---
title: Dyscolus
title_greek: Δύσκολος
author: Menander of Athens
eul_wid: hps-bm
eul_aid: hps
canonical: "https://eulogikon.org/grc/menander-of-athens/dyscolus"
canonical_json: "https://eulogikon.org/data/works/grc/menander-of-athens-dyscolus-hps-bm.json"
sha256: "9b624d3889fa8a360f9d3631d700bee4bc22d29fa7479ffcd23a5cf7c001ef9b"
period: Hellenistic
dialect: Attic Comedy
domain: Comedy
format: Verse
license: CC0-1.0
---

# Dyscolus

*Δύσκολος*

**Author:** Menander of Athens

**eul_wid:** `hps-bm` · [HTML page](https://eulogikon.org/grc/menander-of-athens/dyscolus) · [Canonical JSON](https://eulogikon.org/data/works/grc/menander-of-athens-dyscolus-hps-bm.json)

## Text

### 1.1

(ΠΑΝ) τῆς Ἀττικῆς νομίζετ’ εἶναι τὸν τόπον,

### 1.2

Φυλήν, τὸ νυμφαῖον δ’ ὅθεν προέρχομαι

### 1.3

Φυλασίων καὶ τῶν δυναμένων τὰς πέτρας

### 1.4

ἐνθάδε γεωργεῖν, ἱερὸν ἐπιφανὲς πάνυ.

### 5.1

τὸν ἀγρὸν δὲ τὸν ἐπὶ δεξί’ οἰκεῖ τουτονὶ

### 5.2

Κνήμων, ἀπάνθρωπός τις ἄνθρωπος σφόδρα

### 5.3

καὶ δύσκολος πρὸς ἅπαντας, οὐ χαίρων τ’ ὄχλωι—

### 5.4

“ὄχλωι” λέγω; ζῶν οὗτος ἐπιεικῶς χρόνον

### 5.5

πολὺν λελάληκεν ἡδέως ἐν τῶι βίωι

### 10.1

οὐδεν〈ί〉, προσηγόρευκε πρότερος δ’ οὐδένα,

### 10.2

πλὴν ἐξ ἀνάγκης γειτνιῶν παριών τ’ ἐμὲ

### 10.3

τὸν Πᾶνα· καὶ τοῦτ’ εὐθὺς αὐτῶι μεταμέλει,

### 10.4

εὖ οἶδ’. ὅμως οὖν, τῶι τρόπωι τοιοῦτος ὤν,

### 10.5

χήραν γυναῖκ’ ἔγημε, τετελευτηκότος

### 15.1

αὐτῆι νεωστὶ τοῦ λαβόντος τὸ πρότερον

### 15.2

ὑοῦ τε καταλελειμμένου μικροῦ τότε.

### 15.3

ταύτηι ζυγομαχῶν οὐ μόνον τὰς ἡμέρας

### 15.4

ἐπιλαμβάνων δὲ καὶ τὸ πολὺ νυκτὸς μέρος

### 15.5

ἔζη κακῶς. θυγάτριον αὐτῶι γίνεται·

### 20.1

ἔτι μᾶλλον. ὡς δ’ ἦν τὸ κακὸν οἷον οὐθὲν ἂν

### 20.2

ἕτερον γένοιθ’, ὁ βίος τ’ ἐπίπονος καὶ πικρός,

### 20.3

ἀπῆλθε πρὸς τὸν ὑὸν ἡ γυνὴ πάλιν

### 20.4

τὸν πρότερον αὐτῆι γενόμενον. χωρίδιον

### 20.5

τούτωι δ’ ὑπάρχον ἦν τι μικρὸν ἐνθαδὶ

### 25.1

ἐν γειτόνων, οὗ διατρέφει νυνὶ κακῶς τὴν μητέρ’, αὑτόν, πιστὸν οἰκέτην θ’ ἕνα

### 25.2

πατρῶιον. ἤδη δ’ ἐστὶ μειρακύλλιον

### 25.3

ὁ παῖς ὑπὲρ τὴν ἡλικίαν τὸν νοῦν ἔχων·

### 25.4

προάγει γὰρ ἡ τῶν πραγμάτων ἐμπειρία.

### 30.1

ὁ γέρων δ’ ἔχων τὴν θυγατέρ’ αὐτὸς ζῆι μόνος

### 30.2

καὶ γραῦν θεράπαιναν, ξυλοφορῶν σκάπτων τ’, ἀεὶ

### 30.3

πονῶν, ἀπὸ τούτων ἀρξάμενος τῶν γειτόνων

### 30.4

καὶ τῆς γυναικὸς μέχρι Χολαργέων κάτω

### 30.5

μισῶν ἐφεξῆς πάντας. ἡ δὲ παρθένος

### 35.1

γέγονεν ὁμοία τῆι τροφῆι τις, οὐδὲ ἓν

### 35.2

εἰδυῖα φλαῦρον. τὰς δὲ συντρόφους ἐμοὶ

### 35.3

Νύμφας κολακεύους’ ἐπιμελῶς τιμῶσά τε

### 35.4

πέπεικεν αὐτῆς ἐπιμέλειαν σχεῖν τινα

### 35.5

ἡμᾶς· νεανίσκον τε καὶ μάλ’ εὐπόρου

### 40.1

πατρὸς γεωργοῦντος ταλάντων κτήματα

### 40.2

ἐνταῦθα πολλῶν, ἀστικὸν τῆι διατριβῆι,

### 40.3

ἥκο]ν̣τ’ ἐπὶ θήραν μετὰ κυνηγέτου τινὸς

### 40.4

[ ]υ κατὰ τύχην παραβαλόντ’ εἰς τὸν τόπον

### 40.5

[ ]. ἔχειν πως ἐνθεαστικῶς ποῶ.

### 45.1

ταῦτ’ ἐστὶ τὰ κεφάλαια, τὰ καθ’ ἕκαστα δὲ

### 45.2

ὄψεσθ]’ ἐὰν βούλησθε—βουλήθητε δέ.

### 45.3

καὶ γὰ]ρ προσιόνθ’ ὁρᾶν δοκῶ μοι τουτονὶ

### 45.4

τὸν ἐρῶντα τόν τε συγκ̣[υνηγέτη]ν̣ ἅμα,

### 45.5

αὑτοῖς ὑπὲρ τούτων τι σ[υγκοινουμ]ένους. ΧΑΙΡΕΑΣ τί φήις; ἰδὼν ἐνθένδε παῖδ’ ἐλευθέραν

### 45.6

τὰς πλησίον Νύμφας στεφανοῦσαν, Σώστρατε,

### 45.7

ἐρῶν ἀπῆλθες εὐθύς;

### 52

ΣΩΣΤΡΑΤΟΣ εὐθύς.

### 52.1

[Χαι] ὡς ταχύ.

### 52.2

ἦ τοῦτ’ ἐβεβούλευς’ ἐξιών, ἐρᾶν τινος;

### 52.3

(Σω) σκώπτεις· ἐγὼ δὲ, Χαιρέα, κακῶς ἔχω.

### 55

(Χαι) ἀλλ’ οὐκ ἀπιστῶ.

### 55.1

(Σω) διόπερ ἥκω παραλαβὼν

### 55.2

σὲ πρὸς τὸ πρᾶγμα, καὶ φίλον καὶ πρακτικὸν

### 55.3

κρίνας μάλιστα.

### 57.1

(Χαι) πρὸς τὰ τοιαῦτα, Σώστρατε,

### 57.2

οὕτως ἔχω· παραλαμβάνει τις τῶν φίλων

### 57.3

ἐρῶν ἑταίρας· εὐθὺς ἁρπάσας φέρω,

### 60.1

μεθύω, κατακάω, λόγον ὅλως οὐκ ἀνέχομαι·

### 60.2

πρὶν ἐξετάσαι γὰρ ἥτις ἐστί, δεῖ τυχεῖν.

### 60.3

τὸ μὲν βραδύνειν γὰρ τὸν ἔρωτ’ αὔξει πολύ,

### 60.4

ἐν τῶι ταχέως δ’ ἔνεστι παύσασθαι ταχύ.

### 60.5

γάμον λέγει τις καὶ κόρην ἐλευθέραν·

### 65.1

ἕτερος τίς εἰμ’ ἐνταῦθα· πυνθάνομαι γένος,

### 65.2

βίον, τρόπους. εἰς πάντα τὸν λοιπὸν χρόνον

### 65.3

μνείαν γὰρ ἤδη τῶι φίλωι καταλείπομαι

### 65.4

ὡς ἂν διοικήσω περὶ ταῦτα.

### 68.1

(Σω) καὶ μάλ’ εὖ

### 68.2

(οὐ πάνυ δ’ ἀρεσκόντως ἐμοί).

### 69

(Χαι) καὶ νῦν γε δεῖ

### 70

ταῦτα διακοῦσαι πρῶτον ἡμᾶς.

### 70.1

(Σω) ὄρθριον

### 70.2

τὸν Πυρρίαν τὸν συγκυνηγὸν οἴκοθεν

### 70.3

ἐγὼ πέπομφα—

### 72

(Χαι) πρὸς τίνα;

### 72.1

(Σω) αὐτῶι τῶι πατρὶ

### 72.2

ἐντευξόμενον τῆς παιδὸς ἢ τῶι κυρίωι

### 72.3

τῆς οἰκίας ὅστις ποτ’ ἐστίν.

### 74

(Χαι) Ἡράκλεις,

### 75

οἷον λέγεις.

### 75.1

(Σω) ἥμαρτον· οὐ γὰρ οἰκέτηι

### 75.2

ἥρμοττ’ ἴσως τὸ τοιοῦτ〈ό γ’〉. ἀλλ’ οὐ ῥάιδιον

### 75.3

ἐρῶντα συνιδεῖν ἐστι τί ποτε συμφέρει·

### 75.4

καὶ τὴν διατριβὴν ἥτις ἔστ’ αὐτοῦ πάλαι

### 75.5

τεθαύμακ’· εἰρήκειν γὰρ εὐθὺς οἴκαδε

### 80.1

αὐτῶι παρεῖναι πυθομένωι τἀνταῦθά μοι.

### 80.2

ΠΥΡΡΙΑΣ

### 81.1

πάρες, φυλάττου, πᾶς ἄπελθ’ ἐκ τοῦ μέσου·

### 81.2

μαίνεθ’ ὁ διώκων, μαίνεται.

### 82.1

(Σω) τί τοῦτο, παῖ;

### 82.2

(Πυ) φεύγετε.

### 83

(Σω) τί ἐστι;

### 83.1

(Πυ) βάλλομαι βώλοις, λίθοις·

### 83.2

ἀπόλωλα.

### 84

(Σω) βάλλει; ποῖ, κακόδαιμον;

### 84

(Πυ) οὐκέτι

### 85

ἴσως διώκει;

### 85

(Σω) μὰ Δία.

### 85

(Πυ) ἐγὼ δ’ ὤιμην.

### 85.1

(Σω) τί δαὶ

### 85.2

λέγεις;

### 86

(Πυ) ἀπαλλαγῶμεν, ἱκετεύω σε.

### 86.1

(Σω) ποῖ;

### 86.2

(Πυ) ἀπὸ τῆς θύρας ἐντεῦθεν ὡς πορρωτάτω.

### 86.3

Ὀδύνης γὰρ ὑὸς ἦ〈ν〉· κακοδαιμ〈ον〉ῶν τις ἢ

### 86.4

μελαγχολῶν ἅνθρωπος οἰκῶ[ν ἐνθαδ]ὶ

### 90.1

τὴν οἰκίαν πρὸς ὅν μ’ ἔπεμπ̣[ες

### 90.2

μεγάλου κακοῦ· τοὺς δακτύλους [κατέαξα γὰρ

### 90.3

σχεδόν τι προσπταίων ἅπα[ντας

### 92.1

[?Σω]

### 92.2

ἐλθών;

### 93

〈Πυ〉 τί; πεπαρώινηκε. δεῦ[ρο

### 93.1

[?Σω]

### 93.2

εὔδηλός ἐστι.

### 94

(Πυ) νὴ Δί’, ἐξώλ[ης ἄρα,

### 95.1

Σώστρατ’, ἀπολο[ίμην· ἔχε] δέ πως φυλακτικῶς.

### 95.2

ἀλλ’ οὐ δύναμαι λ[έγειν, προ]σέστηκεν δέ μοι

### 95.3

τὸ πνεῦμα. κόψας τὴν θύραν τῆς οἰκίας

### 95.4

τὸν κύριον ζητεῖν ἔφην· προῆλθέ μοι

### 95.5

γραῦς τις κακοδαίμων, αὐτόθεν δ’ οὗ νῦν λέγων ἕστηκ’ ἔδειξεν αὐτὸν ἐπὶ τοῦ λοφιδίου

### 95.6

ἐκεῖ περιφθειρόμενον ἀχράδας, ἦ πολὺν

### 95.7

κύφων’ ἑαυτῶι συλλέγοντα.

### 102.1

Χαι ὡς ὀργίλως.

### 102.2

τί, ὦ μακάριε;

### 103.1

〈Πυ〉 ἐγὼ μὲν εἰς τὸ χωρίον

### 103.2

ἐμβὰς ἐπορευόμην πρὸς αὐτὸν καὶ πάνυ

### 105.1

πόρρωθεν, εἶναί τις φιλάνθρωπος σφόδρα

### 105.2

ἐπιδέξιός τε βουλόμενος προσεῖπα καὶ “ἥκω τι” φημί “πρός σε, πάτερ, ἰδεῖν τί σε

### 105.3

σπεύδων ὑπὲρ σοῦ πρᾶγμ’”· 〈ὁ δ’〉 εὐθύς, “ἀνόσιε

### 105.4

ἄνθρωπέ,” φησιν, “εἰς τὸ χωρίον δέ μου

### 110.1

ἥκεις 〈σύ;〉 τί μαθών;” βῶλον αἴρεταί τινα·

### 110.2

ταύτην ἀφίης’ εἰς τὸ πρόσωπον αὐτό μου.

### 110.3

Χαι ἐς κόρακας.

### 112.1

(Πυ) ἐν ὅσωι δ’ “ἀλλά ς’ ὁ Ποσειδῶν—” λέγων

### 112.2

κατέμυσα, χάρακα λαμβάνει πάλιν τινά·

### 112.3

ταύτηι μ’ ἐκάθαιρε, “σοὶ δὲ κἀμοὶ πρᾶγμα τί

### 115.1

ἐστιν;” λέγων, “τὴν δημοσίαν οὐκ οἶσθ’ ὁδόν;”

### 115.2

ὀξύτατον ἀναβοῶν τι.

### 116.1

Χαι μαινόμενον λέγεις

### 116.2

τελέως γεωργόν.

