδας βάλεν αἱματοέσσας,] ### 385 σῆμα τιθεὶς πολέμοιο ἑῷ μεγαθαρσέι παιδί. ### 386 οἷος δ’ ἐν βήσσῃς ὄρεος χαλεπὸς προϊδέσθαι ### 387 κάπρος χαυλιόδων φρονέει [δὲ] θυμῷ μαχέσασθαι ### 388 ἀνδράσι θηρευτῇς, θήγει δέ τε λευκὸν ὀδόντα ### 389 δοχμωθείς, ἀφρὸς δὲ περὶ στόμα μαστιχόωντι ### 390 λείβεται, ὄσσε δέ οἱ πυρὶ λαμπετόωντι ἔικτον, ### 391 ὀρθὰς δ’ ἐν λοφιῇ φρίσσει τρίχας ἀμφί τε δειρήν· ### 392 τῷ ἴκελος Διὸς υἱὸς ἀφ’ ἱππείου θόρε δίφρου. ### 393 ἦμος δὲ χλοερῷ κυανόπτερος ἠχέτα τέττιξ ### 394 ὄζῳ ἐφεζόμενος θέρος ἀνθρώποισιν ἀείδειν ### 395 ἄρχεται, ᾧ τε πόσις καὶ βρῶσις θῆλυς ἐέρση, ### 396 καί τε πανημέριός τε καὶ ἠῷος χέει αὐδὴν ### 397 ἴδει ἐν αἰνοτάτῳ, ὅτε τε χρόα Σείριος ἄζει, ### 398 τῆμος δὴ [κέγχροισι πέρι γλῶχες τελέθουσι ### 399 τούς τε θέρει σπείρουσιν, ὅτ’ ὄμφακες αἰόλλονται, ### 400 οἷα Διώνυσος δῶκ’ ἀνδράσι χάρμα καὶ ἄχθος· ### 401 τὴν ὥρην] μάρναντο, πολὺς δ’ ὀρυμαγδὸς ὀρώρει. ### 402 ὡς δὲ λέοντε δύω ἀμφὶ κταμένης ἐλάφοιο ### 403 ἀλλήλοις κοτέοντες ἐπὶ σφέας ὁρμήσωσι, ### 404 δεινὴ δέ σφ’ ἰαχὴ ἄραβός θ’ ἅμα γίνετ’ ὀδόντων ... [οἳ ### 405 δ’ ὥς τ’ αἰγυπιοὶ γαμψώνυχες, ἀγκυλοχῆλαι, ### 406 πέτρῃ ἐφ’ ὑψηλῇ μεγάλα κλάζοντε μάχωνται ### 407 αἰγὸς ὀρεσσινόμου ἢ ἀγροτέρης ἐλάφοιο ### 408 πίονος, ἥν τ’ ἐδάμασσε βαλὼν αἰζήιος ἀνὴρ ### 409 ἰῷ ἀπὸ νευρῆς, αὐτὸς δ’ ἀπαλήσεται ἄλλῃ ### 410 χώρου ἄιδρις ἐών· οἳ δ’ ὀτραλέως ἐνόησαν, ### 411 ἐσσυμένως δέ οἱ ἀμφὶ μάχην δριμεῖαν ἔθεντο· ### 412 ὣς οἳ κεκλήγοντες ἐπ’ ἀλλήλοισιν ὄρουσαν.] ### 413 ἔνθ’ ἦ τοι Κύκνος μέν, ὑπερμενέος Διὸς υἱὸν ### 414 κτεινέμεναι μεμαώς, σάκει ἔμβαλε χάλκεον ἔγχος, ### 415 οὐδ’ ἔρρηξεν χαλκός, ἔρυτο δὲ δῶρα θεοῖο· ### 416 Ἀμφιτρυωνιάδης δέ, βίη Ἡρακληείη, ### 417 μεσσηγὺς κόρυθός τε καὶ ἀσπίδος ἔγχεϊ μακρῷ ### 418 αὐχένα γυμνωθέντα θοῶς ὑπένερθε γενείου ### 419 ἤλας’ ἐπικρατέως, ἀπὸ δ’ ἄμφω κέρσε τένοντε ### 420 ἀνδροφόνος μελίη· μέγα γὰρ σθένος ἔμπεσε φωτός. ### 421 ἤριπε δ’, ὡς ὅτε τις δρῦς ἤριπεν ἢ ὅτε πεύκη ### 422 ἠλίβατος, πληγεῖσα Διὸς ψολόεντι κεραυνῷ· ### 423 ὣς ἔριπ’, ἀμφὶ δέ οἱ βράχε τεύχεα ποικίλα χαλκῷ. ### 424 [para]Τὸν μὲν ἔπειτ’ εἴασε Διὸς ταλακάρδιος υἱός, ### 425 αὐτὸς δὲ βροτολοιγὸν Ἄρην προσιόντα δοκεύσας, ### 426 δεινὸν ὁρῶν ὄσσοισι, λέων ὣς σώματι κύρσας, ### 427 ὅς τε μάλ’ ἐνδυκέως ῥινὸν κρατεροῖς ὀνύχεσσι ### 428 σχίσσας ὅττι τάχιστα μελίφρονα θυμὸν ἀπηύρα· ### 429 ἐμ μένεος δ’ ἄρα τοῦ γε κελαινὸν πίμπλαται ἦτορ· ### 430 γλαυκιόων δ’ ὄσσοις δεινὸν πλευράς τε καὶ ὤμους ### 431 οὐρῇ μαστιόων ποσσὶν γλάφει, οὐδέ τις αὐτὸν ### 432 ἔτλη ἐς ἄντα ἰδὼν σχεδὸν ἐλθέμεν οὐδὲ μάχεσθαι· ### 433 τοῖος ἄρ’ Ἀμφιτρυωνιάδης, ἀκόρητος ἀυτῆς, ### 434 ἀντίος ἔστη Ἄρηος, ἐνὶ φρεσὶ θάρσος ἀέξων, ### 435 ἐσσυμένως· ὃ δέ οἱ σχεδὸν ἤλυθεν ἀχνύμενος κῆρ. ### 436 [ἀμφότεροι δ’ ἰάχοντες ἐπ’ ἀλλήλοισιν ὄρουσαν.] ### 437 ὡς δ’ ὅτ’ ἀπὸ μεγάλου πέτρη πρηῶνος ὀρούσῃ, ### 438 μακρὰ δ’ ἐπιθρώσκουσα κυλίνδεται, ἣ δέ τε ἠχῇ ### 439 ἔρχεται ἐμμεμαυῖα· πάγος δέ οἱ ἀντεβόλησεν ### 440 ὑψηλός, τῷ δὴ συνενείκεται, ἔνθα μιν ἴσχει· ### 441 τὼς 〈ἄρ’〉 ὃ μὲν ἰαχῇ βρισάρματος οὔλιος Ἄρης ### 442 κεκληγὼς ἐπόρουσεν, ὃ δ’ ἐμμαπέως ὑπέδεκτο. ### 443 αὐτὰρ Ἀθηναίη, κούρη Διὸς αἰγιόχοιο, ### 444 ἀντίη ἦλθεν Ἄρηος ἐρεμνὴν αἰγίδ’ ἔχουσα· ### 445 δεινὰ δ’ ὑπόδρα ἰδοῦς’ ἔπεα πτερόεντα προσηύδα· ### 446 [para]“Ἆρες, ἔπισχε μένος κρατερὸν καὶ χεῖρας ἀάπτους· ### 447 οὐ γάρ τοι θέμις ἐστὶν ἀπὸ κλυτὰ τεύχεα δῦσαι ### 448 Ἡρακλέα κτείναντα, Διὸς θρασυκάρδιον υἱόν· ### 449 ἀλλ’ ἄγε παῦε μάχης, μηδ’ ἀντίος ἵστας’ ἐμεῖο.” ### 450 Ὣς ἔφατ’· ἀλλ’ οὐ πεῖθ’ Ἄρεος μεγαλήτορα θυμόν, ### 451 ἀλλὰ μέγα ἰάχων, φλογὶ εἴκελα