### 117.1

(Πυ) τὸ δὲ πέρας· φεύγοντα γὰρ

### 117.2

δεδίωχ’ ἴσως με στάδια πέντε καὶ δέκα,

### 117.3

περὶ τὸν λόφον πρώτιστον, εἶθ’ οὕτω κάτω

### 120.1

εἰς τὸ δασὺ τοῦτο, σφενδονῶν βώλοις, λίθοις,

### 120.2

ταῖς ἀχράσιν ὡς οὐκ εἶχεν οὐδὲν ἄλλ’ ἔτι.

### 120.3

ἀνήμερόν τι πρᾶγμα τελέως, ἀνόσιος

### 120.4

γέρων. ἱκετεύω ς’, ἄπιτε.

### 123.1

(Σω) δειλίαν λέγεις.

### 123.2

(Πυ) οὐκ ἴστε τὸ κακὸν οἷόν ἐστι. κατέδεται

### 125

ἡμᾶς.

### 125.1

Χαι τυχὸν ἴσως 〈ὅδ’〉 ὀδυνώμενός τι νῦν

### 125.2

τετύχηκε· διόπερ ἀναβαλέσθαι μοι δοκεῖ

### 125.3

αὐτῶι προσελθεῖν, Σώστρατ’· εὖ τοῦτ’ ἴσθ’ ὅτι

### 125.4

πρὸς πάντα πράγματ’ ἐστὶ πρακτικώτερον

### 125.5

εὐκαιρία.

### 129

Πυ νοῦν ἔχετε.

### 129

(Χαι) ὑπέρπικρον δέ τι

### 130.1

ἐστὶν πένης γεωργός, οὐχ οὗτος μόνος,

### 130.2

σχεδὸν δ’ ἅπαντες. ἀλλ’ ἕωθεν αὔριον

### 130.3

ἐγὼ πρόσειμ’ αὐτῶι μόνος, τὴν οἰκίαν

### 130.4

ἐπείπερ οἶδα. νῦν δ’ ἀπελθὼν οἴκαδε

### 130.5

καὶ σὺ διάτριβε· τοῦτο δ’ ἕξει κατὰ τρόπον.

### 135

(Πυ) πράττωμεν οὕτως.

### 135.1

Σω πρόφασιν οὗτος ἄσμενος

### 135.2

εἴληφεν· εὐθὺς φανερὸς ἦν οὐχ ἡδέως

### 135.3

μετ’ ἐμοῦ βαδίζων οὐδὲ δοκιμάζων πάνυ

### 135.4

τὴν ἐπιβολ]ὴν τὴν τοῦ γάμου. κακὸν δὲ σὲ

### 135.5

κακῶς ἅπ]αντες ἀπολέσειαν οἱ θεοί,

### 140.1

μαστιγία.]

### 140.2

[Πυ] [ τί δ’] ἠδίκηκα, Σώστρατε;

### 140.3

(Σω) κακῶς ἐπό]εις τὸ χωρίον τι δηλαδή.

### 140.4

[Πυ] οὐ μὰ Δί’] ἔκλεπτον.

### 142.1

(Σω) ἀλλ’ ἐμαστίγου σέ τις

### 142.2

οὐδὲν ἀδικοῦντα;

### 143.1

(Πυ) καὶ πάρεστί γ’ οὑτοσί

### 143.2

αὐτὸς—ὑπάγω, βέλτιστε. σὺ δὲ τούτωι λάλει.

### 145.1

(Σω) οὐκ ἂν δυναίμην· ἀπίθανός τις εἴμ’ ἀεὶ

### 145.2

ἐν τῶι λαλεῖν. ποῖον λέγει[ ]νι;

### 145.3

οὐ πάνυ φιλάνθρωπον β[λέπειν μ]οι φαίνεται,

### 145.4

μὰ τὸν Δί’· ὡς δ’ ἐσπούδακ’. ἐ[πανάξ]ω βραχὺ

### 145.5

ἀπὸ τῆς θύρας. βέλτιον. ἀλλὰ κ̣[αὶ β]οᾶι μόνος βαδίζων. οὐχ ὑγιαίνειν μοι δοκεῖ.

### 145.6

δέδοικα μέντοι, μὰ τὸν Ἀπόλλω καὶ θεούς,

### 145.7

αὐτόν. τί γὰρ ἄν τις μὴ οὐχὶ τἀληθῆ λέγοι;

### 145.8

ΚΝΗΜΩΝ

### 153.1

εἶτ’ οὐ μακάριος ἦν ὁ Περσεὺς κατὰ δύο

### 153.2

τρόπους ἐκεῖνος, ὅτι πετηνὸς ἐγένετο

### 155.1

κοὐδενὶ συνήντα τῶν βαδιζόντων χαμαί,

### 155.2

εἶθ’ ὅτι τοιοῦτο κτῆμ’ ἐκέκτηθ’ ὧι λίθους

### 155.3

ἅπαντας ἐπόει τοὺς ἐνοχλοῦντας; ὅπερ ἐμοὶ

### 155.4

νυνὶ γένοιτ’· οὐδὲν γὰρ ἀφθονώτερον

### 155.5

λιθίνων γένοιτ’ 〈ἂν〉 ἀνδριάντων πανταχοῦ.

### 160.1

νῦν δ’ οὐ βιωτόν ἐστι, μὰ τὸν Ἀσκληπιόν.

### 160.2

λαλοῦς’ ἐπεμβαίνοντες εἰς τὸ χωρίον

### 160.3

ἤδη· παρ’ αὐτὴν τὴν ὁδὸν γάρ, νὴ Δία,

### 160.4

εἴωθα διατρίβειν· ὃς οὐδ’ ἐργάζομαι

### 160.5

τοῦτο τὸ μέρος 〈τοῦ〉 χωρίου, πέφευγα δὲ

### 165.1

διὰ τοὺς παριόντας. ἀλλ’ ἐπὶ τοὺς λόφους ἄνω

### 165.2

ἤδη διώκους’. ὢ πολυπληθείας ὄχλου.

### 165.3

οἴμοι, πάλιν τις οὑτοσὶ πρὸς ταῖς θύραις

### 165.4

ἕστηκεν ἡμῶν.

### 168.1

Σω ἆρα τυπτήσει γέ με;

### 168.2

Κν ἐρημίας οὐκ ἔστιν οὐδαμοῦ τυχεῖν,

### 170.1

οὐδ’ ἂν ἀπάγξασθαί τις ἐπιθυμῶν τύχηι.

### 170.2

Σω ἐμοὶ χαλεπαίνει〈σ〉; περιμένω, πάτερ, τινὰ

### 170.3

ἐνταῦθα· συνεθέμην γάρ.

### 172.1

(Κν) οὐκ ἐγὼ ’λεγον;

### 172.2

τουτὶ στοὰν νενομίκατ’ ἢ τὸ τοῦ Λεώ;

### 172.3

πρὸς τὰς ἐμὰς θύρας, ἐὰν ἰδεῖν τινα

### 175.1

βούλησθε, συντάττεσθ’ ἀπαντᾶν· παντελῶς, καὶ θῶκον οἰκοδομήσατ’, ἂν ἔχητε νοῦν,

### 175.2

μᾶλλον δὲ καὶ συνέδριον. ὢ τάλας ἐγώ,

### 175.3

ἐπηρεασμὸς τὸ κακὸν εἶναί μοι δοκεῖ.

### 175.4

Σω οὐ τοῦ τυχόντος, ὡς ἐμοὶ δοκεῖ, πόνου

### 180.1

τουτὶ τὸ πρᾶγμά 〈γ’〉 ἀλλὰ συντονωτέρου.

### 180.2

πρόδηλόν ἐστιν. ἆρ’ ἐγὼ πορεύσομαι

### 180.3

ἐπὶ τὸν Γέταν τὸν τοῦ πατρός; νὴ τοὺς θεοὺς

### 180.4

ἔγωγ’· ἔχει 〈τι〉 διάπυρον καὶ πραγμάτων

### 180.5

ἔμπειρός ἐστιν παντοδαπῶν· τὸ δύσκολον

### 185.1

τὸ τοῦδ’ ἐκεῖνος 〈 〉 ἀπώσετ’, οἶδ’ ἐγώ.

### 185.2

τὸ μὲν χρόνον γὰρ ἐμποεῖν τῶι πράγματι

### 185.3

ἀποδοκιμάζω. πόλλ’ ἐν ἡμέραι μίαι

### 185.4

γένοιτ’ ἄν. ἀλλὰ τὴν θύραν πέπληχέ τις.

### 185.5

ΚΟΡΗ

### 189

οἴμοι τάλαινα τῶν ἐμῶν ἐγὼ κακῶν·

### 190.1

τί νῦν ποήσω; τὸν κάδον γὰρ ἡ τροφὸς

### 190.2

ἱμῶς’ ἀφῆκεν εἰς τὸ φρέαρ.

### 191.1

Σω ὦ Ζεῦ πάτερ,

### 191.2

καὶ Φοῖβε Παιάν, ὦ Διοσκόρω φίλω,

### 191.3

κάλλους ἀμάχου.

### 193.1

(Κο) θερμὸν 〈δ’〉 ὕδωρ πρ[οσέταξέ μοι

### 193.2

ποιεῖν ὁ πάππας ἐξιών.

### 194

(Σω) ἄνδρε[ς, τέρας.

### 195.1

(Κο) ἐὰν δὲ τοῦτ’ αἴσθητ’, ἀπολεῖ κακ[

### 195.2

παίων ἐκείνην. οὐ σχολὴ ματ[

### 195.3

ὦ φίλταται Νύμφαι, παρ’ ὑμῶν λη[πτέον. αἰσχύνομαι μέν, εἴ τινες θύους’ ἄ[ρα

### 195.4

ἔνδον, ἐνοχλεῖν—

### 199.1

(Σω) ἀλλ’ ἂν ἐμοὶ δ[ῶις, αὐτίκα βάψας ἐγώ σοι τ[ὴν ὑδρίαν ἥ]ξω φέρων.

### 199.2

(Κο) ναὶ πρὸς θεῶν, ἅ[νυσον δέ.]

### 201.1

(Σω) ἐλευθερίως γέ πως

### 201.2

ἄγροικός ἐστιν. ὦ πολυτίμητοι θεοί,

### 201.3

τίς ἂν ἐμὲ σώσαι δ̣[αιμό]νων;

### 203.1

(Κο) τάλαιν’ ἐγώ,

### 203.2

τίς ἐψόφηκεν; ἆρ’ ὁ πάππας ἔρχεται;

### 205.1

ἔπειτα πληγὰς λήψομ’ ἄν με καταλάβηι

### 205.2

ἔξω.

### 206.1

ΔΑΟΣ διατρίβω σοι διακονῶν πάλαι

### 206.2

ἐνταῦθ’, ὁ δὲ σκάπτει μόνος. πορευτέον

### 206.3

πρὸς ἐκεῖνόν ἐστιν. ὦ κάκιστ’ ἀπολουμένη

### 206.4

Πενία, τί ς’ ἡμεῖς τηλικοῦτ’ ἐφεύρομεν;

### 210.1

τί τοσοῦτον ἡμῖν ἐνδελεχῶς οὕτω χρόνον

### 210.2

ἔνδον κάθησαι καὶ συνοικεῖς;

### 211.1

(Σω) λάμβανε

### 211.2

τηνδί.

### 212

(Κο) φέρε δεῦρο.

### 212.1

Δα τί ποτε βούλεθ’ οὑτοσὶ

### 212.2

ἅνθρωπος;

### 213.1

(Σω) ἔρρως’, ἐπιμελοῦ τε τοῦ πατρός.

### 213.2

οἴμοι, κακοδαίμων. παῦε θρηνῶν, Σώστρατε·

### 215

ἔσται κατὰ τρόπον.

### 215

(Δα) κατὰ τρόπον τί;

### 215.1

(Σω) μὴ φοβοῦ, ἀλλ’ ὅπερ ἔμελλες ἄρτι τὸν Γέταν λαβὼν

### 215.2

ἐπάνηκ’, ἐκείνωι πᾶν τὸ πρᾶγμ’ εἰπὼν σαφῶς.

### 215.3

Δα τουτὶ τὸ κακὸν τί ποτ’ ἐστίν; ὡς οὔ μοι πάνυ

### 215.4

τὸ πρᾶγμ’ ἀρέσκει. μειράκιον διακονεῖ

### 220.1

κόρηι· πονηρόν. ἀλλά ς’, ὦ Κνήμων, κακὸν

### 220.2

κακῶς ἅπαντες ἀπολέσειαν οἱ θεοί.

### 220.3

ἄκακον κόρην μόνην ἀφεὶς ἐν ἐρημίαι

### 220.4

ἐᾶις, φυλακὴν οὐδεμίαν ὡς προσῆκον ἦν

### 220.5

ποιούμενος. τουτὶ καταμανθάνων ἴσως

### 225.1

οὗτος προσερρύη, νομίζων ὡσπερεὶ

### 225.2

ἕρμαιον. οὐ μὴν ἀλλὰ 〈τ〉ἀδελφῶι γε δεῖ

### 225.3

αὐτῆς φράσαι με τὴν ταχίστην ταῦθ’, ἵνα

### 225.4

ἐν ἐπιμελείαι τῆς κόρης γενώμεθα.

### 225.5

ἤδη δὲ τοῦτ’ ἐλθὼν ποήσειν μοι δοκῶ.

### 230.1

καὶ γὰρ προσιόντας τούσδε Πανιστάς τινας

### 230.2

εἰς τὸν τόπον δεῦρ’ ὑποβεβρεγμένους ὁρῶ,

### 230.3

οἷς μὴ ’νοχλεῖν εὔκαιρον εἶναί μοι δοκεῖ.

### 232.1

ΧΟΡΟΥ

### 232.2

ΓΟΡΓΙΑΣ

### 233.1

οὕτω παρέργως δ’, εἰπέ μοι, τῶι πράγματι

### 233.2

φαύλως τ’ ἐχρήσω;

### 234

Δα πῶς;

### 234

(Γο) ἔδει σε, νὴ Δία,

### 235.1

τὸν τῆι κόρηι προσιόντα, 〈Δᾶ’〉, ὅστις ποτ’ ἦν,

### 235.2

ἰδεῖν τότ’ εὐθύς, τοῦτο τοῦ λοιποῦ χρόνου

### 235.3

εἰπεῖν θ’ ὅπως μηδείς ποτ’ αὐτὸν ὄψεται

### 235.4

ποιοῦντα· νυνὶ δ’ ὥσπερ ἀλλοτρίου τινὸς

### 235.5

πράγματος ἀπέστης. οὐκ ἔνεστ’ ἴσως φυγεῖν

### 240.1

οἰκειότητα, Δᾶ’. ἀδελφῆς ἔτι μέλει

### 240.2

ἐμῆ[ς]. ὁ πατὴρ ἀλλότριος εἶναι βούλεται

### 240.3

αὐτῆς πρὸς ἡμᾶς· μὴ τὸ τούτου δύσκολον

### 240.4

μιμώμεθ’ ἡμεῖς· ἂν γὰρ αἰσχύνηι τινὶ

### 240.5

αὕτη] περιπέσηι, τοῦτο κἀμοὶ γίνεται

### 245.1

ὄνειδο]ς. ὁ γὰρ ἔξωθεν οὐ τὸν αἴτιον

### 245.2

ὅστις] πότ’ ἐστιν οἶδεν, ἀλλὰ τὸ γεγονός.

### 245.3

[ ]ν̣.

### 247.1

(Δα) ὦ τᾶν, τὸν γέροντα, Γοργία,

### 247.2

δέδοικ’· ἐ]ὰν γὰρ τῆι θύραι προσιόντα με

### 247.3

λάβηι, κρ]εμᾶι παραχρῆμα.

### 249.1

Γο δυσχρήστως γέ πως [ ζυ]γομαχῶν τοῦτον οὔθ’ ὅτωι τρόπωι

### 249.2

ἀναγκάσαι τις εἰς τὸ βέλτι[ον ......]ν

### 249.3

οὔτ’ ἂν μεταπείσαι νουθετῶν ο[.......]ς

### 249.4

ἀλλ’ ἐμποδὼν τῶι μὲν βιάσασθαι τὸν νόμον

### 249.5

ἔχει μεθ’ αὑτοῦ, τῶι δὲ πεῖσαι τὸν τρόπον.

### 255.1

Δα μικρὸν δ’ ἐπίσχες· οὐ μάτην γὰρ ἥκομεν,

### 255.2

ἀλλ’ ὥσπερ εἶπον ἔρχετ’ ἀνακάμψας πάλιν.

### 255.3

Γο ὁ τὴν χλανίδ’ ἔχων; οὗτος ἐστὶν ὃν λέγεις;

### 255.4

(Δα) οὗτος.

### 258.1

(Γο) κακοῦργος εὐθὺς ἀπὸ τοῦ βλέμματος.

### 258.2

Σω τὸν μὲν Γέταν οὐκ ἔνδον ὄντα κατέλαβον,

### 260.1

μέλλουσα δ’ ἡ μήτηρ θεῶι θύειν τινί—

### 260.2

οὐκ οἶδ’ ὅτωι—ποιεῖ δὲ τοῦθ’ ὁσημέραι, περιέρχεται θύουσα τὸν δῆμον κύκλωι

### 260.3

ἅπαντ’—ἀπέσταλκ’ αὐτὸν αὐτόθεν τινὰ

### 260.4

μισθωσόμενον μάγειρον. ἐρρῶσθαι δὲ τῆι

### 265.1

θυσίαι φράσας ἥκω πάλιν πρὸς τἀνθάδε.

### 265.2

καί μοι δοκῶ τοὺς περιπάτους τούτους ἀφεὶς

### 265.3

αὐτὸς διαλέξεσθ’ ὑπὲρ ἐμαυτοῦ. τὴν θύραν

### 265.4

κόψω δ’, ἵν’ ἦι μοι μηδὲ βουλεύσασθ’ ἔτι.

### 265.5

Γο μειράκιον, ἐθελήσαις ἂν ὑπομεῖναι λόγον

### 270

σπουδαιότερόν μου;

### 270.1

(Σω) καὶ μάλ’ ἡδέως· λέγε.

### 270.2

(Γο) εἶναι νομίζω πᾶσιν ἀνθρώποις ἐγὼ

### 270.3

τοῖς τ’ εὐτυχοῦσιν τοῖς τε πράττουσιν κακῶς

### 270.4

πέρας τι τούτου καὶ μεταλλαγήν τινα,

### 270.5

καὶ τῶι μὲν εὐτυχοῦντι μέχρι τούτου μένειν

### 275.1

τὰ πράγματ’ εὐθενοῦντ’ ἀεὶ τὰ τοῦ βίου

### 275.2

ὅσον ἂν χρόνον φέρειν δύνηται τὴν τύχην

### 275.3

μηδὲν ποήσας ἄδικον· εἰς δὲ τοῦθ’ ὅταν

### 275.4

ἔλθηι προαχθεὶς τοῖς ἀγαθοῖς, ἐνταῦθά που

### 275.5

τὴν μεταβολὴν τὴν εἰς τὸ χεῖρον λαμβάνει·

### 280.1

τοῖς δ’ ἐνδεῶς πράττουσιν, ἂν μηδὲν κακὸν

### 280.2

ποιῶσιν ἀποροῦντες, φέρωσιν δ’ εὐγενῶς

### 280.3

τὸν δαίμον’, εἰς πίστιν ποτ’ ἐλθόντας χρόνωι,

### 280.4

βελτίον’ εἶναι μερίδα προσδοκᾶν τινα.

### 280.5

τί οὖν λέγω; μήτ’ αὐτός, εἰ σφόδρ’ εὐπορεῖς,

### 285.1

πίστευε τούτωι, μήτε τῶν πτωχῶν πάλιν

### 285.2

ἡμῶν καταφρόνει· τοῦ διευτυχεῖν δ’ ἀεὶ

### 285.3

πάρεχε σεαυτὸν τοῖς ὁρῶσιν ἄξιον.

### 285.4

Σω ἄτοπον δέ σοι τι φαίνομαι νυνὶ ποεῖν;

### 285.5

(Γο) ἔργον δοκεῖς μοι φαῦλον ἐζηλωκέναι,

### 290.1

πείσειν νομίζων ἐξαμαρτεῖν παρθένον

### 290.2

ἐλευθέραν, ἢ καιρὸν ἐπιτηρῶν τινα κατεργάσασθαι πρᾶγμα θανάτων ἄξιον

### 290.3

πολλῶν.

### 293

(Σω) Ἄπολλον.

### 293.1

(Γο) οὐ δίκαιόν ἐστι γοῦν

### 293.2

τὴν σὴν σχολὴν τοῖς ἀσχολουμένοις κακὸν

### 295.1

ἡμῖν γενέσθαι. τῶν δ’ ἁπάντων ἴσθ’ ὅτι

### 295.2

πτωχὸς ἀδικηθείς ἐστι δυσκολώτατο[ν.

### 295.3

πρῶτον μέν ἐστ’ ἐλεινός, εἶτα λαμβάνει

### 295.4

οὐκ εἰς ἀδικίαν ὅσα πέπονθ’, ἀλλ’ εἰς [ὕβριν.

### 295.5

Σω μειράκιον, οὕτως εὐτυχοίης, βραχ[ύ τι μου ἄκουσον— (Δα) εὖ γε, δέσποθ’, οὕτω πολλά [μοι

### 295.6

ἀγαθὰ γένοιτο.

### 301.1

(Σω) —καὶ σύ γ’, ὁ λαλῶν πρ[ὶν μαθεῖν.

### 301.2

κόρην τιν’ εἶδο[ν ἐνθαδί· τ]αύτης ἐρῶ.

### 301.3

εἰ τοῦτ’ ἀδίκημ’ ε̣[ἴρηκ]α̣ς, ἠδίκηκ’ ἴσως.

### 301.4

τί γὰρ ἄν τις εἴποι; π[λὴν π]ορεύομ’ ἐνθάδε

### 305.1

οὐχὶ πρὸς ἐκείνην, βούλομαι δ’ αὐτῆς ἰδεῖν

### 305.2

τὸν πατέρ’. ἐγὼ γάρ, ὢν ἐλεύθερος, βίον

### 305.3

ἱκανὸν ἔχων, ἕτοιμός εἰμι λαμβάνειν

### 305.4

αὐτὴν ἄπροικον, πίστιν ἐπιθεὶς διατελεῖν

### 305.5

στέργων. ἐπὶ κακῶι δ’ εἰ προσελήλυθ’ ἐνθάδε

### 310.1

ἢ βουλόμενος ὑμῶν 〈τι〉 κακοτεχνεῖν λάθραι,

### 310.2

οὗτός μ’ ὁ Πάν, μειράκιον, αἱ Νύμφαι θ’ ἅμα

### 310.3

ἀπόπληκτον αὐτοῦ πλησίον τῆς οἰκίας

### 310.4

ἤδη ποήσειαν. τετάραγμ’, 〈εὖ〉 ἴσθ’ ὅτι,

### 310.5

οὐδὲ μετρίως, εἴ σοι τοιοῦτος φαίνομαι.

### 315.1

Γο ἀλλ’ εἴ τι κἀγὼ τοῦ δέοντος σφοδρότερον

### 315.2

εἴρηκα, μηδὲν τοῦτο λυπείτω ς’ ἔτι.

### 315.3

ἅμα γὰρ μεταπείθεις ταῦτα καὶ φίλον μ’ ἔχεις. οὐκ ἀλλότριος δ’ ὤν, ἀλλ’ ἀδελφὸς τῆς κόρης

### 315.4

ὁμομήτριος, βέλτιστε, ταῦτά σοι λέγω.

### 320.1

Σω καὶ χρήσιμός γ’ εἶ, νὴ Δί’, εἰς τὰ λοιπά μοι.

### 320.2

(Γο) τί χρήσιμος;

### 321.1

(Σω) γεννικὸν ὁρῶ σε τῶι τρόπωι.

### 321.2

(Γο) οὐ πρόφασιν εἰπὼν βούλομ’ ἀποπέμψαι κενήν,

### 321.3

τὰ δ’ ὄντα πράγματ’ ἐμφανίσαι. ταύτηι πατήρ

### 321.4

ἐσθ’ οἷος οὐδεὶς γέγονεν οὔτε τῶν πάλαι

### 325

ἄνθρωπος οὔτε τῶν καθ’ ἡμᾶς.

### 325.1

(Σω) ὁ χαλεπός·

### 325.2

σχεδὸν οἶδα.

### 326.1

(Γο) ὑπερβολή τις ἐστὶν τοῦ κακοῦ.

### 326.2

τούτωι ταλάντων ἔστ’ ἴσως τουτὶ δυεῖν

### 326.3

τὸ κτῆμα. τοῦτ’ αὐτὸς γεωργῶν διατελεῖ

### 326.4

μόνος, συνεργὸν δ’ οὐδέν’ ἀνθρώπων ἔχων,

### 330.1

οὐκ οἰκέτην οἰκεῖον, οὐκ ἐκ τοῦ τόπου

### 330.2

μισθωτόν, οὐχὶ γείτον’, ἀλλ’ αὐτὸς μόνος.

### 330.3

ἥδιστόν ἐστ’ αὐτῶι γὰρ ἀνθρώπων ὁρᾶν

### 330.4

οὐδένα. μεθ’ αὑτοῦ τὴν κόρην ἐργάζεται

### 330.5

ἔχων τὰ πολλά· προσλαλεῖ ταύτηι μόνηι,

### 335.1

ἑτέρωι δὲ τοῦτ’ οὐκ ἂν ποήσαι ῥαιδίως.

### 335.2

τότε φησὶν ἐκδώσειν ἐκείνην, ἡνίκ’ ἂν

### 335.3

ὁμότροπον αὑτῶι νυμφίον λάβηι.

### 337.1

(Σω) λέγεις

### 337.2

οὐδέποτε.

### 338.1

(Γο) μὴ δὴ πράγματ’, ὦ βέλτιστ’, ἔχε·

### 338.2

μάτην γὰρ ἕξεις. τοὺς δ’ ἀναγκαίους ἔα

### 340.1

ἡμᾶς φέρειν ταῦθ’, οἷς δίδωσιν ἡ τύχη.

### 340.2

(Σω) πρὸς τῶν θεῶν οὐπώποτ’ ἠράσθης τινός,

### 340.3

μειράκιον;

### 342

(Γο) οὐδ’ ἔξεστί μοι, βέλτιστε.

### 342.1

(Σω) πῶς;

### 342.2

τίς ἔσθ’ ὁ κωλύων;

### 343

(Γο) ὁ τῶν ὄντων κακῶν λογισμός, ἀνάπαυσιν διδοὺς οὐδ’ ἡντινοῦν.

### 345.1

(Σω) οὔ μοι δοκεῖς· ἀπειρότερον γοῦν διαλέγει

### 345.2

περὶ ταῦτ’· ἀποστῆναι κελεύεις μ’. οὐκέτι

### 345.3

τοῦτ’ ἐσ]τὶν ἐπ’ ἐμοί, τῶι θεῶι δέ.

### 347.1

(Γο) τοιγαροῦν

### 347.2

οὐδὲ]ν ἀδικεῖς ἡμᾶς, μάτην δὲ κακοπαθεῖς.

### 347.3

(Σω) οὐκ, εἰ λά]βοιμι τὴν κόρην.

### 349.1

(Γο) οὐκ ἂν λάβοις. [ ]υνα † συν〈α〉κολουθήσας ἐμοὶ

### 349.2

[ ]παρατης †· πλησίον γὰρ τὴν νάπην

### 349.3

ἐργάζε]θ̣’ ἡμῶν.

### 352

(Σω) πῶς;

### 352.1

(Γο) λόγον τιν’ ἐμβαλῶ

### 352.2

περὶ τοῦ] γάμου 〈τοῦ〉 τῆς κόρης· τὸ τοιοῦτο γὰρ

### 352.3

ἴδοιμι κἂ]ν αὐτὸς γενόμενον ἄσμενος.

### 355.1

εὐθὺς μαχεῖται πᾶσι, λοιδορούμενος

### 355.2

εἰς τοὺς βίους οὓς ζῶσι· σὲ δ’ [ἄγοντ’ ἂν] ἴδηι

### 355.3

σχολὴν τρυφῶντά τ’, οὐδ’ ὁρῶν γ’ ἀνέξεται.

### 355.4

Σω νῦν ἔστ’ ἐκεῖ;

### 358.1

(Γο) μὰ Δί’, ἀλλὰ μ[ικρ]ὸν ὕστερον

### 358.2

ἔξεισιν ἣν εἴωθεν.

### 359

(Σω) ὦ τᾶν, τὴν κόρην

### 360

ἄγων μεθ’ αὑτοῦ, φήις;

### 360

(Γο) ὅπως ἂν τοῦτό γε τύχηι.

### 361.1

(Σω) βαδίζειν 〈εἰμ’〉 ἕτοιμος οἷ λέγεις.

### 361.2

ἀλλ’, ἀντιβολῶ, συναγώνισαί μοι.

### 362.1

(Γο) τίνα τρόπον;

### 362.2

(Σω) ὅντινα τρόπον; προάγωμεν οἷ λέγεις.

### 363.1

(Δα) τί οὖν;

### 363.2

ἐργαζομένοις ἡμῖν παρεστήξεις ἔχων

### 365

χλανίδα;

### 365

(Σω) τί δὴ γὰρ οὐχί;

### 365.1

Δα ταῖς βώλοις βαλεῖ

### 365.2

εὐθύς ς’, ἀποκαλεῖ τ’ ὄλεθρον ἀργόν. ἀλλὰ δεῖ

### 365.3

σκάπτειν μεθ’ ἡμῶν ς’· εἰ τύχοι γάρ, τοῦτ’ ἰδὼν

### 365.4

ἴσως ἂν ὑπομείνειε καὶ παρὰ σοῦ τινα

### 365.5

λόγον, νομίσας αὐτουργὸν εἶναι τῶι βίωι

### 370

πένητα.