τεύχεα πάλλων ### 452 καρπαλίμως ἐπόρουσε βίῃ Ἡρακληείῃ ### 453 κακκτάμεναι μεμαώς· καί ῥ’ ἔμβαλε χάλκεον ἔγχος, ### 454 σπερχνὸν παιδὸς ἑοῦ κοτέων περὶ τεθνηῶτος, ### 455 ἐν σάκεϊ μεγάλῳ. ἀπὸ δὲ γλαυκῶπις Ἀθήνη ### 456 ἔγχεος ὁρμὴν ἔτραπ’ ὀρεξαμένη ἀπὸ δίφρου. ### 457 δριμὺ δ’ Ἄρη’ ἄχος εἷλεν· ἐρυσσάμενος δ’ ἄορ ὀξὺ ### 458 ἔσσυτ’ ἐφ’ Ἡρακλέα κρατερόφρονα· τὸν δ’ ἐπιόντα ### 459 Ἀμφιτρυωνιάδης, δεινῆς ἀκόρητος ἀυτῆς, ### 460 μηρὸν γυμνωθέντα σάκευς ὑπὸ δαιδαλέοιο ### 461 οὔτας’ ἐπικρατέως· διὰ δὲ μέγα σαρκὸς ἄραξε ### 462 δούρατι νωμήσας, ἐπὶ δὲ χθονὶ κάββαλε μέσσῃ. ### 463 τῷ δὲ Φόβος καὶ Δεῖμος ἐύτροχον ἅρμα καὶ ἵππους ### 464 ἤλασαν αἶψ’ ἐγγύς, καὶ ἀπὸ χθονὸς εὐρυοδείης ### 465 ἐς δίφρον θῆκαν πολυδαίδαλον· αἶψα δ’ ἔπειτα ### 466 ἵππους μαστιέτην, ἵκοντο δὲ μακρὸν Ὄλυμπον. ### 467 υἱὸς δ’ Ἀλκμήνης καὶ κυδάλιμος Ἰόλαος ### 468 Κύκνον σκυλεύσαντες ἀπ’ ὤμων τεύχεα καλὰ ### 469 νίσοντ’· αἶψα δ’ ἔπειτα πόλιν Τρηχῖνος ἵκοντο ### 470 ἵπποις ὠκυπόδεσσιν. ἀτὰρ γλαυκῶπις Ἀθήνη ### 471 ἐξίκετ’ Οὔλυμπόν τε μέγαν καὶ δώματα πατρός. ### 472 Κύκνον δ’ αὖ Κήυξ θάπτεν καὶ λαὸς ἀπείρων, ### 473 οἵ ῥ’ ἐγγὺς ναῖον πόλιος κλειτοῦ βασιλῆος, ### 474 [Ἄνθην Μυρμιδόνων τε πόλιν κλειτήν τ’ Ἰαωλκὸν ### 475 Ἄρνην τ’ ἠδ’ Ἑλίκην· πολλὸς δ’ ἠγείρετο λαός,] ### 476 τιμῶντες Κήυκα, φίλον μακάρεσσι θεοῖσιν. ### 477 τοῦ δὲ τάφον καὶ σῆμ’ ἀιδὲς ποίησεν Ἄναυρος ### 478 ὄμβρῳ χειμερίῳ πλήθων· τὼς γάρ μιν Ἀπόλλων ### 479 Λητοΐδης ἤνωξ’, ὅτι ῥα κλειτὰς ἑκατόμβας ### 480 ὅστις ἄγοι Πυθοῖδε βίῃ σύλασκε δοκεύων. ## License and provenance Eulogikon publishes public-domain Greek texts in cleaned, structured, readable form and makes no copyright claim over that preparation (Public Domain Mark 1.0, https://creativecommons.org/publicdomain/mark/1.0/). Cite as `eul_wid: aau-ab`.