### 370.1

(Σω) ἕτοιμος πάντα πειθαρχεῖν. ἄγε.

### 370.2

Γο τί κακοπαθεῖν σαυτὸν βιάζηι;

### 371.1

Δα βούλομαι

### 371.2

ὡς πλεῖστον ἡμᾶς ἐργάσασθαι τήμερον

### 371.3

τοῦτόν τε τὴν ὀσφῦν ἀπορρήξανθ’ ἅμα

### 371.4

παύσασθ’ ἐνοχλοῦνθ’ ἡμῖν προσιόντα τ’ ἐνθάδε.

### 375

Σω ἔκφερε δίκελλαν.

### 375.1

(Δα) τὴν παρ’ ἐμοῦ λαβὼν ἴθι.

### 375.2

τὴν αἱμασιὰν ἐποικοδομήσω γὰρ τέως

### 375.3

ἐγώ. ποητέον δὲ καὶ τοῦτ’ ἐστί.

### 377.1

(Σω) δός.

### 377.2

ἀπέσωσας.

### 378.1

〈Δα〉 ὑπάγω, τρόφιμ’· ἐκεῖ διώκετε.

### 378.2

(Σω) οὕτως ἔχω· παραποθανεῖν ἤδη με δεῖ

### 380

ἢ ζῆν ἔχοντα τὴν κόρην.

### 380

(Γο) εἴπερ λέγεις ἃ φρονεῖς, ἐπιτύχοις.

### 381.1

(Σω) ὦ πολυτίμητοι θεοί,

### 381.2

οἷς ἀποτρέπεις νυνὶ γὰρ ὡς οἴει με σύ,

### 381.3

τούτοις παρώξυμμ’ εἰς τὸ πρᾶγμα διπλασίως.

### 381.4

εἰ μὴ γὰρ ἐν γυναιξίν ἐστιν ἡ κόρη

### 385.1

τεθραμμένη μηδ’ οἶδε τῶν ἐν τῶι βίωι

### 385.2

τούτων κακῶν μηδὲν ὑπὸ τηθίδος τινὸς

### 385.3

δειδισαμένη μαίας τ’, ἐλευθερίως δέ πως

### 385.4

μετὰ πατρὸς ἀγρίου μισοπονήρου τῶι τρόπωι,

### 385.5

πῶς οὐκ ἐπιτυχεῖν ἐστι ταύτης μακάριον;

### 390.1

ἀλλ’ ἡ δίκελλ’ ἄγει τάλαντα τέτταρα

### 390.2

αὕτη· προαπολεῖ μ’. οὐ μαλακιστέον δ’ ὅμως,

### 390.3

ἐπείπερ ἦργμαι καταπονεῖν τὸ πρᾶγμ’ ἅπαξ.

### 390.4

ΣΙΚΩΝ

### 393.1

τουτὶ τὸ πρόβατόν ἐστιν οὐ τὸ τυχὸν καλόν.

### 393.2

ἄπαγ’ εἰς τὸ βάραθρον. ἂν μὲν αἰρόμενος φέρω

### 395.1

μετέωρον, ἔχεται τῶι στόματι θαλλοῦ, κράδης

### 395.2

κατεσθίει τὰ θρῖ’, ἀποσπᾶι δ’ εἰς βίαν.

### 395.3

ἐὰν δ’ ἀφῆι χαμαί τις, οὐ προέρχεται.

### 395.4

τοὐναντίον δὴ γέγονε· κατακέκομμ’ ἐγὼ

### 395.5

ὁ μάγειρος ὑπὸ τούτου νεωλκῶν τὴν ὁδόν. ἀλλ’ ἐστὶν εὐτυχῶς τὸ νυμφαῖον τοδ[ὶ

### 395.6

οὗ θύσομεν. τὸν Πᾶνα χαίρειν. παῖ Γέτα,

### 395.7

τοσοῦτ’ ἀπολείπηι;

### 402.1

(ΓΕΤΑΣ) τεττάρων γὰρ φορτίον

### 402.2

ὄνων συνέδησαν αἱ κάκιστ’ ἀπολούμεναι

### 402.3

φέρειν γυναῖκές μοι.

### 404

(Σι) πολύς τις ἔρχεται

### 405.1

ὄχλος ὡς ἔοικε. στρώματ’ ἀδιήγηθ’ ὅσα

### 405.2

φέρεις.

### 406

(Γε) τί δ’ ἐγ[ω...]

### 406

[Σι] † ἔρεισον ταῦτα δεῦρο.

### 406.1

〈Γε〉 ἰδού.

### 406.2

ἐὰν ἴδηι γὰρ ἐνύπνιον τὸν Πᾶνα τὸν

### 406.3

Παιανιοῖ, τούτωι βαδιούμεθ’, οἶδ’ ὅτι,

### 406.4

θύσοντες εὐθύς.

### 409

(Σι) τίς δ’ ἑόρακεν ἐνύπνιον;

### 410

(Γε) ἄνθρωπε, μή με κόπτε.

### 410.1

(Σι) ὅμως εἶπον, Γέτα.

### 410.2

τίς εἶδεν;

### 411

(Γε) ἡ κεκτημένη.

### 411.1

(Σι) τί πρὸς θεῶν;

### 411.2

(Γε) ἀπολεῖς. ἐδόκει τὸν Πᾶνα—

### 412.1

(Σι) τουτονὶ λέγεις;

### 412.2

(Γε) τοῦτον.

### 413

(Σι) τί ποιεῖν;

### 413.1

(Γε) τῶι τροφίμωι τῶι Σωστράτωι—

### 413.2

(Σι) κομψῶι νεανίσκωι γε.

### 414

(Γε) περικρούειν πέδας.

### 415

(Σι) Ἄπολλον.

### 415.1

(Γε) εἶτα δόντα διφθέραν τε καὶ

### 415.2

δίκελλαν 〈ἐν〉 τοῦ πλησίον τῶι χωρίωι

### 415.3

σκάπτειν κελεύειν.

### 417

(Σι) ἄτοπον.

### 417.1

(Γε) ἀλλὰ θύομεν διὰ τοῦθ’, ἵν’ εἰς βέλτιον ἀποβῆι τὸ φοβερόν.

### 417.2

Σι μεμάθηκα. πάλιν αἴρου δὲ ταυτὶ καὶ φέρε

### 420.1

εἴσω. ποῶμεν στιβάδας ἔνδον εὐτρεπεῖς

### 420.2

καὶ τἆλλ’ ἕτοιμα. μηδὲν ἐπικωλυέτω

### 420.3

θύειν γ’ ἐπὰν ἔλθωσιν. ἀλλ’ ἀγαθῆι τύχηι.

### 420.4

καὶ τὰς ὀφρῦς ἄνες ποτ’, ὦ τρισάθλιε·

### 420.5

ἐγώ σε χορτάσω κατὰ τρόπον τήμερον.

### 425.1

Γε ἐπαινέτης σοῦ τ’ εἰμι καὶ τῆς 〈σῆσ〉 τέχνης

### 425.2

ἔγωγ’ ἀεί ποτ’—οὐχὶ πιστεύω δ’ ὅμως.

### 426.1

ΧΟΡΟΥ

### 426.2

Κν γραῦ, τὴν θύραν κλείσας’ ἄνοιγε μηδενί,

### 426.3

ἕως ἂν ἔλθω δεῦρ’ ἐγὼ πάλιν· σκότους

### 426.4

ἔσται δὲ τοῦτο παντελῶς, ὡς οἴομαι.

### 430

〈ΜΗΤΗΡ〉

### 430.1

Πλαγγών, πορεύου θᾶττον· ἤδη τεθυκέναι

### 430.2

ἡμᾶς ἔδει.

### 431.1

Κν τουτὶ τὸ κακὸν τί βούλεται;

### 431.2

ὄχλος τις. ἄπαγ’ ἐς κόρακας.

### 432.1

(Μη) αὔλει, Παρθενί,

### 432.2

Πανός· σιωπῆι, φασί, τούτωι τῶι θεῶι

### 432.3

οὐ δεῖ προσιέναι.

### 434

(Γε) νὴ Δί’ ἀπεσώθητέ γε.

### 435

〈Κν〉 ὦ Ἡράκλεις, ἀηδίας.

### 435.1

〈Γε〉 καθήμεθα

### 435.2

χρόνον τοσοῦτον περιμένοντες.

### 436.1

(Μη) εὐτρεπῆ

### 436.2

ἅπαντα δ’ ἡμῖν ἐστι;

### 437.1

(Γε) ναὶ μὰ τὸν Δία.

### 437.2

〈Μη〉 τὸ γοῦν πρόβατον—μικροῦ τέθνηκε γάρ, τάλαν—

### 437.3

οὐ περιμένει τὴν σὴν σχολήν. ἀλλ’ εἴσιτε·

### 440.1

κανᾶ πρόχειρα, χέρνιβας, θυλήματα

### 440.2

ποιεῖτε.

### 441.1

〈Γε〉 ποῖ κέχηνας, ἐμβρόντητε σύ;

### 441.2

Κν κακοὶ κακῶς ἀπόλοισθε. ποιοῦσίν γε με

### 441.3

ἀργόν· καταλιπεῖν γὰρ μόνην τὴν οἰκίαν

### 441.4

οὐκ ἂν δυναίμην. αἱ δὲ Νύμφαι μοι κακὸν

### 445.1

ἀεὶ παροικοῦς’, ὥστε μοι δοκῶ πάλιν

### 445.2

μετοικοδομήσειν καταβαλὼν τὴν οἰκίαν

### 445.3

ἐντεῦθεν. ὡς θύουσι δ’ οἱ τοιχωρύχοι·

### 445.4

κοίτας φέρονται, σταμνί’, οὐχὶ τῶν θεῶν

### 445.5

ἕνεκ’ ἀλλ’ ἑαυτῶν. ὁ λιβανωτὸς εὐσεβὲς καὶ τὸ πόπανον· τοῦτ’ ἔλαβεν ὁ θεὸς ἐπὶ τὸ πῦρ

### 445.6

ἅπαν ἐπιτεθέν. οἱ δὲ τὴν ὀσφῦν ἄκραν

### 445.7

καὶ τὴν χολήν, ὅτι ἔστ’ ἄβρωτα, τοῖς θεοῖς

### 445.8

ἐπιθέντες αὐτοὶ τἆλλα καταπίνουσι. γραῦ,

### 445.9

ἄνοιγε θᾶττον τὴν θύραν. [ποητέ]ον

### 455.1

ἐστὶν γὰρ ἡμῖν τἄνδον ὡς ἐμοὶ δοκεῖ.

### 455.2

(Γε) τὸ λεβήτιον, φήις, ἐπιλέλη[σθ]ε; παντελῶς

### 455.3

ἀποκραιπαλᾶτε. καὶ τί νῦν ποιήσομεν;

### 455.4

ἐνοχλητέον τοῖς γειτνιῶσι τῶι θεῶι ἐσθ’ ὡς ἔοικε. παιδίον. μὰ τοὺς θεοὺς

### 460.1

θεραπαινίδια γὰρ ἀθλιώτερ’ οὐδαμοῦ

### 460.2

οἶμαι τρέφεσθαι. παῖδες. οὐδὲν ἄλλο πλὴν

### 460.3

κινητιᾶν ἐπίσταται—παῖδες καλοί—

### 460.4

καὶ διαβαλεῖν ἐὰν ἴδηι τις. παιδίον.

### 460.5

τουτὶ τὸ κακὸν 〈τί〉 ἐστί; παῖδες. οὐδὲ εἷς

### 465.1

ἐστ’ ἔνδον. ἠήν. προστρέχειν τις φαίνεται.

### 465.2

Κν τί τῆς θύρας ἅπτει, τρισάθλι’, εἰπέ μοι,

### 465.3

ἄνθρωπε;

### 467

〈Γε〉 μὴ δάκηις.

### 467.1

(Κν) ἐγώ σε νὴ Δία,

### 467.2

καὶ κατέδομαί γε ζῶντα.

### 468.1

(Γε) μή, πρὸς 〈τῶν〉 θεῶν.

### 468.2

(Κν) ἐμοὶ γάρ ἐστι συμβόλαιον, ἀνόσιε,

### 470.1

καὶ σοί τι;

### 470.2

(Γε) συμβόλαιον οὐδέν· τοιγαροῦν

### 470.3

προσελήλυθ’ οὐ χρέος ς’ ἀπαιτῶν οὐδ’ ἔχων

### 470.4

κλητῆρας, ἀλλ’ αἰτησόμενος λεβήτιον.

### 470.5

(Κν) λεβήτιον;

### 473

(Γε) λεβήτιον.

### 473.1

〈Κν〉 μαστιγία,

### 473.2

θύειν με βοῦς οἴει ποεῖν τε ταὔθ’ ἅπερ

### 475

ὑμεῖς ποεῖτε;

### 475.1

(Γε) οὐδὲ κοχλίαν ἔγωγέ σε.

### 475.2

ἀλλ’ εὐτύχει, βέλτιστε. κόψαι τὴν θύραν

### 475.3

ἐκέλευσαν αἱ γυναῖκες αἰτῆσαί τε με.

### 475.4

ἐπόησα τοῦτ’· οὐκ ἔστι· πάλιν ἀπαγγελῶ

### 475.5

ἐλθὼν ἐκείναις. ὦ πολυτίμητοι θεοί,

### 480.1

ἔχις πολιὸς ἅνθρωπός ἐστιν οὑτοσί.

### 480.2

(Κν) ἀνδροφόνα θηρί’· εὐθὺς ὥσπερ πρὸς φίλον

### 480.3

κόπτουσιν. ἂν ἡμῶν προσιόντα τῆι θύραι λάβω τιν’, ἂν μὴ πᾶσι τοῖς ἐν τῶι τόπωι

### 480.4

παράδειγμα ποιήσω, νομίζεθ’ ἕνα τινὰ

### 485.1

ὁρᾶν με τῶν πολλῶν. ὁ νῦν οὐκ οἶδ’ ὅπως

### 485.2

διευτύχηκεν οὗτος, ὅστις ἦν ποτε.

### 485.3

Σι κάκιστ’ ἀπόλοι’· ἐλοιδορεῖτό σοι; τυχὸν

### 485.4

ἤιτεις, σκατοφάγ’· ὡς οὐκ ἐπίστανταί τινες

### 485.5

ποιεῖν τὸ τοιοῦθ’· εὕρηκ’ ἐγὼ τούτου τέχνην·

### 490.1

διακονῶ γὰρ μυρίοις ἐν τῆι πόλει

### 490.2

τούτων τ’ ἐνοχλῶ τοῖς γείτοσιν καὶ λαμβάνω

### 490.3

σκεύη παρὰ πάντων. δεῖ γὰρ εἶναι κολακικὸν

### 490.4

τὸν δεόμενόν του. πρεσβύτερός τις τῆι θύραι

### 490.5

ὑπακήκο’· εὐθὺς πατέρα καὶ πάππα[ν λέγω.

### 495.1

γραῦς· μητέρ’. ἂν τῶν διὰ μέσου τ[ις ἦι γυνή,

### 495.2

ἐκάλες’ ἱερέαν. ἂν θεράπων[

### 495.3

βέλτιστον. ὑμεῖς δὲ κρεμαν.[

### 495.4

ὢ τῆς ἀμαθίας. παιδίον παῖ[

### 495.5

ἐγώ. πρόελθε, πατρίδιον· σὲ β[ούλομαι. Κν πάλιν αὖ σύ; (Σι) π̣[αῖ, τί το]ῦτ’; (Κν) ἐρεθίζεις μ’ ὡσπερεὶ

### 495.6

ἐπίτηδες, οὐκ εἴρηκά σοι πρὸς τὴν θύραν

### 495.7

μὴ προσιέναι; τὸν ἱμάντα δός, γραῦ.

### 502.1

(Σι) μηδαμῶς,

### 502.2

ἀλλ’ ἄφες.

### 503

(Κν) ἄφες;

### 503.1

〈Σι〉 βέλτιστε, ναὶ πρὸς 〈τῶν〉 θεῶν.

### 503.2

(Κν) ἧκε πάλιν.

### 504

(Σι) ὁ Ποσειδῶν σε—

### 504

(Κν) καὶ λαλεῖς ἔτι;

### 505

(Σι) αἰτούμενος χυτρόγαυλον ἦλθον.

### 505.1

(Κν) οὐκ ἔχω

### 505.2

οὔτε χυτρόγαυλον οὔτε πέλεκυν οὔθ’ ἅλας

### 505.3

οὔτ’ ὄξος οὔτ’ ἄλλ’ οὐδέν, ἀλλ’ εἴρηχ’ ἁπλῶς

### 505.4

μὴ προσιέναι μοι πᾶσι τοῖς ἐν τῶι τόπωι.

### 505.5

(Σι) ἐμοὶ μὲν οὐκ εἴρηκας.

### 509

(Κν) ἀλλὰ νῦν λέγω.

### 510.1

(Σι) νὴ σὺν κακῶι γ’. οὐδ’ ὁπόθεν ἄν τις, εἰπέ μοι,

### 510.2

ἐλθὼν λάβοι φράσαις ἄν;

### 511.1

(Κν) οὐκ ἐγὼ ’λεγον;

### 511.2

ἔτι μοι λαλήσεις;

### 512

(Σι) χαῖρε πολλά.

### 512.1

(Κν) οὐ βούλομαι

### 512.2

χαίρειν παρ’ ὑμῶν οὐδενός.

### 513.1

(Σι) μὴ χαῖρε δή.

### 513.2

(Κν) ὢ τῶν ἀνηκέστων κακῶν.

### 514

(Σι) καλῶς γέ με

### 515.1

βεβωλοκόπηκεν. οἷόν ἐστ’ ἐπιδεξίως

### 515.2

αἰτεῖν· διαφέρει νὴ Δί’. ἐφ’ ἑτέραν θύραν

### 515.3

ἔλθηι τις; ἀλλ’ εἰ σφαιρομαχοῦς’ ἐν τῶι τόπωι

### 515.4

οὕτως ἑτοίμως, χαλεπόν. ἆρά γ’ ἐστί μοι

### 515.5

κράτιστον ὀπτᾶν τὰ κρέα πάντα; φαίνεται.

### 520.1

ἔστιν δέ μοι λοπάς τις. ἐρρῶσθαι λέγω

### 520.2

Φυλασίοις. τοῖς οὖσι τούτοις χρήσομαι.

### 520.3

(Σω) ὅστις ἀπορεῖ κακῶν, ἐπὶ Φυλὴν ἐλθέτω

### 520.4

κυνηγέτης. ὢ τρισκακοδαίμων, ὡς ἔχω ὀσφῦν, μετάφρενον, τὸν τράχηλον, ἑνὶ λόγωι

### 525.1

ὅλον τὸ σῶμ’· εὐθὺς γὰρ ἐμπεσὼν πολύς,

### 525.2

νεανίας ἐγώ τις, ἐξαίρων ἄνω

### 525.3

σφόδρα τὴν δίκελλαν, ὡς ἂν ἐργάτης, βαθὺ

### 525.4

ἔπαιον. ἐπεκείμην φιλοπόνως, οὐ πολὺν

### 525.5

χρόνον. εἶτα καὶ μετεστρεφόμην τι, πηνίκα

### 530.1

ὁ γέρων πρόσεισι τὴν κόρην ἄγων ἅμα

### 530.2

σκοπούμενος. καὶ νὴ Δί’ ἐλαβόμην τότε

### 530.3

τῆς ὀσφύος, λάθραι τὸ πρῶτον· ὡς μακρὸν

### 530.4

ἦν παντελῶς δὲ τοῦτο, λορδοῦν ἠρχόμην,

### 530.5

ἀπεξυλούμην ἀτρέμα δ’. οὐδεὶς ἤρχετο.

### 535.1

ὁ δ’ ἥλιος κατέκα’, ἑώρα τ’ ἐμβλέπων

### 535.2

ὁ Γοργίας ὥσπερ τὰ κηλώνειά με

### 535.3

μόλις ἀνακύπτοντ’ εἶθ’ ὅλωι τῶι σώματι

### 535.4

πάλιν κατακύπτοντ’. “οὐ δοκεῖ μοι νῦν”, ἔφη,

### 535.5

“ἥξειν ἐκεῖνος, μειράκιον.” “τί οὖν,” ἐγὼ

### 540.1

εὐθύς, “ποῶμεν; αὔριον τηρήσομεν

### 540.2

αὐτόν, τὸ δὲ νῦν ἐῶμεν;” ὅ τε Δᾶος παρῆν

### 540.3

ἐπὶ τὴν σκαπάνην διάδοχος. ἡ πρώτη μὲν οὖν

### 540.4

ἔφο]δος τοιαύτη γέγονεν. ἥκω δ’ ἐνθάδε,

### 540.5

διὰ τί μὲν οὐκ ἔχω λέγειν μὰ τοὺς θεούς,

### 545.1

ἕλκ]ει δέ μ’ αὐτόματον τὸ πρᾶγμ’ εἰς τὸν τόπον.

### 545.2

Γε τί τὸ κακόν; οἴει χεῖρας ἑξήκοντά με,

### 545.3

ἄνθρωπ’, ἔχειν; τοὺς ἄνθρακάς σοι ζωπυρῶ

### 545.4

[ ]μαι, φέρω πλύνω κατατέμνω σπλάγχν’ ἅμα

### 545.5

μάττω περιφέρω τα.[........ ο]υτονί, ὑπὸ τοῦ καπνοῦ τυφλὸς [......]ς τούτοις ὅλος.

### 545.6

ἄγειν δοκῶ μοι τὴν ἑορτήν.

### 551.1

Σω παῖ Γέτα.

### 551.2

Γε ἐμὲ τίς;

### 552

(Σω) ἐγώ.

### 552

(Γε) σὺ δ’ εἶ τίς;

### 552

(Σω) οὐχ ὁρᾶις;

### 552.1

(Γε)ὁρῶ·

### 552.2

τρόφιμος.

### 553

(Σω) τί ποιεῖτ’ ἐνθάδ’, εἰπέ μοι;

### 553.1

(Γε) τί γάρ;

### 553.2

τεθύκαμεν ἄρτι καὶ παρασκευάζομεν

### 555

ἄριστον ὑμῖν.

### 555

(Σω) ἐνθάδ’ ἡ μήτηρ;

### 555.1

(Γε) πάλαι.

### 555.2

(Σω) ὁ πατὴρ δέ;

### 556.1

(Γε) προσδοκῶμεν. ἀλλὰ πάραγε σύ.

### 556.2

(Σω) μικρὸν διαδραμών 〈γ’〉. ἐνθαδὶ τρόπον τινὰ

### 556.3

γέγον’ οὐκ ἄκαιρος ἡ θυσία· παραλήψομαι

### 556.4

τὸ μειράκιον τουτὶ γάρ, ἐλθὼν ὡς ἔχω,

### 560.1

καὶ τὸν θεράποντ’ αὐτοῦ· κεκοινωνηκότες

### 560.2

ἱερῶν γὰρ εἰς τὰ λοιπὰ χρησιμώτεροι

### 560.3

ἡμῖν ἔσονται σύμμαχοι πρὸς τὸν γάμον.

### 560.4

(Γε) τί φήις; ἐπ’ ἄριστόν τινας παραλαμβάνειν

### 560.5

μέλλεις πορευθείς; ἕνεκ’ ἐμοῦ τρισχίλιοι

### 565.1

γένοισθ’· ἐγὼ μὲν γὰρ πάλαι τοῦτ’ οἶδ’, ὅτι

### 565.2

οὐ γεύσομ’ οὐδενός· πόθεν γάρ; συνάγετε

### 565.3

πάντας. καλὸν γὰρ τεθύκαθ’ ἱερεῖον, πάνυ

### 565.4

ἄξιον ἰδεῖν. ἀλλὰ 〈τὰ〉 γύναια ταῦτά μοι

### 565.5

(ἔχει γὰρ ἀστείως) μεταδοίη γ’ ἄν τινος;

### 570

οὐδ’ ἄν, μὰ τὴν Δήμητρ’, ἁλὸς πικροῦ.

### 570.1

(Σω) καλῶς ἔσται, Γέτα, τὸ τήμερον—μαντεύσομαι

### 570.2

τοῦτ’ αὐτός, ὦ Πάν· ἀλλὰ μὴν προσεύχομαι

### 570.3

ἀεὶ παριών σοι—καὶ φιλανθρωπεύσομαι.

### 570.4

ΣΙΜΙΧΗ

### 574

ὢ δυστυχής, ὢ δυστυχής, ὢ δυστυχής.

### 575.1

(Γε) ἄπαγ’ εἰς τὸ βάραθρον· τοῦ γέροντός τις γυνὴ

### 575.2

προελήλυθεν.

### 576.1

(Σιμ) τί πείσομαι; τὸν γὰρ κάδον

### 576.2

ἐκ τοῦ φρέατος βουλομένη τοῦ δεσπότου,

### 576.3

εἴ πως δυναίμην, ἐξελεῖν αὐτὴ λάθραι,

### 576.4

ἀνῆψα τὴν δίκελλαν ἀσθενεῖ τινι

### 580.1

καλωιδίωι σαπρῶι διερράγη τέ μοι

### 580.2

τοῦτ’ εὐθύς.

### 581

〈Γε〉 ὀρθῶς.

### 581.1

〈Σιμ〉 ἐνσέσεικα θ’ ἁθλία

### 581.2

καὶ τὴν δίκελλαν εἰς τὸ φρέαρ μετὰ τοῦ κάδου.

### 581.3

Γε ῥῖψαι τὸ λοιπόν σοι σεαυτήν ἐστ’ ἔτι.

### 581.4

(Σιμ) ὁ δ’, ἀπὸ τύχης κόπρον τιν’ ἔνδον κειμένην

### 585.1

μέλλων μεταφέρειν, περιτρέχων ταύτην πάλαι

### 585.2

ζητεῖ βοᾶι τε—καὶ ψοφεῖ γε τὴν θύραν.

### 585.3

Γε φεῦγ’ ὦ πονηρά, φεῦγ’. ἀποκτενεῖ σε, γραῦ.

### 585.4

μᾶλλον δ’ ἀμύνου.

### 588.1

Κν ποῦ ’στιν ἡ τοιχωρύχος;

### 588.2

(Σιμ) ἄκουσα, δέσποτ’, ἐνέβαλον.

### 589

(Κν) βάδιζε δὴ

### 590

εἴσω.

### 590

(Σιμ) τί ποιεῖν δ’, εἰπέ μοι, μέλλεις;

### 590.1

(Κν) ἐγώ;

### 590.2

δήσας καθιμήσω σε.

### 591.1

(Σιμ) μὴ δῆτ’, ὦ τάλαν. (Κν) ταὐτῶι γε τούτωι σχοινίωι, νὴ τοὺς θεούς.

### 591.2

〈Γε〉 κράτιστον, εἴπερ ἐστὶ παντελῶς σαπρόν.

### 591.3

(Σιμ) τὸν Δᾶον ἐκ τῶν γειτόνων ἐγὼ καλῶ;

### 595.1

(Κν) Δᾶον καλεῖς, ἀνόσι’, ἀνηιρηκυῖά [με;

### 595.2

οὔ σοι λέγω; θᾶττον βάδιζ’ εἴσω. [τάλας

### 595.3

ἐγώ, τάλας τῆς νῦν ἐρημίας [

### 595.4

ὡς οὐδὲ εἷς. καταβήσομ’ εἰ[ς τὸ φρέαρ· τί γὰρ

### 595.5

ἔτ’ ἐστιν ἄλλο;

### 599.1

(Γε) ἡμεῖς ποριοῦ[μεν ἁρπάγην καὶ σχοινίον. (Κν) κακὸν κάκ[ιστά ς’ οἱ θεοὶ

### 599.2

ἅπαντες ἀπολέσειαν εἴ τι μ[οι λαλεῖς.

### 599.3

(Γε) καὶ μάλα δικ[αίως. εἰσ]πεπήδηκεν πάλιν.

### 599.4

ὢ τρισκακοδα[ίμων οὗ]τος· οἷον ζῆι βίον.

### 599.5

τοῦτ’ ἐστὶν εἰλικρ[ινὴς] γεωργὸς Ἀττικός·

### 605.1

πέτραις μαχόμενος θύμα φερούσαις καὶ σφάκον

### 605.2

ὀδύνας ἐπισπᾶτ’ οὐδὲν ἀγαθὸν λαμβάνων.

### 605.3

ἀλλ’ ὁ τρόφιμος γὰρ οὑτοσὶ προσέρχεται

### 605.4

ἄγων μεθ’ αὑτοῦ τοὺς ἐπικλήτους· ἐργάται

### 605.5

ἐκ τοῦ τόπου τινές εἰσιν. ὢ τῆς ἀτοπίας.

### 610.1

οὗτος τί τούτους δεῦρ’ ἄγει νῦν; ἢ πόθεν

### 610.2

γεγονὼς συνήθης;

### 611.1

Σω οὐκ ἂν ἐπιτρέψαιμί σοι

### 611.2

ἄλλως ποῆσαι. πάντ’ ἔχομεν. ὦ Ἡράκλεις,

### 611.3

τουτὶ δ’ ἀπαρνεῖταί τις ἀνθρώπων ὅλως, ἐλθεῖν ἐπ’ ἄριστον συνήθους τεθυκότος;

### 615.1

εἰμὶ γάρ, ἀκριβῶς ἴσθι, σοὶ πάλαι φίλος

### 615.2

πρὶν ἰδεῖν. λαβὼν ταῦτ’ εἰσένεγκε Δᾶε σύ,

### 615.3

εἶθ’ ἧκε.

### 617.1

Γο μηδαμῶς μόνην τὴν μητέρα

### 617.2

οἴκοι καταλείπων ἀλλ’ ἐκείνης ἐπιμελοῦ

### 617.3

ὧν ἂν δέηται· ταχὺ δὲ κἀγὼ παρέσομαι.

### 619

ΧΟΡΟΥ

### 620.1

Σιμ τίς ἂν βοηθήσειεν; ὢ τάλαιν’ ἐγώ.

### 620.2

τίς ἂν βοηθήσειεν;

### 621.1

Σικ Ἡράκλεις ἄναξ,

### 621.2

ἐάσαθ’ ἡμᾶς πρὸς θεῶν καὶ δαιμόνων

### 621.3

σπονδὰς ποῆσαι. λοιδορεῖσθε, τύπτετε·

### 621.4

οἰμώζετ’· ὢ τῆς οἰκίας τῆς ἐκτόπου.

### 625

(Σιμ) ὁ δεσπότης ἐν τῶι φρέατι.

### 625

Σικ πῶς;

### 625.1

(Σιμ) ὅπως;

### 625.2

ἵνα τὴν δίκελλαν ἐξέλοι καὶ τὸν κάδον,

### 625.3

κατέβαινε, κἆιτ’ ὤλισθ’ ἄνωθεν, ὥστε καὶ

### 625.4

πέπτωκεν.

### 628.1

(Σικ) οὐ γὰρ ὁ χαλεπὸς γέρων σφόδρα

### 628.2

οὗτος; καλά γ’ ἐπόησε νὴ τὸν Οὐρανόν.

### 630

ὦ φιλτάτη γραῦ, νῦν σὸν ἔργον ἐστί.

### 630.1

(Σιμ) πῶς;

### 630.2

(Σικ) ὅλμον τιν’ ἢ λίθον τιν’ ἢ τοιοῦτό τι

### 630.3

ἄνωθεν ἔνσεισον λαβοῦσα.

### 632.1

(Σιμ) φίλτατε

### 632.2

κατάβα.

### 633

〈Σικ〉 Πόσειδον, ἵνα τὸ τοῦ λόγου πάθω, ἐν τῶι φρέατι κυνὶ μάχωμαι; μηδαμῶς.

### 635

(Σιμ) ὦ Γοργία, ποῦ γῆς ποτ’ εἶ;

### 635.1

(Γο) ποῦ γῆς ἐγώ;

### 635.2

τί ἐστί, Σιμίχη;

### 636.1

(Σιμ) τί γάρ; πάλιν λέγω·

### 636.2

ὁ δεσπότης ἐν τῶι φρέατι.

### 637.1

Γο Σώστρατε,

### 637.2

ἔξελθε δεῦρ’· ἡγοῦ, βάδιζ’ εἴσω ταχύ.

### 637.3

Σικ εἰσὶν θεοί, μὰ τὸν Διόνυσον. οὐ δίδως

### 640.1

λεβήτιον θύουσιν, ἱερόσυλε σύ,

### 640.2

ἀλλὰ φθονεῖς· ἔκπιθι τὸ φρέαρ εἰσπεσών,

### 640.3

ἵνα μηδ’ ὕδατος ἔχηις μεταδοῦναι μηδενί.

### 640.4

νυνὶ μὲν αἱ Νύμφαι τετιμωρημέναι

### 640.5

εἴς’ αὐτὸν ὑπὲρ ἐμοῦ δικαίως· οὐδὲ εἷς

### 645.1

μάγειρον ἀδικήσας ἀθῶιος διέφυγεν.

### 645.2

ἱεροπρεπής πως ἐστὶν ἡμῶν ἡ τέχνη.

### 645.3

[ ]ς τραπεζοποιὸν ὅ τι βούλει πόει.

### 645.4

ἀλλ’ ἆ]ρα μὴ τέθνηκεν; πάππαν φίλτατον

### 645.5

κλάο]υ̣ς’ ἀποιμώζει τις. οὐδὲν τοῦτό γε

### 649

(desunt uersus fere iv)

### 654

δηλονότι καθ[

### 655.1

οὕτως ἀνιμησ[

### 655.2

τὴν ὄψιν αὐτοῦ τ̣ι̣ν̣[

### 655.3

οἴεσθ’ ἔσεσθαι, πρὸς θεῶν, βεβ[αμ]μένου,

### 655.4

τρέμοντος; ἀστείαν. ἐγὼ μὲν ἡδέως

### 655.5

ἴδοιμ’ ἄν, ἄνδρες, νὴ τὸν Ἀπόλλω τουτονί.

### 660.1

ὑμεῖς δ’ ὑπὲρ τούτων, γυναῖκες, σπένδετε.

### 660.2

εὔχεσθε τὸν γέροντα σωθῆναι—κακῶς,

### 660.3

ἀνάπηρον ὄντα, χωλόν· οὕτω γίνεται

### 660.4

ἀλυπότατος γὰρ τῶιδε γείτων τῶι θεῶι

### 660.5

καὶ τοῖς ἀεὶ θύουσιν. ἐπιμελὲς δέ μοι

### 665.1

τοῦτ’ ἐστίν, ἄν τις ἆρα μισθώσητ’ ἐμέ.

### 665.2

(Σω) ἄνδρες, μὰ τὴν Δήμητρα, μὰ τὸν Ἀσκληπιόν,

### 665.3

μὰ τοὺς θεούς, οὐπώποτ’ ἐν τὠμῶι βίωι

### 665.4

εὐκαιρότερον ἄνθρωπον ἀποπεπνιγμένον

### 665.5

ἑόρακα μικροῦ. τῆς γλυκείας διατριβῆς·

### 670.1

ὁ Γοργίας γάρ, ὡς τάχιστ’ εἰσήλθομεν,

### 670.2

εὐθὺς κατεπήδης’ εἰς τὸ φρέαρ, ἐγὼ δὲ καὶ

### 670.3

ἡ παῖς ἄνωθεν οὐδὲν ἐποοῦμεν· τί γὰρ

### 670.4

ἐμέλλομεν; πλὴν ἡ μὲν αὑτῆς τὰς τρίχας

### 670.5

ἔτιλλ’, ἔκλα’, ἔτυπτε τὸ στῆθος σφόδρα,

### 675.1

ἐγὼ δ’ ὁ χρυσοῦς, ὡσπερεὶ νὴ τοὺς θεοὺς

### 675.2

τροφὸς παρεστώς, ἐδεόμην γε μὴ ποεῖν

### 675.3

τοῦθ’, ἱκέτευον, ἐμβλέπων ἀγάλματι

### 675.4

οὐ τῶι τυχόντι. τοῦ δὲ πεπληγμένου κάτω

### 675.5

ἔμελεν ἔλαττον ἤ τινός μοι, πλὴν ἀεὶ

### 680.1

ἕλκειν ἐκεῖνον· τοῦτ’ ἐνώχλει μοι σφόδρα.

### 680.2

μικροῦ γε νὴ Δί’ αὐτὸν εἰσαπολώλεκα·

### 680.3

τὸ σχοινίον γὰρ ἐμβλέπων τῆι παρθένωι

### 680.4

ἀφῆκ’ ἴσως τρίς. ἀλλ’ ὁ Γοργίας Ἄτλας

### 680.5

ἦν οὐχ ὁ τυχών· ἀντεῖχε καὶ μόλις ποτὲ

### 685.1

ἀνενήνοχ’ αὐτόν. ὡς ἐκεῖνος ἐξέβη

### 685.2

δεῦρ’ ἐξελήλυθ’· οὐ γὰρ ἐδυνάμην ἔτι

### 685.3

κατέχειν ἐμαυτόν, ἀλλὰ μικροῦ [τὴν κόρην

### 685.4

ἐφίλουν προσιών· οὕτω σφόδρ’ ε[ ἐρῶ. παρασκευάζομαι δή—τὴν θύραν

### 690.1

ψοφοῦσιν. ὦ Ζεῦ Σῶτερ, ἐκτόπου θέας.

### 690.2

Γο βούλει τι, Κνήμων; εἰπέ μοι.

### 691.1

(Κν) τί [

### 691.2

φαύλως ἔχω.

### 692

(Γο) θάρρει.

### 692.1

(Κν) τεθάρ[ρηκ’. οὐκέτι

### 692.2

ὑμῖν ἐνοχλήσει τὸν ἐπίλοιπον γ̣ὰ̣[ρ χρόνον

### 692.3

Κνήμων.

### 694

(Γο) τοιοῦτόν ἐστ’ ἐρημία κακόν,

### 695.1

ὁρᾶις; ἀκαρὴς νῦν παραπόλωλας ἀρτίως.

### 695.2

τηρούμενον δὴ τηλικοῦτον τῶι βίωι

### 695.3

ἤδη καταζῆν δεῖ.

### 697.1

(Κν) χαλεπῶς μὲν οἶδ’ ὅτι

### 697.2

ἔχω, κάλεσον δέ, Γοργία, τὴν μητέρα,

### 697.3

ὡς ἔνι μάλιστα. τὰ κακὰ παιδεύειν μόνα ἐπίσταθ’ ἡμᾶς ὡς ἔοικε. θυγάτριον,

### 697.4

βούλει μ’ ἀναστῆσαι λαβοῦσα;

### 701.1

Σω μακάριε

### 701.2

ἄνθρωπε.

### 702

(Κν) τί παρέστηκας ἐνταῦθ’, ἄθ̣λ̣ι̣[ε;

### 702

(desunt uersus v)

### 708.1

[ ]εσοις ἐβουλόμην

### 708.2

[ Μυρ]ρίνη καὶ Γοργία,

### 710.1

ε.[]ον προειλόμην

### 710.2

οὐκ ἴσως̣ [....]ι̣ κ[.]ι̣[.]ν οὐδ’ ἂν εἷς δύναιτό με

### 710.3

τοῦτο μεταπεῖσαί τις ὑμῶν, ἀλλὰ συγχωρήσετε. ἓν δ’ ἴσως ἥμαρτον ὅστις τῶν ἁπάντων ὠιόμην

### 710.4

αὐτὸς αὐτάρκης τις εἶναι καὶ δεήσεσθ’ οὐδενός.

### 715.1

νῦν δ’ ἰδὼν ὀξεῖαν οὖσαν ἄσκοπόν τε τοῦ βίου

### 715.2

τὴν τελευτήν, εὗρον οὐκ εὖ τοῦτο γινώσκων τότε.

### 715.3

δεῖ γὰρ εἶναι—καὶ παρεῖναι—τὸν ἐπικουρήσοντ’ ἀεί.

### 715.4

ἀλλὰ μὰ τὸν Ἥφαιστον—οὕτω σφόδρα 〈δι〉εφθάρμην ἐγὼ

### 715.5

τοὺς βίους ὁρῶν ἑκάστους τοὺς λογισμούς 〈θ’〉 ὃν τρόπον

### 720.1

πρὸς τὸ κερδαίνειν ἔχουσιν—οὐδέν’ εὔνουν ὠιόμην

### 720.2

ἕτερον ἑτέρωι τῶν ἁπάντων ἂν γενέσθαι. τοῦτο δὴ

### 720.3

ἐμποδὼν ἦν μοι. μόλις δὲ πεῖραν εἷς δέδωκε νῦν

### 720.4

Γοργίας, ἔργον ποήσας ἀνδρὸς εὐγενεστάτου·

### 720.5

τὸν γὰρ οὐκ ἐῶντά 〈τ’ α〉ὐτὸν προσιέναι 〈καὶ〉 τῆι θύραι

### 725.1

οὐ βοηθήσαντά 〈τ’ α〉ὐτῶι πώποτ’ εἰς οὐδὲν μέρος,

### 725.2

οὐ προσειπόντ’, οὐ λαλήσανθ’ ἡδέως, σέσωχ’ ὅμως.

### 725.3

ὅπερ ἂν ἄλλος καὶ δικαίως· “οὐκ ἐᾶις με προσιέναι·

### 725.4

οὐ προσέρχομ’· οὐδὲν ἡμῖν γέγονας αὐτὸς χρήσιμος·

### 725.5

οὐδ’ ἐγὼ σοὶ νῦν.” τί δ’ ἐστί, μειράκιον; ἐάν 〈τ’〉 ἐγὼ

### 730.1

ἀποθάνω νῦν—οἴομαι δέ, καὶ κακῶς ἴσως ἔχω—

### 730.2

ἄν τε περι〈σωθ〉ῶ, ποοῦμαί ς’ ὑόν, ἅ τ’ ἔχων τυγχάνω

### 730.3

πάντα σαυτοῦ νόμισον εἶναι. τήνδε σοι παρεγγυῶ·

### 730.4

ἄνδρα δ’ αὐτῆι πόρισον. εἰ γὰρ καὶ σφόδρ’ ὑγιαίνοιμ’ ἐγώ,

### 730.5

αὐτὸς οὐ δυνήσομ’ εὑρεῖν· οὐ γὰρ ἀρέσει μοί ποτε

### 735.1

οὐδὲ εἷς. ἀλλ’ ἐμὲ μέν, 〈ἂν ζῶ〉, ζῆν ἐᾶθ’ ὡς βούλομαι, τἆλλα πρᾶττ’ αὐτὸς παραλαβών. νοῦν ἔχεις σὺν τοῖς θεοῖς,

### 735.2

κηδεμὼν εἶ τῆς ἀδελφῆς εἰκότως. τοῦ κτήματος

### 735.3

ἐπιδίδου 〈σὺ〉 προῖκα τοὐμοῦ διαμετρήσας 〈θ〉ἤμισυ,

### 735.4

τὸ δ’ ἕτερον λαβὼν διοίκει κἀμὲ καὶ τὴν μητέρα.

### 740.1

ἀλλὰ κα]τάκλινόν με, θύγατερ. τῶν δ’ ἀναγκαίων λέγειν

### 740.2

πλείον’] οὐκ ἀνδρὸς νομίζω· πλὴν ἐκεῖνό γ’ ἴσθι, παῖ—

### 740.3

ὑπὲρ ἐ]μ̣οῦ γὰρ βούλομ’ εἰπεῖν ὀλίγα σοι καὶ τοῦ τρόπου—

### 740.4

εἰ τοιοῦτ]οι πάντες ἦσαν, οὔτε τὰ δικαστήρια

### 740.5

ἦν ἄν, οὔθ’ αὑτοὺς ἀπῆγον εἰς τὰ δεσμωτήρια,

### 745.1

οὔτε πόλεμος ἦν, ἔχων δ’ ἂν μέτρι’ ἕκαστος ἠγάπα.

### 745.2

ἀλλ’ ἴσως ταῦτ’ ἐστ’ ἀρεστὰ μᾶλλον· οὕτω πράττετε.

### 745.3

ἐκποδὼν ὑμῖν 〈ὁ〉 χαλεπὸς δύσκολός τ’ ἔσται γέρων.

### 745.4

(Γο) ἀλλὰ δέχομαι ταῦτα πάντα. δεῖ δὲ μετὰ σοῦ νυμφίον

### 745.5

ὡς τάχισθ’ εὑρεῖν 〈τιν’〉 ἡμᾶς τῆι κόρηι, σοὶ συνδοκοῦν. Κν οὗτος, εἴρηχ’ ὅς’ ἐφρόνουν σοι· μὴ ’νόχλει, πρὸς τῶν θεῶν.

### 745.6

Γο βούλεται γὰρ ἐντυχεῖν σοι—

### 751.1

(Κν) μηδαμῶς, πρὸς τῶν θεῶν.

### 751.2

(Γο) τὴν κόρην αἰτῶν τις.

### 752.1

(Κν) οὐδὲν ἔτι 〈τοιοῦτό〉 μοι μέλει.

### 752.2

(Γο) ὅ 〈σε〉 συνεκσώσας.

### 753

(Κν) ὁ ποῖος;

### 753.1

(Γο) οὑτοσί. πρόσελθε σύ.

### 753.2

(Κν) ἐπικέκαυται μέν. γεωργός ἐστι;

### 754

(Γο) καὶ μάλ’, ὦ πάτερ.

### 755.1

οὐ τρυφῶν οὐδ’ οἷος ἀργὸς περιπατεῖν τὴν ἡμέραν [ ].γ̣ενος ..[

### 755.2

[ ]σ̣δίδου ποεῖ 〈τε〉 του[

### 755.3

[Κν] εἰσκυ]κλεῖτ’ εἴσω με.

### 758.1

(?) καὶ[

### 758.2

ἐπιμ]ελοῦ τούτου. τὸ λο[ιπὸν] ἐγγυᾶν[

### 760

τὴν] ἀδελφήν.

### 760.1

(Γο) ἐπανένεγκε ταῦτα, [Σ]ώστ[ραθ’, οἷς σε δεῖ.

### 760.2

[Σω] οὐ[δ]ὲν ὁ πατὴρ ἀντερεῖ [μοι].

### 761.1

(Γο) τοιγαροῦν ἔγωγέ σοι

### 761.2

ἐγγυῶ δίδωμι πάντων τῶν θεῶν ἐναντίον

### 761.3

† ενεγκεινος δίκαιόν ἐστι π.[.]θη, Σώστρατε.

### 761.4

οὐ πεπλασμένωι γὰρ ἤθει πρὸς τὸ πρᾶγμ’ ἐλήλυθας,

### 765.1

ἀλλ’ ἁπλῶς, καὶ πάντα ποιεῖν ἠξίωσας τοῦ γάμου

### 765.2

ἕνεκα, τρυφερὸς ὢν δίκελλαν ἔλαβες, ἔσκαψας, πονεῖν

### 765.3

ἠθέλησας. ἐν δὲ τούτωι τῶι μέρει μάλιστ’ ἀνὴρ

### 765.4

δείκνυτ’, ἐξισοῦν ἑαυτὸν ὅστις ὑπομένει τινὶ

### 765.5

εὐπορῶν πένητι· καὶ γὰρ μεταβολὰς οὗτος τ̣ύ̣χ̣[ης

### 770.1

ἐγκρατῶς οἴσει. δέδωκας πεῖραν ἱκανὴν τοῦ τρόπου.

### 770.2

διαμένοις μόνον τοιοῦτος.

### 771.1

(Σω) πολὺ μὲν οὖν κρείττω̣[ν ἔτι.

### 771.2

ἀλλ’ ἐπαινεῖν αὑτόν ἐστι φορτικόν 〈τι〉 πρᾶγμ’ ἴσως.

### 771.3

εἰς καλὸν δ’ ὁρῶ παρόντα τὸν πατέρα.

### 773.1

(Γο) Καλλιππίδης

### 773.2

ἐστὶ σοῦ πατήρ;

### 774

(Σω) πάνυ μὲν οὖν.

### 774

(Γο) νὴ Δία πλούσιός γ’ ἀνήρ,

### 775

〈καὶ〉 δικαίως 〈γ’ ὡσ〉 γεωργὸς ἄμαχος.

### 775.1

ΚΑΛΛΙΠΠΙΔΗΣ ἀπολέλειμμ’ ἴσως.

### 775.2

〈οἱ δὲ〉 καταβεβρωκότες δὴ τὸ πρόβατον φροῦδοι πάλαι εἰσὶν εἰς ἀγρόν.

### 777.1

Γο Πόσειδον, ὀξυπείνως πως ἔχει.

### 777.2

αὐτίκ’ αὐτῶι ταῦτ’ ἐροῦμεν;

### 778.1

(Σω) πρῶτον ἀριστησάτω·

### 778.2

πραότερος ἔσται.

### 779

(Κα) τί τοῦτο, Σώστρατ’; ἠριστήκατε;

### 780

〈Σω〉 ἀλλὰ καὶ σοὶ παραλέλειπται. πάραγε.

### 780.1

(Κα) τοῦτο δὴ ποῶ.

### 780.2

Γο εἰσιὼν αὐτῶι λαλεῖ 〈νῦν〉, εἴ τι βούλει τῶι πατρὶ

### 780.3

κατὰ μόνας.

### 782

(Σω) ἔνδον περιμενεῖς, οὐ γάρ;

### 782.1

(Γο) οὐκ ἐξέρχομαι

### 782.2

ἔνδοθεν.

### 783

(Σω) μικρὸν διαλιπὼν παρακαλῶ τοίνυν 〈σ’〉 ἐγώ.

### 783.1

ΧΟΡΟΥ

### 783.2

Σω οὐχ ὡς ἐβουλόμην ἅπαντά μοι, πάτερ,

### 785

οὐδ’ ὡς προσεδόκων γίνεται παρὰ σοῦ.

### 785.1

(Κα) τί δέ;

### 785.2

οὐ συγκεχώρηχ’; ἧς ἐρᾶις σε λαμβάνειν

### 785.3

καὶ βούλομαι καί φημι δεῖν.

### 787.1

(Σω) οὔ μοι δοκεῖς.

### 787.2

(Κα) νὴ τοὺς θεοὺς ἔγωγε, γινώσκων ὅτι

### 787.3

νέωι γάμος βέβαιος οὕτως γίνεται

### 790.1

ἐὰν δι’ ἔρωτα τοῦτο συμπεισθῆι ποεῖν.

### 790.2

(Σω) ἔπειτ’ ἐγὼ μὲν τὴν ἀδελφὴν λήψομαι

### 790.3

τὴν τοῦ νεανίσκου, νομίζων ἄ[ξιον ἡμῶν ἐκεῖνον· πῶς δὲ τοῦτο νῦ[ν σὺ φήις,

### 790.4

οὐκ ἀντιδώσειν τὴν ἐμήν;

### 794

(Κα) αἰσχρὸν λέγεις;

### 795.1

νύμφην γὰρ ἅμα καὶ νυμφίον πτωχοὺς λαβεῖν

### 795.2

οὐ βούλομ’, ἱκανὸν δ’ ἐστὶν ἡμῖν θάτερον.

### 795.3

(Σω) περὶ χρημάτων λαλεῖς, ἀβεβαίου πράγματος.

### 795.4

εἰ μὲν γὰρ οἶσθα ταῦτα παραμενοῦντά σοι

### 795.5

εἰς πάντα τὸν χρόνον, φύλαττε μηδενὶ τοῦ σοῦ μεταδιδούς· ὧν δὲ μὴ σὺ κύριος

### 795.6

εἶ, μηδὲ σαυτοῦ τῆς τύχης δὲ πάντ’ ἔχεις,

### 795.7

μή τι φθονοίης, ὦ πάτερ, τούτων τινί.

### 795.8

αὕτη γὰρ ἄλλωι, τυχὸν ἀναξίωι τινί,

### 795.9

παρελομένη σοῦ πάντα προσθήσει πάλιν.

### 805.1

διόπερ ἐγώ σε φημὶ δεῖν, ὅσον χρόνον

### 805.2

εἶ κύριος, χρῆσθαι σε γενναίως, πάτερ,

### 805.3

αὐτόν, ἐπικουρεῖν πᾶσιν, εὐπόρους ποεῖν

### 805.4

ὡς ἂν δύνηι πλείστους διὰ σαυτοῦ. τοῦτο γὰρ

### 805.5

ἀθάνατόν ἐστι, κἄν ποτε πταίσας τύχηις,

### 810.1

ἐκεῖθεν ἔσται ταὐτὸ τοῦτό σοι πάλιν.

### 810.2

πολλῶι δὲ κρεῖττόν ἐστιν ἐμφανὴς φίλος

### 810.3

ἢ πλοῦτος ἀφανής, ὃν σὺ κατορύξας ἔχεις.

### 810.4

Κα οἶσθ’ οἷός εἰμι, Σώστραθ’· ἃ συνελεξάμην

### 810.5

οὐ συγκατορύξω ταῦτ’ ἐμαυτῶι—πῶς γὰρ ἄν; —

### 815.1

σὰ δ’ ἐστί. βούλει περιποήσασθαί τινα

### 815.2

φίλον δοκιμάσας· πρᾶττε τοῦτ’ ἀγαθῆι τύχηι. τί μοι λέγεις γνώμας; † πόριζε βάδιζε †

### 815.3

δίδου, μεταδίδου· συμπέπεισμαι πάντα σοι

### 815.4

ἑκών.

### 819

(Σω) ἑκών;

### 819

〈Κα〉 εὖ ἴσθι· μηδὲν τοῦτό σε

### 820

ταραττέτω.

### 820.1

(Σω) τὸν Γοργίαν τοίνυν καλῶ.

### 820.2

Γο ἐπακήκο’ ὑμῶν ἐξιὼν πρὸς τῆι θύραι

### 820.3

ἅπαντας οὓς εἰρήκατ’ ἐξ ἀρχῆς λόγους.

### 820.4

τί οὖν; ἐγώ σ〈ε, Σ〉ώστρατ’, εἶναι μὲν φίλον

### 820.5

ὑπολαμβάνω σπουδαῖον ἀγαπῶ τ’ ἐκτόπως,

### 825.1

μείζω δ’ ἐμαυτοῦ πράγματ’ οὔτε βούλομαι

### 825.2

οὔτ’ ἂν δυναίμην μὰ Δία βουληθεὶς φέρειν.

### 825.3

(Σω) οὐκ οἶδ’ ὅ τι λέγεις.

### 827.1

(Γο) τὴν ἀδελφὴν τὴν ἐμὴν

### 827.2

δίδωμί σοι γυναῖκα, τὴν δὲ σὴν λαβεῖν—

### 827.3

καλῶς ἔχει μοι.

### 829

(Σω) πῶς καλῶς;

### 829

(Γο) οὐχ ἡδύ μοι

### 830.1

εἶναι τρυφαίνειν ἀλλοτρίοις πόνοις δοκεῖ,

### 830.2

συλλεξάμενον δ’ αὐτόν.

### 831.1

(Σω) φλυαρεῖς, Γοργία.

### 831.2

οὐκ ἄξιον κρίνεις σεαυτὸν τοῦ γάμου.

### 831.3

(Γο) ἐμαυτὸν εἶναι κέκρικ’ ἐκείνης ἄξιον,

### 831.4

λαβεῖν δὲ πολλὰ μίκρ’ ἔχοντ’ οὐκ ἄξιον.

### 835.1

Κα νὴ τὸν Δία τὸν μέγιστον εὐγενῶς γέ πως

### 835.2

[ ]ος εἶ.

### 836

(Γο) πῶς;

### 836.1

(Κα) οὐκ ἔχων βούλει δοκεῖν

### 836.2

[ ]ἐπειδὴ συμπεπεισμένον μ’ ὁρᾶις [ ]ε τούτωι μ’ ἀναπέπεικας· διπλασίως

### 836.3

[ ]ων πένης 〈 〉 ἀπόπληκτός θ’ ἅμα

### 840.1

[ ]ς̣ ὑποδείκνυσιν εἷς σωτηρίαν.

### 840.2

[Σω ].λοιπόν ἐστιν ἡμῖν ἐγγυᾶν.

### 840.3

(Κα) ἀλλ’ ἐγγυῶ παίδων ἐπ’ ἀρότωι γνησίων

### 840.4

τὴν θυγατέρ’ ἤδη μειράκιόν σοι προῖκά τε

### 840.5

δίδωμ’ ἐπ’ αὐτῆι τρία τάλαντα.

### 844

(Γο) ἐγὼ δέ γε

### 845

ἔχω τάλαντον προῖκα τῆς ἑτέρας.

### 845.1

(Κα) ἔχεις;

### 845.2

μὴ δῶις σὺ λίαν.

### 846.1

(Γο) ἀλλ’ ἔχω τὸ χωρίον.

### 846.2

〈Κα〉 κέκτης’ ὅλον σύ, Γοργία. τὴν μητέρα

### 846.3

ἤδη σὺ δεῦρο τήν τ’ ἀδελφὴν μετάγαγε

### 846.4

πρὸς τὰς γυναῖκας τὰς παρ’ ἡμῖν.

### 849.1

(Γο) ἀλλὰ χρή. (Σω) τὴν νύκτα [

### 849.2

πάντες μεν̣[ το]ὺς γάμους

### 849.3

ποήσομεν. καὶ τὸν γέροντα, Γοργία,

### 849.4

κομίσατε δεῦρ’· ἕξει τὰ δέοντ’ ἐνταῦθ’ ἴσως

### 849.5

μᾶλλον παρ’ ἡμῖν.

### 854

(Γο) οὐκ ἐθελήσει, Σώστρατε.

### 855

(Σω) σύμπεισον αὐτόν.

### 855

(Γο) ἂν δύνωμαι.

### 855.1

(Σω) δεῖ πότον

### 855.2

ἡμῶν γενέσθαι, παππία, νυνὶ καλόν,

### 855.3

καὶ τῶν γυναικῶν παννυχίδα.

### 857.1

(Κα) τοὐναντίον

### 857.2

πίοντ’ ἐκεῖναι, παννυχιοῦμεν οἶδ’ ὅτι

### 857.3

ἡμεῖς. παράγων δ’ ὑμῖν ἑτοιμάσω τι νῦν

### 860

προὔργου.

### 860.1

Σω πόει τοῦτ’· οὐδενὸς χρὴ πράγματος

### 860.2

τὸν εὖ φρονοῦνθ’ ὅλως ἀπογνῶναί ποτε.

### 860.3

ἁλωτὰ γίνετ’ ἐπιμελείαι καὶ πόνωι

### 860.4

ἅπαντ’. ἐγὼ τούτου παράδειγμα νῦν φέρω·

### 860.5

ἐν ἡμέραι μιᾶι κατείργασμαι γάμον

### 865.1

〈ὃν〉 οὐδ’ ἂν εἷς ποτ’ ὤιετ’ ἀνθρώπων ὅλως.

### 865.2

Γο προάγετε δὴ θᾶττόν ποθ’ ὑμεῖς.

### 866.1

Σω δεῦτε δή.

### 866.2

μῆτερ, δέχου ταύτας. ὁ Κνήμων δ’ οὐδέπω;

### 866.3

(Γο) ὃς ἱκέτευεν ἐξαγαγεῖν τὴν γραῦν ἔτι,

### 866.4

ἵν’ ἦι τελέως μόνος καθ’ αὑτόν;

### 869

(Σω) ὢ τρόπου

### 870

ἀμάχου.

### 870

(Γο) τοιοῦτος.

### 870.1

〈Σω〉 ἀλλὰ πολλὰ χαιρέτω.

### 870.2

ἡμεῖς δ’ ἴωμεν.

### 871.1

(Γο) Σώστραθ’, ὑπεραισχύνομαι

### 871.2

γυναιξὶν ἐν ταὐτῶι—

### 872.1

(Σω) τίς ὁ λῆρος; οὐ πρόει;

### 872.2

οἰκεῖα ταῦτ’ ἤδη νομίζειν πάντα δεῖ.

### 872.3

Σιμ ἄπειμι νὴ τὴν Ἄρτεμιν κἀγώ. μόνος

### 875.1

ἐνταῦθα κατακείσει. τάλας σὺ τοῦ τρόπου.

### 875.2

πρὸς τὸν θεόν σε βουλομένων [τούτων ἄγειν

### 875.3

ἀντεῖπας. ἔσται μέγα κακὸν πάλιν [τί σοι,

### 875.4

νὴ τὼ θεώ, 〈καὶ〉 μεῖζον ἢ νῦν εὖ πά[νυ.

### 875.5

Γε ἐγὼ προσελθὼν ὄψομαι δεῦρ[

### 879

αὐλεῖ.

### 880.1

τί μοι προσαυλεῖς, ἄθλι’ οὗτος; οὐδέπω σχολή [μοι.

### 880.2

πρὸς τὸν κακῶς ἔχοντα πέμπους’ ἐνθαδί μ’· ἐπίσ[χες.

### 880.3

Σιμ καὶ παρακαθήσθω γ’ εἰσιὼν αὐτῶι τις ἄλλος ὑμῶν.

### 880.4

ἐγὼ δ’ ἀποστέλλουσα τροφίμην βούλομαι λαλῆσαι

### 880.5

ταύτηι, προσειπεῖν, ἀσπάσασθαι.

### 884

(Γε) νοῦν ἔχεις· βάδιζε.

### 885.1

τοῦτον δὲ θεραπεύσω τέως ἐγώ. πάλαι δ̣[έδοκται

### 885.2

τ[ούτο]υ̣ λαβεῖν τὸν καιρόν, ἀλλὰ διαπον̣[εῖν ἔδει με.

### 885.3

[ ]ετ̣ει καὶ τῶν β̣[

### 885.4

ο]ὔπω δυνησ̣[]ι̣, μάγειρε.

### 885.5

Σίκων, πρόελθε δεῦρό μοι [σὺ θᾶττο]ν. ὦ Πόσειδον,

### 890

οἵαν ἔχειν οἶμαι διατριβήν.

### 890

(Σικ) σύ με καλεῖς;

### 890.1

(Γε) ἔγωγε.

### 890.2

τιμωρίαν βούλει λαβεῖν ὧν ἀρτίως ἔπασχες;

### 890.3

(Σικ) ἐγὼ δ’ ἔπασχον ἀρτίως; οὐ λαικάσει φλυαρῶν;

### 890.4

(Γε) ὁ δύσκολος [γέρ]ων καθεύδει μόνος.

### 893.1

(Σικ) ἔχει δὲ 〈δὴ〉 πῶς;

### 893.2

[Γε] οὐ παντάπασιν ἀθλίως.

### 894

(Σικ) οὐκ ἂν δύναιτό γ’ ἡμᾶς

### 895

τύπτειν ἀναστάς;

### 895.1

(Γε) οὐδ’ ἀναστῆναι 〈γάρ〉, ὡς ἐγὦιμαι.

### 895.2

(Σικ) ὡς ἡδὺ πρᾶγμά μοι λέγεις. αἰτήσομ’ εἰσιών τι·

### 895.3

ἔξω γὰρ ἔσται τῶν φρενῶν.

### 897.1

(Γε) 〈τί δ’ ἄν,〉 τὸ δεῖνα, πρῶτον

### 897.2

ἔξω προελκύσωμεν αὐτόν, εἶτα θέντες αὐτοῦ κόπτωμεν οὕτω τὰς θύρας, αἰτῶμεν, ἐπιφλέγωμεν; ἔσται τις ἡδονή, λέγω. (Σικ) τὸν Γοργίαν δέδοικα

### 897.3

μὴ καταλαβὼν ἡμᾶς καθαίρηι.

### 901.1

Γε θόρυβός ἐστιν ἔνδον,

### 901.2

πίνουσιν. οὐκ αἰσθήσετ’ οὐδείς. τὸ δ’ ὅλον ἐστὶν ἡμῖν

### 901.3

ἅνθρωπος ἡμερωτέος· κηδεύομεν γὰρ αὐτῶι,

### 901.4

οἰκεῖος ἡμῖν γίνετ’· εἰ δ’ ἔσται τοιοῦτος αἰεί,

### 905

ἔργον ὑπενεγκεῖν, πῶς γὰρ οὔ;

### 905.1

(Σικ) λαθεῖν μόνον ἐπιθύμει

### 905.2

αὐτὸν φέρων δεῦρ’ εἰς τὸ πρόσθεν.

### 906

〈Γε〉 πρόαγε δὴ σύ.

### 906.1

〈Σικ〉 μικρὸν

### 906.2

πρόσμεινον, ἱκετεύω σε· μή με καταλιπὼν ἀπέλθηις.

### 906.3

〈Γε〉 καὶ μὴ ψόφει, πρὸς τῶν θεῶν.

### 908.1

(Σικ) ἀλλ’ οὐ ψοφῶ μὰ τὴν Γῆν.

### 908.2

〈Γε〉 εἰς δεξιάν.

### 909

(Σικ) ἰδού.

### 909

〈Γε〉 θὲς αὐτοῦ. νῦν ὁ καιρός.

### 909

〈Σικ〉 εἶἑν·

### 910.1

ἐγὼ προάξω πρότερος. ἤν. καὶ τὸν ῥυθμὸν σὺ τήρει.

### 910.2

〈παῖ〉, παιδίον, παῖδες 〈καλοί〉, παῖ, παιδία.

### 911.1

〈Κν〉 οἴχομ’, οἴμοι.

### 911.2

〈Σικ〉 παῖδες καλοί, παῖ, παιδίον, 〈παῖ〉, παῖδες.

### 912.1

〈Κν〉 οἴχομ’, οἴμοι.

### 912.2

〈Σικ〉 τίς οὗτος; ἐντεῦθέν τις εἶ;

### 913.1

(Κν) 〈δη〉λονότι. σὺ δὲ τί βούλει;

### 913.2

〈Σικ〉 λέβητας αἰτοῦμαι παρ’ ὑμῶν καὶ σκάφην.

### 914

(Κν) τίς ἄν με

### 915

στήσειεν ὀρθόν;

### 915.1

(Σικ) ἔστιν ὑμῖν, ἔστιν ὡς ἀληθῶς.

### 915.2

καὶ τρίποδας ἑπτὰ καὶ τραπέζας δώδεκ’· ἀλλά, παῖδες,

### 915.3

τοῖς ἔνδον 〈εἰσ〉αγγείλατε· σπεύδω γάρ.

### 917.1

(Κν) οὐδέν ἐστιν.

### 917.2

(Σικ) οὐκ ἔστιν;

### 918

(Κν) 〈ἀλλ’〉 ἀκήκοας μυριάκις.

### 918.1

(Σικ) ἀποτρέχω δή.

### 918.2

Κν ὢ δυστυχὴς ἐγώ. τίνα τρόπον ἐνθαδὶ προήχθην;

### 920

τίς μ’ εἰ]ς τὸ πρόσθεν κατατέθηκεν; ἄπαγε δὴ σύ.

### 920.1

〈Γε〉 καὶ δή.

### 920.2

παῖ, παι]δίον, γυναῖκες, ἄνδρες, παῖ θυρωρέ.

### 921.1

(Κν) μαίνει,

### 921.2

ἄνθρωπε· τὴν θύραν κατάξεις.

### 922.1

(Γε) δάπιδας ἐννέ’ ἡμῖν

### 922.2

χρήσα]τ̣ε.

### 923

(Κν) πόθεν;

### 923.1

(Γε) καὶ παραπέτασμα βαρβαρικὸν ὑφαντόν

### 923.2

[ ]ποδῶν τὸ μῆκος ἑκατόν.

### 924

(Κν) εἴθε μοι γένοιτο

### 925

[ πο]θεν. γραῦ. ποῦ ’στιν 〈ἡ〉 γραῦς;

### 925.1

(Γε) ἐφ’ ἑτέραν βαδίζω

### 925.2

θύραν;

### 926.1

(Κν) ἀπαλλάγητε δή. γραῦ. Σιμίχη. κακὸν δὲ

### 926.2

κακῶς 〈σ’〉 ἅπαντες ἀπολέσειαν οἱ θεοί. τί βούλει;

### 926.3

(Σικ) κρατῆρα βούλομαι λαβεῖν χαλκοῦν μέγαν.

### 928.1

(Κν) τίς ἄν με

### 928.2

στήσειεν ὀρθόν;

### 929

(Γε) ἔστιν ὑμῖν, ἔστιν ὡς ἀληθῶς

### 930

τὸ παραπέτασμα, παππία, πατρίδιον.

### 930.1

〈Κν〉 οὐδ’ ὁ κρατήρ.

### 930.2

τὴν Σιμίχην ἀποκτενῶ.

### 931.1

(Σικ) κάθου 〈σὺ〉 μη〈δὲ〉 γρύζων.

### 931.2

φεύγεις ὄχλον, μισεῖς γυναῖκας, οὐκ ἐᾶις κομίζειν

### 931.3

εἰς ταὐτὸ τοῖς θύουσι σαυτόν· πάντα ταῦτ’ ἀνέξει.

### 931.4

οὐδεὶς βοηθός σοι πάρεστιν. πρῖε σαυτὸν αὐτοῦ.

### 935.1

ἄκουε δ’ ἑξῆς πάντα γ̣α̣[ ]...[ ]τι̣σ̣[

### 935.2

[ ]αγκας οὐδὲ τὴν[ ]ι̣

### 935.3

[ ]ον αἱ γυναῖκες .[ ]παρ’ ὑμῶν.

### 935.4

[ γυν]αικὶ τῆι τε παιδὶ [περιβ]ολαὶ τὸ πρῶτον

### 935.5

[ φιλή]ματ’· οὐκ ἀηδὴς διατριβή τις αὐτῶν

### 940.1

[...]ρ[...] ἄνωθεν ηὐτρέπιζον συμπόσιον ἐγώ τι

### 940.2

τοῖς ἀνδράσιν· τούτοις—ἀκούεις; μὴ κάθευδε.

### 941.1

(Γε) μὴ γάρ.

### 941.2

〈Κν〉 οἴμοι.

### 942.1

(Σικ) 〈⏑–〉 βούλει παρεῖναι; πρόσ[εχε] καὶ τὰ λοιπά.

### 942.2

σπονδὴ παρῆν· ἐστρώννυτο στιβὰς χαμαί· τραπέζας

### 942.3

ἔγωγε—τοῦτο γὰρ ποεῖν ἐμοὶ προσῆκ’—ἀκούεις;

### 945

μάγειρος ὢν γὰρ τυγχάνω, μέμνησο.

### 945.1

〈Γε〉 μαλακὸς ἁνήρ.

### 945.2

(Σικ) ἄλλος δὲ χερσὶν Εὔιον γέροντα πολιὸν ἤδη

### 945.3

ἔκλινε κοῖλον εἰς κύτος, μειγνύς τε νᾶμα Νυμφῶν

### 945.4

ἐδεξιοῦτ’ αὐτοῖς κύκλωι, καὶ ταῖς γυναιξὶν ἄλλος. ἦν δ’ ὡσπερεὶ ’ς ἄμμον φοροίης· ταῦτα μανθάνεις σύ; καί τις βραχεῖσα προσπόλων εὐήλικος προσώπου

### 945.5

ἄνθος κατεσκιασμένη χορεῖον εἰσέβαινε

### 945.6

ῥυθμὸν μετ’ αἰσχύνης ὁμοῦ μέλλουσα 〈καὶ〉 τρέμουσα,

### 945.7

ἄλλη δὲ συγκαθῆπτε ταύτηι χεῖρα κἀχόρευεν.

### 945.8

(Γε) ὦ πρᾶγμα πάνδεινον παθών, χόρευε, συνεπίβαινε.

### 955

〈Κν〉 τί π〈ο〉τ’ ἔτι βούλεσθ’, ἄθλιοι;

### 955.1

(Γε) μᾶλλον 〈σὺ〉 συνεπίβαινε.

### 955.2

ἄγροικος εἶ.

### 956

〈Κν〉 μὴ πρὸς θεῶν.

### 956.1

〈Γε〉 οὐκοῦν φέρωμεν εἴσω

### 956.2

ἤδη σε;

### 957

〈Κν〉 τί ποήσω;

### 957

〈Γε〉 χόρευε δὴ σύ.

### 957.1

(Κν) φέρετε. κρεῖττον

### 957.2

ἴσως ὑπομένειν ἐστὶ τἀκεῖ.

### 958.1

(Γε) νοῦν ἔχεις. κρατοῦ〈μεν〉.

### 958.2

ὢ καλλίνικοι. παῖ Δόναξ, Σίκων σύ γε,

### 960.1

αἴρεσθε τοῦτον, εἰσφέρετε. φύλαττε δὴ

### 960.2

σεαυτόν, ὡς ἐάν σε παρακινοῦντά τι

### 960.3

λάβωμεν αὖτις, οὐδὲ μετρίως ἴσθ’ ὅτι

### 960.4

χρησόμεθά σοι τὸ τηνικάδ’. ἰώ, ἐκδότω

### 960.5

στεφάνους τις ἡμῖν, δᾶιδα. τουτονὶ λαβέ.

### 965.1

εἶἑν. συνησθέντες κατηγωνισμένοις

### 965.2

ἡμῖν τὸν ἐργώδη γέροντα, φιλοφρόνως

### 965.3

μειράκια, παῖδες, ἄνδρες, ἐπικροτήσατε.

### 965.4

ἡ δ’ εὐπάτειρα φιλόγελώς τε παρθένος Νίκη μεθ’ ἡμῶν εὐμενὴς ἕποιτ’ ἀεί.

## License and provenance

This text is licensed CC0 1.0 Universal. The canonical record is the JSON at https://eulogikon.org/data/works/grc/menander-of-athens-dyscolus-hps-bm.json (sha256:9b624d3889fa8a360f9d3631d700bee4bc22d29fa7479ffcd23a5cf7c001ef9b). Cite as `eul_wid: hps-bm`.